Matewu 4 - Testamente Leyimpsha Xichangana

Ta kuringiwa ka Yesu

¹ Hi loko Yesu ayisiwa mananga hi Moya wa Xikwembu, ayaringiwa hi Diyavulosi.

² Atshama masiku ya mune wa makume ni vusiku bzakona na angaji nchumu, akondza atwa ndlala.

³ Kutani muringi ata ka yena, ataku: “Loko uli N'wana wa Xikwembu, bzela maribze lawa lesvaku mahundzuka svakuja.”

⁴ Kambe yena ahlamula, aku: Kutsaliwile lesvi: “‘Munhu angakala angahanyi hi svakuja ntsena, kambe atahanya hi marito hinkwawu lawa mahumaka non'weni wa Xikwembu.’”

⁵ Kutani Diyavulosi amuyisa doropeni leri rohlawuleka, amuveka axihlungweni xa Tempele,

⁶ aku ka yena: “Loko uli N'wana wa Xikwembu, jatama, hikuva kutsaliwile lesvi: “‘Xikwembu xitarhumela tintsumi ta xona, kutani titakuqhamukela mavokweni ya tona, lesvaku nenge wa wena wungatshuki wuvavisiwa hi ribze.’”

⁷ Yesu aku ka yena: “Nakambe kutsaliwile lesvi: ‘Ungatshuki uringa Hosi, Xikwembu xa wena.’”

⁸ Diyavulosi atlhela amuyisa ntshaveni leyoleha ngopfu, amukomba mimfumu hinkwayu ya misava ni kudzuneka ka yona,

⁹ kutani aku ka yena: “Svilo lesvi hinkwasvu nitakunyika svona loko unikhinsamela, unigandzela.”

¹⁰ Hi loko Yesu aku ka yena: Suka Sathana, hikuva kutsaliwile lesvi: “‘Utagandzela Hosi, Xikwembu xa wena, utirhela xona ntsena.’”

¹¹ Hi loko Diyavulosi amutshika; kutani tintsumi tita ka Yesu, titamutirhela.

Ta Yesu loko asungula ntirho wa yena Galileya

¹² Loko Yesu atwa lesvaku Yohani akhomiwile, atlhelela Galileya.

¹³ Kutani asuka Nazareta, ayatshama Kapernawume, doropa leringa kusuhi ni tiva, amakumu ya matiko ya Zebuloni na Naftali,

¹⁴ lesvaku kutahetiseka lesvingavuliwa hi muprofeta Ezaya, loko aku:

¹⁵ “Wena tiko ra Zebuloni ni ra Naftali, ndleleni yoya ativeni hi tlhelo rin'wana ra Yordani, wena Galileya wa vamatiko!

¹⁶ Vanhu lava avatshama munyameni, vavonile kuvonakala lokukulu; lava avatshama tikweni ni le ndzhutini wa rifu, vafikeliwe hi kuvonakala.”

¹⁷ Kusukela nkarhini wolowo Yesu asungula kupaluxa Evhangeli, aku: “Hundzukani, hikuva Mfumu wa matilo wu le kusuhi.”

Ta Yesu loko avitana mune wa vajondzisiwa

¹⁸ Loko ali karhi afamba alulama ni tiva ra Galileya, avona vavanuna vambirhi, Simoni, lweyi anyikiweke vito ra Petrosi, na Andreya makwavu, vali karhi vahoxa tinkoka ativeni, hikuva vali vaphasi va tihlampfi.

¹⁹ Kutani aku ka vona: “Nilandzeni, nitamiyendla vaphasi va vanhu.”

²⁰ Hi nomo-lo vasiya tinkoka ta vona, vamulandza.

²¹ Ahundzela mahlweni, kutani avona vavanuna van'wana vambirhi, anga Yakobe na Yohani vana va Zebedewu; avali bzatsweni ni tatana wa vona, vali karhi varhunga tinkoka ta vona. Avavitana,

²² hi loko vahantla vasiya bzatsu ni tatana wa vona, vamulandza.

Ta Yesu loko apfuna xitshungu lexikulu

²³ Yesu arhendzeleka hi tiko hinkwaru ra Galileya, na ali karhi ajondzisa masinagogeni ya vona, apaluxa Evhangeli ya Mfumu, ahanyisa mavabzi hinkwawu, ni kukarhateka hinkwaku loku vanhu avali nakona.

²⁴ Kutani ndhuma ya yena yihangalaka tikweni hinkwaru ra Siriya. Vatisa hinkwavu lavavabzaka hi mavabzi ya tinxakaxaka ni lava vaxanisekaka ngopfu, kukota lava avali ni madimoni, ni lava avali ni rihuhe, ni lava va kulimala, kutani Yesu avahanyisa.

²⁵ Kutani xitshungu lexikulu lexihumaka Galileya ni le Dekapolisi, ni le Yerusalema ni le Yudeya ni le tlhelweni rin'wana ra Yordani, ximulandza.