Matewu 5 - Testamente Leyimpsha Xichangana

Ta Yesu loko ajondzisa ntshaveni

¹ Kuteloko Yesu avona xitshungu, ayakhwela ntshaveni; loko atshamile, vajondzisiwa va yena vamutshinelela.

² Kutani asungula kuvajondzisa, aku:

³ “Kukatekile svisiwana moyeni, hikuva Mfumu wa matilo i wa svona.

⁴ Kukatekile lavarilaka, hikuva vatachaveleliwa.

⁵ Kukatekile lavorhula, hikuva vataja ndzhaka ya misava.

⁶ Kukatekile lavanga ni ndlala ni torha ra svolulama, hikuva vataxurhisiwa.

⁷ Kukatekile lavanga ni timpsalu, hikuva vatakombiwa timpsalu.

⁸ Kukatekile lavanga ni timbilu letibaseke, hikuva vatavona Xikwembu.

⁹ Kukatekile lavatisaka kurhula, hikuva vatavuliwa vana va Xikwembu.

¹⁰ Kukatekile lava vaxanisiwaka hikolaho ka svolulama, hikuva Mfumu wa matilo i wa vona.

¹¹ “Mikatekile loko vamirhuketela, loko vamixanisa ni kumilumbeta hi mavunhwa lawa yotala hikolaho ka mina.

¹² Tsakani, mitsakisisa, hikuva hakelo ya n'wina i yikulu matilweni; hikuva vaxanisise xisvosvo vaprofeta lava avali kona, na n'wina mingasivakona.”

Ta munyu ni kuvonakala ka misava

¹³ N'wina mi munyu wa misava; kambe loko munyu wupshama, kunandziha ka wona kutapfuxetiwa hi yini ke? Awahapfuni nchumu, loko kungali kucukumetiwa handle, wukandziyeliwa hi vanhu.

¹⁴ N'wina mi kuvonakala ka misava; doropa leriyakiweke ntshaveni aringetumbetiwi.

¹⁵ Nasvona, avalumeki rivoni kurimbhonya hi xirhundzu, kambe variveka henhla, kutani rivoninga hinkwavu lava vanga ndlwini.

¹⁶ Kuvonakala ka n'wina akuvoningele vanhu hi mukhuva wolowo, lesvaku vatavona mintirho ya n'wina leyosaseka, vadzunisa Tatana wa n'wina lweyi anga matilweni.

Ta Yesu loko ajondzisa hi ta Nawu

¹⁷ Mingapimiseni lesvaku nitile kutahelisa Nawu hambi vali Vaprofeta; anitelangakutahelisa, nitele kutawulandza.

¹⁸ Nimibzela ntiyiso, nili ka n'wina: Tilo ni misava svingasinyamalala, yota , kumbe xindzhatana, hambi xili xin'we, xingakala xingasusiwi Nawini, kukondza svilo hinkwasvu svitava svihetisekile.

¹⁹ Hikolaho, lweyi angatatlula wun'we wa milawu leyitsongo leyi, kutani ajondzisa vanhu kuyendlisa svosvo, atavuliwa lwentsongo Mfun'wini wa matilo. Kambe lweyi angatayihlayisa ni kuyijondzisa, atavuliwa lwenkulu Mfun'wini wa matilo.

²⁰ Hikuva namibzela nili: Loko kululama ka n'wina kungatluli kululama ka Vatsali ni ka Vafarisi, amingangheni Mfun'wini wa matilo.

Ta Yesu loko ajondzisa hi ta vukarhi

²¹ “Misvitwile lesvivuliweke ka lava va khale, loko vaku: ‘Ungatshuki udlaya; lweyi adlayaka, atafanela kuyavanyisiwa.’”

²² “Kambe mina nili ka n'wina: Mani na mani lweyi akarhiyelaka makwavu, atafanela kuyavanyisiwa; lweyi ange ka makwavu: ‘U xiphukuphuku!’ Afanela kuyisiwa ka muyavanyisi; lweyi ange ka yena: ‘Xihunguki ndziwena!’ Afaneliwa hi ndzilo wa Tihele.”

²³ Hikolaho, loko uhumesa mhamba ya wena alitarini kutani utsundzuka kolaho lesvaku makwenu a ni mhaka na wena,

²⁴ siya mhamba ya wena kolaho alitarini, kutani urhanga uyarivalelana ni makwenu; hi kona ungatavuya, utahumesa mhamba ya wena.

²⁵ Hantlisa urivalelana ni lweyi unga ni mholova na yena, na mahali ndleleni, akuva munhu lweyi angakunyiketi ka muyavanyisi, muyavanyisi yena akunyiketa ka phoyisa, kutani unghenisiwa jele.

