Matewu 27 - Testamente Leyimpsha Xichangana

Ta Yesu loko ali mahlweni ka Pilato

¹ Loko bzixile, Vaprista hinkwavu ni vakulukumba valuka makungu ya kudlaya Yesu.

² Kuteloko vamubohile, vafamba na yena, vayamunyikela ka hosi Pilato.

Ta kufa ka Yudasi

³ Loko Yudasi lweyi angamuxenga avona lesvaku Yesu ayavanyisiwile, atitwa nandzu, kutani ayatlhelisa male ya silivhere leyi ya makume manharhu ka Vaprista lavakulu ni ka vakulukumba,

⁴ aku ka vona: “Nijohile hi kuxenga munhu lweyi angaliki na nandzu.” Vaku ka yena: “Hi ni mhaka muni na svona hina ke? Svitiviwa hi wena svosvo.”

⁵ Kutani Yudasi ayacukumeta male yakona Tempeleni, kutani asuka, ayatisunga.

⁶ Vaprista lavakulu vateka male liya, kutani vaku: “Lesvi yinga male ya ngati, asvifanelanga lesvaku yinghenisiwa ka nhlengo wa Tempele.”

⁷ Kuteloko valukile makungu, vatirhisa male leyi kuxava nsimu ya muvumbi, kulahlela kona valuveli.

⁸ “Hikolaho ka svosvo nsimu leyi yivuliwa ‘Nsimu ya ngati’ ni namuntlha.”

⁹ Hilaha kuhetisekeke lesvivuliweke hi muprofeta Yeremiya, loko aku: “Vatekile male ya silivhere yoringana makume manharhu, yinga nhlayo leyi vanhu va Israyele avapimile lesvaku munhu wakona ataxaviwa ha yona,

¹⁰ kutani vahumesile male leyi kuxava ‘Nsimu ya muvumbi’, hilaha Hosi yileriseke hakona.”

Ta Yesu loko athethisiwa hi Pilato

¹¹ Yesu ayimisiwa mahlweni ka hosi; kutani yona yimuvutisa, yiku: “Xana u hosi ya Vayuda ke?” Yesu aku ka yona: “Uvula svona!”

¹² Kambe loko Vaprista lavakulu ni vakulukumba vamuveka nandzu, angahlamulanga nchumu.

¹³ Hi loko Pilato aku ka yena: “Xana awutitwi timhaka leti totala vakurhwexaka nandzu ha tona ke?”

¹⁴ Kambe Yesu angamuhlamulanga nchumu, hosi yikondza yihlamala ngopfu.

Ta loko Yesu ayavanyiseliwa rifu

¹⁵ Hi nkarhi wa nkhuvo, hosi ayitolovela kutshunxa mubohiwa mun'we lweyi tiko rimukombelaka.

¹⁶ Nkarhini wolowo akuli ni mubohiwa mun'we wa ndhuma svinene, lweyi avaku i Barabasi.

¹⁷ Loko vahlengeletanile, Pilato aku ka vona: “Xana milava lesvaku nimitshunxela wihi: Barabasi, kumbe Yesu lweyi avuliwaka Mesiya ke?”

¹⁸ Aavutisisa svosvo hi kutiva lesvaku avanyiketile Yesu hikolaho ka mavondzo.

¹⁹ Kuteloko Pilato atshamile xitshan'wini xa kuyavanyisa, nsati wa yena arhumela rito ka yena, aku: “Ungatshuki unghena mhakeni ya munhu yelweyo wolulama, hikuva tolo nixaniseke ngopfu norhweni hikolaho ka yena.”

²⁰ Kambe Vaprista lavakulu ni vakulukumba vahlohlotela xitshungu lesvaku xikombela Barabasi, Yesu yena adlawa.

²¹ Hosi yiyengeta yivavutisa yiku: “Xana milava lesvaku nimitshunxela wihi ka lavambirhi?” Vaku: “Barabasi!”

²² Pilato aku ka vona: “Loko svilitano, Yesu lweyi avuliwaka Mesiya, nitayendla yini ha yena xana?” Hinkwavu vaku: “Aavambiwe!”

²³ Hi loko hosi yiku: “Xana ayendlile yini xobiha ke?” Vona vahuwelela hi matimba, vaku: “Aavambiwe!”

