Matewu 28 - Testamente Leyimpsha Xichangana

Ta kupfuka ka Yesu kufeni

¹ Loko siku ra Savata rihundzile, Mariya wa Magadala, na Mariya lweyi mun'wana, vapfuka na kahali mpundzu wa siku ra Sonto, vayalanguta sirha.

² Kutani, kuva ni kutsekatseka lokukulu ka misava; hikuva ntsumi ya Hosi ayixikile hi le tilweni, yivumbuluta ribze, yitshamisa henhla ka rona.

³ Ayivangama kufana ni rihati, ni sviyambalu sva yona asvibasile kufana ni gapongo.

⁴ Varindzi varhurhumele hi kuchava, vavoneka ongi hi loko vafile.

⁵ Hi loko ntsumi yibzela vavasati yiku: “Mingachaveni, hikuva nasvitiva lesvaku milava Yesu lweyi avambiweke;

⁶ anga kona laha, hikuva apfukile kufeni, hilaha atshamaka amibzela hakona. Tanani, mitavona laha aalatiwile kona.

⁷ Svosvi-ke, hantlisani, miyativisa vajondzisiwa va yena miku: ‘Apfukile xikarhi ka vafi; wamirhangela aya Galileya, mitayamuvona kona.’ Hisvosvi nimibzelaka svona.”

⁸ Vavasati vasuka sirheni hi kuchava ni kutsaka lokukulu, vatsutsuma vayativisa vajondzisiwa va yena.

⁹ Hi nomo-lo, Yesu avatlhangaveta, aku: “Avuxeni!” Vona vatshinelela vakhoma milenge ya yena vamukhinsamela.

¹⁰ Hi loko Yesu aku ka vona: “Mingachaveni, fambani miyabzela vamakwerhu lesvaku vaya Galileya; vatanivona kona.”

Ta marungula ya valaveleli va sirha

¹¹ Kuteloko vasukile, van'we ka valaveleli vaya doropeni, vayativisa Vaprista lavakulu hinkwasvu lesvihumeleleke.

¹² Loko Vaprista vahlengeletanile ni vakulukumba, valuka makungu, kutani vanyika masochwa male leyotala, vaku:

¹³ “Miku: ‘Vajondzisiwa va yena vatile nivusiku, vatamuyiva, na hina hiyetlele.’

¹⁴ Ni loko mhaka leyi yifika tindleveni ta hosi, hina hitayikholwisa, himiyimelela. ”

¹⁵ Valaveleli vateka male, vayendla hilaha valerisiweke hakona; kutani mhaka yoleyo yitwakala xikarhi ka Vayuda kufikela ni namuntlha.

Ta Yesu loko arhuma lava va khume na mun'we

¹⁶ Vajondzisiwa lava va khume na mun'we vaya Galileya, ntshaveni leyi Yesu avabzeleke yona.

¹⁷ Loko vamuvona, vakhinsama, kambe van'wana vakanakana.

¹⁸ Kutani Yesu avatshinelela, avulavula na vona, aku: “Ninyikiwile vuhosi hinkwabzu tilweni ni la misaveni;

¹⁹ hi kolaho, fambani ka tinxaka hinkwatu, mivayendla vajondzisiwa va mina, mivakhuvula hi vito ra Tatana, ni ra N'wana, ni ra Moya Lowokwetsima,

²⁰ mivajondzisa kuhlayisa hinkwasvu lesvi nimibzeleke svona; kutani vonani, ni na n'wina masiku hinkwawu, kukondza kuhela misava.”