²⁶ Nitiyisile nili ka wena: Ungakala ungahumi kona, loko ungasihumesa male ya wena hinkwayu.

Ta Yesu loko ajondzisa hi ta vuwosvi

²⁷ “Misvitwile lesvingavuliwa loko vaku: ‘Ungatshuki uwosva.’ ”

²⁸ Kambe mina nili ka n'wina: Mani na mani lweyi alangutaka wansati hi kumunavela, amuwosvile mbilwini ya yena.

²⁹ Hikolaho loko tihlo ra wena ra xinene rikujohisa, rixokole, uricukumeta kule na wena; hikuva svingayampsa loko xirho xin'we xa wena xilova, miri wa wena hinkwawu wungahoxiwi Tiheleni.

³⁰ Loko voko ra wena ra xinene rikujohisa, ritseme, uricukumeta kule na wena, hikuva svingayampsa loko xirho xin'we xa wena xilova, kutlula kuva miri wa wena hinkwawu wuya Tiheleni.

Ta Yesu loko ajondzisa hi ta kutshika nsati

³¹ “Nasvona kuvuliwile, vaku: ‘Lweyi atshikaka nsati wa yena, aamunyike papela ra kumutshika.’ ”

³² Kambe mina nili ka n'wina: Mani na mani lweyi atshikaka nsati wa yena, loko kungali hi mhaka ya vunghwavana, amuyendla lesvaku ahundzuka muwosvi; kutani mani na mani lweyi atekaka wansati lweyi atshikiweke hi mukhuva wolowo, wawosva.

Ta Yesu loko ajondzisa hi ta kuhlambanya

³³ “ Nasvona misvitwile lesvaku kuvuliwile ka lava va khale, vaku: ‘Ungatshuki utlhela ndzhaku akuhlambanyeni ka wena, kambe utayendla lesvi ungahlambanya svona mahlweni ka Hosi.’ ”

³⁴ Kambe mina nili ka n'wina: Mingatshukeni mihlambanya nikutsongo, hambi kuli hi tilo, hikuva i xiluvelo xa Xikwembu,

³⁵ hambi kuli hi misava, hikuva i vunavalatelo bza milenge ya xona, hambi kuli hi Yerusalema, hikuva i doropa ra Hosi leyikulu.

³⁶ Hambi yili nhloko ya wena, ungatshuki uhlambanya hi yona, hikuva ungakala ungasvikoti kuhundzula ni nsisi ni wun'we, kuwuyendla wobasa kumbe wa ntima.

³⁷ “Akuvulavuleni ka n'wina ‘Ina’ aave ‘Ina’, ‘Ahihim’ ava ‘Ahihim’. Lesvi yengeteleliwaka ka svosvo svihuma ka lweyi wobiha.”

Ta Yesu loko ajondzisa hi ta kutirihisela

³⁸ “Misvitwile lesvingavuliwa loko vaku: ‘Tihlo ririhiwa hi tihlo, tinyo hi tinyo.’ ”

³⁹ Kambe mina nili ka n'wina: Mingatshukeni miyalela lweyi amiyendlelaka lesvobiha; kambe loko munhu akumakala rhama ra xinene, mukangatelele ni lerin'wana.

⁴⁰ Ni loko munhu alava kukumangalela, akutekela banci, mutshike ateka na rona hembe. Loko akutekela nguvu mutshike ateka na wona nkhancu.

⁴¹ Loko munhu akusindzisa kufamba mpfhuka wun'we, famba na yena mimpfhuka mimbirhi.

⁴² Nyika lweyi akombelaka ka wena, ungafularheli lweyi anavelaka kulomba xanchumu ka wena.

Ta kurhandza valala

⁴³ “Misvitwile lesvingavuliwa, loko vaku: ‘Utarhandza wa le kwenu, uvenga nala wa wena.’”

⁴⁴ Kambe mina nili ka n'wina: Rhandzani valala va n'wina, mikhongelela lava vamixanisaka,

⁴⁵ lesvaku mihundzuka vana va Tatana wa n'wina lweyi anga matilweni, hikuva axisa jambu ra yena henhla ka lavobiha ni lavanene, anisa mpfula henhla ka lavolulama ni lavohomboloka.

⁴⁶ Loko mirhandza lava vamirhandzaka ntsena, xana mingalangutela hakelo muni ke? Na vona vahakelisi va rhesa avayendlisi svosvo xana?

⁴⁷ Ni loko mixeweta vamakwenu ntsena, mitlula van'wana ha yini-ke? Na vona vamatiko avayendlisi svosvo xana?

⁴⁸ Hikolaho-ke, na n'wina mifanele kuhetiseka, kufana ni lesvi Tatana wa n'wina wa le tilweni ahetisekeke.