Matewu 3 - Testamente Leyimpsha Xichangana

Ta kujondzisa ka Yohani Mukhuvuli

¹ Nkarhini wolowo kuhumelela Yohani Mukhuvuli, ajondzisa mananga ya Yudeya,

² aku: “Hundzukani, hikuva Mfumu wa matilo wu le kusuhi.”

³ Yohani hi yena munhu lweyi angavuliwa hi muprofeta Ezaya, loko aku: “Rito ra munhu lweyi ahuwelelaka mananga, rili: ‘Lungiselani ndlela ya Hosi, khulelani svindlelana sva yona.’”

⁴ Yohani yelweyi aayambala nguvu yolukiwa hi mavoya ya kamela, atikhama xisuti hi bandi ra xikhumba, svakuja sva yena aali tintete ni vulombe bza nhova.

⁵ Kutani vayaki va Yerusalema ni vayaki hinkwavu va Yudeya ni va muganga hinkwawu lowu wunga kusuhi na Yordani, avahuma vaya ka yena;

⁶ kutani aavakhuvula nambzeni wa Yordani, na vali karhi vativula svijoho sva vona.

⁷ Kambe loko avona Vafarisi ni Vasaduki lavotala vata kutakhuvuliwa hi yena, aku ka vona: “Rixaka ra svipshahla, i mani lweyi amibzeleteleke lesvaku mitapona ka vukarhi bza Xikwembu lebzitaka xana?

⁸ Vekani mihandzu leyifambelanaka ni kuhundzuka ka n'wina.

⁹ Nasvona mingapimiseni lesvaku: ‘Hi na Abrahamu, anga yena tatana wa hina.’ Hikuva namibzela lesvaku hi maribze lawa, Xikwembu xingapfuxela Abrahamu vana.

¹⁰ Ni svosvi xihloka xivekiwile atimintsweni ta nsinya; wun'wana ni wun'wana lowu wungavekiki mihandzu leyinene, wutatsemiwa wuhoxiwa ndzilweni.

¹¹ Loko nili mina, nimikhuvula hi mati hi kuya hi kuhundzuka ka n'wina, kambe lweyi ataka hi le ndzhaku ka mina, wanitlula hi matimba; asvinifaneli kutamela amasandhazi ya yena, hi yena lweyi angatamikhuvula hi Moya Lowokwetsima ni ndzilo.

¹² Rihlelo ri le vokweni ra yena; ataphepheta hinkwasvu lesvinga xibulelweni xa yena, kutani atrigu, atarichela tshaleni ra yena; kambe muhungu wona, atawuhisa ndzilweni lowungatimekiki.”

Ta kukhuvuliwa ka Yesu

¹³ Nkarhini wolowo Yesu ahuma Galileya, aya Yordani ka Yohani kuya khuvuliwa hi yena.

¹⁴ Kambe Yohani ayala aku: “Hi mina lweyi nifanelaka kukhuvuliwa hi wena, kambe wena uta ka mina!”

¹⁵ Yesu amuhlamula, aku: “Nipfumelele svosvi, hikuva svafanela lesvaku hihetisa lesvolulama hinkwasvu hi ndlela leyi.” Kutani Yohani amupfumelela.

¹⁶ Kuteloko Yesu akhuvuliwile, ahantlisa ahuma matini; hi nomo-lo matilo mapfuleka, avona Moya wa Xikwembu wuxika kufana ni xituvana, wuxikela henhla ka yena.

¹⁷ Kutani kutwakala rito lerihumaka matilweni, riku: “Lweyi i N'wananga lweyi nimurhandzaka, lweyi nimutsakelaka.”