Matewu 8 - Testamente Leyimpsha Xichangana

Ta Yesu loko ahanyisa munhu wa nhlokonho

¹ Loko Yesu axikile hi le ntshaveni, xitshungu lexikulu ximulandzelela.

² Kutani kuta munhu wa nhlokonho, afika amukhinsamela, aku: “Hosi, loko usvirhandza, unganibasisa.”

³ Yesu atshambuluta voko, amukhumba, aku: “Nasvirhandza, nakubasisa!” Hi nomo-lo, abasa nhlokonho ya yena.

⁴ Yesu aku ka yena: “Tivonele, ungatshuki ubzela munhu svilo lesvi; kambe famba, uyatikomba ka Muprista, uhumesa mhamba leyingalerisiwa hi Moxe, svitava vumboni ka tiko.”

Ta Yesu loko ahanyisa mutirhi wa ndhuna ya dzana

⁵ Kakuloko anghena Kapernawume, ndhuna ya dzana ra masochwa yita ka yena, yimukombela hi xichavu lexikulu,

⁶ yiku: “Hosi, mutirhi wa mina ayo lakahla ndlwini, awome svirho, axaniseka ngopfu.”

⁷ Yesu aku ka yena: “Nitaya, niyamuhanyisa.”

⁸ Ndhuna ya dzana ra masochwa yihlamula yiku: “Hosi, asvinifanelanga lesvaku wena utanghena ndlwini ya mina, kambe vula rito ntsena, kutani mutirhi wa mina atahanya;

⁹ hikuva, mina ninga munhu lweyi afumiwaka hi van'wana, ni ni masochwa hansi ka mina; loko niku ka mun'we wa vona: ‘Famba!’ Wafamba; ni ka mun'wana: ‘Tana!’ Wata; ni le ka mutirhi wa mina: ‘Yendla lesvo karhi!’ Wasviyendla.”

¹⁰ Loko Yesu asvitwile, ahlamala, kutani abzela lavamulandzelaka, aku: “Nitiyisile nili ka n'wina: Xikarhi ka Vaisrayele, anikumanga munhu ni mun'we lweyi anga ni kupfumela loku kotanu.

¹¹ Namibzela, nili: Lavotala vatahuma avuxeni ni le vupelajambu, kutani vatatshama svakujeni Mfun'wini wa matilo kun'we na Abrahamu, na Izaki, na Yakobe.

¹² Kambe lava Mfumu awuli wa vona, vatacukumetiwa handle, munyameni, laha kungatava ni minkosi ni kuketsela ka matinyo.”

¹³ Kutani Yesu aku ka ndhuna ya dzana: “Famba, tlhelela kaya! Akuyendleke hilaha upfumeleke hakona.” Kutani mutirhi wa ndhuna ahanyisiwa hi nkarhi wolowo.

Ta Yesu loko ahanyisa mamana wa nkata Petrosi

¹⁴ Loko Yesu afika kaya ka Petrosi, avona mamana wa nkata Petrosi na ayetlele na avabza, miri wa yena wuhiseta.

¹⁵ Yesu amukhumba hi voko, kutani kuhiseta ka miri wa yena kunyamalala. Hi loko apfuka, atirhela Yesu.

Ta Yesu loko ahanyisa lavanyingi

¹⁶ Nimajambu, vatisa lavanyingi lava avali ni madimoni; kutani ahlongola mimoya leyi hi rito ntsena, nasvona ahanyisa hinkwavu lavavabzaka,

¹⁷ lesvaku kuyendleka lesvingavuliwa hi muprofeta Ezaya lweyi angaku: “Atekile mahlomulu ya hina, atirhwexa ni mavabzi ya hina.”

Ta vanhu lavanavelaka kulandza Yesu

¹⁸ Loko Yesu avona xitshungu lexi aximurhendzelile, alerisa vajondzisiwa va yena kupelela ka tlhelo rin'wana ra nambu.

¹⁹ Kutani mun'we wa mutsali ata ka yena, ataku: “Mujondzisi, nitakulandza hinkwaku lomu uyaka kona.”

²⁰ Yesu amuhlamula aku: “Makhanga ma ni mincele, ni tinyanyana ti ni svisaka, kambe N'wana-wa-Munhu anga na laha angaseketelaka kona nhloko ya yena.”

²¹ Mun'we wa vajondzisiwa va yena aku ka yena: “Hosi, wanganipfumelela nirhanga hi kuyalahla tatana.”

²² Yesu aku ka yena. “Nilandze, kutani utshika vafi valahla vafi va vona.”

Ta Yesu loko amiyeta xidzedze

²³ Loko anghene bzatswini, vajondzisiwa va yena vamulandza.

²⁴ Kutani kupfuka xidzedze lexikulu tiveni, lakakuva bzatsu rikondza ribiwa hi magandlati; kambe Yesu, yena, aayetlele.

²⁵ Kutani vayamupfuxa, vaku: “Hosi, hiponise, halova!”

²⁶ Aku ka vona: “Hikolaho ka yini mili ni vutoya ke, n'wina vanhu vakupfumela lokutsongo?” Hi loko ayima, atshinya mheho ni tiva, kutani kurhula lokukulu kuva kona.

²⁷ Vanhu vahlamala vaku: “Munhu lweyi i munhu muni xana, lesvi mheho ni tiva svimuyingisaka ke?”

Ta kuhanyisiwa ka Vagadala lava avali ni madimoni

²⁸ Loko afikile ka tlhelo rin'wana ra tiva tikweni ra Vagadala, atlhangavetiwa hi vanhu vambirhi lava avali ni madimoni, vahuma hi le masirheni; avachavisa ngopfu, kuli hava munhu ni mun'we lweyi aatiya kuhundza hi ndlela yoleyo.

²⁹ Kutani vahuwelela, vaku: “Mhaka ya wena na hina hi yihi ke, wena N'wana wa Xikwembu? Xana utele kutahixanisa nkarhi wungasifika ke?”

³⁰ Kulenyana na vona, akuli ni ntlhambi lowukulu wa makhumba lawa amali kujeni.

³¹ Madimoni mamukombela hi matimba maku: “Loko uhihlongola, hirhumele antlhambini wa makhumba.”

³² Aku ka wona: “Yanani!” Hi loko mahuma mayanghena tinguluveni; kutani ntlhambi hinkwawu wutsutsumela ridongeni wuyatihoxa xiziveni xa tiva wufela kona.

³³ Varisi, vona, vabaleka, vaya doropeni, vayarungula hinkwasvu, ni lesvi svihumeleleke ka lava avali ni madimoni.

³⁴ Kutani vanhu va doropa hinkwaru vahuma kuyahlangana na Yesu; loko vamuvonile, vamukombela hi matimba lesvaku asuka tikweni ra vona.