Nhlavutelo 1 - Testamente Leyimpsha Xichangana

Marito yorhanga ni kuxeweta

¹ Loku i kuhlavutela ka Yesu Kriste, loku Xikwembu ximunyikeke kona, lesvaku atakomba malandza ya yena svilo lesvi svifanelaka kuhumelela kungali khale. Kriste asvitivisile hi kurhumela ntsumi ya yena ka Yohani nandza wakwe.

² Hi kurungula hinkwasvu lesvi asvivoneke, Yohani aveka vumboni henhla ka Rito lerihumaka ka Xikwembu, ni le henhla ka ntiyiso ya lesvivuliwaka hi Yesu Kriste.

³ Kukatekile munhu lweyi ahlayaka mahungu ya vuprofeta lebzi, kukatekile ni lava vamayingisaka, ni kulandza lesvitsaliweke bukwini leyi; hikuva nkarhi wa kuhumelela ka svona wu le kusuhi.

⁴ Mina Yohani nitsalela tikereke ta ntlhanu ni timbirhi letinga tikweni ra Aziya, nili: Timpsalu ni kurhula asvive na n'wina, svihuma ka lweyi anga kona, lweyi aali kona, lweyi angatata; svihuma ni le ka mimoya ya ntlhanu ni yimbirhi leyinga mahlweni ka xiluvelo xa yena,

⁵ ni le ka Yesu Kriste, mboni leyotshembeka, mativula ya lavafeke ni mufumi wa tihosi ta misava. Ka lweyi ahirhandzaka, lweyi ahitshunxeke svijohweni sva hina hi ngati ya yena,

⁶ ahiyendla tiko, ni kuva vaprista lavatirhelaka Xikwembu Tatana wa yena, ka yena Kriste akuve kudzuneka ni matimba, hilaha kungaheliki! Amen.

⁷ Vonani, wata ni marefu! Mahlo hinkwawu matamuvona, hambi lava vamutlhaveke. Tinxaka hinkwatu ta vanhu va misava titaba nkosi tirila hikolaho ka yena, hakunenenene! Amen.

⁸ “Hi mina Alfa na Omega”, wosungula ni wa makumu, kuvula Hosi Xikwembu “lweyi anga kona, lweyi aali kona, lweyi angatata, lweyi wa matimba hinkwawu.”

Yohani akombiwa Kriste hi xivoniso

⁹ Mina Yohani, ninga makwenu ni nakuloni maxangweni, ni le Mfun'wini, ni le kulehiseni ka mbilu ka Yesu Kriste, anili xihlaleni lexivuliwaka Patmosi, hi mhaka ya Rito ra Xikwembu ni kutiyisa vumboni bza Yesu.

¹⁰ Kutani, hi siku ra Hosi, anikumeka Moyeni, ni twa rito lerihuwelelaka hi le ndzhaku ka mina, ripfuma kufana ni mhalamhala,

¹¹ riku: “Tsala bukwini lesvi usvivonaka, kutani uyirhumela tikerekeni leti ta ntlhanu ni timbirhi: Kereke ya le Efesa ni ya le Smirna ni ya le Pergamo ni ya le Tiyatira ni ya le Sarda ni ya le Filadelfiya ni ya le Lawudokiya.”

¹² Kutani nihundzukula, nilava kuvona lweyi avulavulaka na mina. Loko nihundzukulile, nivona svitlhomativoni sva ntlhanu ni svimbirhi sva golidi,

¹³ ni mun'we wofana ni N'wana-wa-Munhu na ayimile xikarhi ka svona, ayambale xiyambalu lexifikaka milengeni ya yena, na ali ni bandi ra golidi xifuveni xa yena.

¹⁴ Misisi ni nhloko ya yena ayibasile kufana ni voya bza tinyempfu, yifana ni gapongo. Matihlo ya yena amafana ni malangavi ya ndzilo.

¹⁵ Minkondzo ya yena ayifana ni koporo leyihundzeke hi le ndzilweni yitlhela yipolichiwa, yivangama. Rito ra yena arifana ni mpfumawulu wa mati lawa yotala.

¹⁶ Vokweni ra yena ra xinene aatamelile tinyeleti ta ntlhanu ni timbirhi; non'weni wa yena akuhuma tlhari lerilotiweke ka matlhelo ha mambirhi; nghohe ya yena ayifana ni jambu loko rivangama ninhlekanhi.

¹⁷ Loko nimuvona, niwela milengeni ya yena, nifana ni munhu lweyi afeke. Kambe yena atlhanteka voko ra xinene henhla ka mina, aku: Ungachavi! Ni lweyi wosungula ni lweyi wogamesa,

¹⁸ ni lweyi ahanyaka. Anifile, kambe vona, svosvi ni lweyi ahanyaka hilaha kungaheliki. Ni ni makhiya ya rifu ni ya hayidisi.

¹⁹ Hikolaho, tsala lesvi usvivonaka, svinga lesvinga kona svosvi ni lesvingatahumelela ndzhaku ka svona.

²⁰ Xihundla xa tinyeleti leti ta ntlhanu ni timbirhi leti utivoneke vokweni ra mina ra xinene, ni xihundla xa svitlhomativoni sva ntlhanu ni timbirhi ta golidi, hi lexi: Tinyeleti ta ntlhanu ni timbirhi i tintsumi ta tikereke ta ntlhanu ni timbirhi, kutani svitlhomativoni sva ntlhanu ni timbirhi i tikereke takona ta ntlhanu ni timbirhi.