²⁴ Loko Pilato avona lesvaku angahumeleli, kumbe asvipfuni nchumu, ni lesvaku dzolonga riya rikula, ateka mati, ahlamba mavoko mahlweni ka xitshungu, aku: “Ani na nandzu wa rifu ra munhu lweyi, svivoneni mili n'wina.”

²⁵ Tiko hinkwaru rihlamula, riku: “Rifu ra yena arive henhla ka hina ni le henhla ka vana va hina.”

²⁶ Kutani avatshunxela Barabasi; kambe alerisa lesvaku Yesu abiwa, kutani amunyiketa lesvaku avambiwa.

Ta masochwa loko matseketsela Yesu

²⁷ Masochwa ya hosi mayisa Yesu ndlwini ya vuhosi, kutani vahlengeleta ntlawa hinkwawu wa masochwa, wumurhendzela.

²⁸ Vamuhlivila xiyambalu, vamuyambexa nchale wopshuka,

²⁹ kutani valuka hari ya mintwa, vamutlhanteka nhlokweni, vamutamelisa rihlanga vokweni ra xinene; kutani vakhinsama mahlweni ka yena, vamutseketsela, vaku: “Xeweni, Hosi ya Vayuda!”

³⁰ Vamupshitela hi marhi; vateka rihlanga, vamuba nhloko hi rona.

³¹ Kuteloko vamupoyilile, vamuhlivila nchale wakona, vatlhela vamuyambexa sva yena, kutani vafamba na yena vayamuvamba.

Ta kuvambiwa ka Yesu

³² Loko vali karhi vahuma, vahlangana ni mun'we wa nuna wa Kirene, lweyi avaku i Simoni, vamusindzisa kurhwala xihambanu.

³³ Loko vafikile ndhawini leyi vange i Golgota, hi lesvaku “Ndhawu ya Pala”,

³⁴ vamunyika vhinyu leripatsanyisiweke ni nyongwa lesvaku anwa; kambe loko anampsile, ayala kunwa.

³⁵ Loko vamuvambile, vayavelana sviyambalu sva yena hi kuhoxa vuhlolotwana,

³⁶ kutani vatshama hansi kolaho, vamurindza.

³⁷ Henhlanyana ka nhloko ya yena, vanameketa tsalwa ra nandzu wa yena leri ringe: “LWEYI I YESU, HOSI YA VAYUDA.”

³⁸ Kutani vamuvamba svin'we ni svigevenga svimbirhi, xin'we vokweni ra xinene, xin'wana ka ra ximantsi.

³⁹ Vahundzi va ndlela vamurhuketela, vahlakahla tinhloko, vaku:

⁴⁰ “Wena lweyi uhirimuxaka Tempele, uku utayipfuxa hi masiku manharhu, tiponise ke, uxika laho xihambanwini, loko uli N'wana wa Xikwembu!”

⁴¹ Hi mukhuva wolowo, na vona Vaprista lavakulu, svin'we ni Vatsali ni vakulukumba, vamutseketsela, vaku:

⁴² “Aponisile van'wana, kambe watsandzeka kutiponisa! Ahiku hi yena Hosi ya Israyele. Aaxike svosvi xihambanwini, hitapfumela ka yena.

⁴³ Atshembile Xikwembu, aximuponise svosvi loko ximutsakela, hikuva ate: ‘Ni N'wana wa Xikwembu.’”

⁴⁴ Ni svigevenga lesvingavambiwa svin'we na yena, asvimurhuketela hi mukhuva wolowo.

Ta kufa ka Yesu

⁴⁵ Kusukela nkarhi wa vuntlhanu na wun'we kuyafika ka nkarhi wa vuntlhanu ni mune munyama wufunengeta tiko hinkwaru.

⁴⁶ Loko kulavile kuva nkarhi wa vuntlhanu ni mune, Yesu ahuwelela hi rito leritlakukeke, aku: “Eli, Eli, Lama Sama Sabaktani?”, hi lesvaku: “Xikwembu xa mina, Xikwembu xa mina, unitshikele yini?”

⁴⁷ Van'wana lava avali kona kolaho, loko vamutwa, vaku: “Avitana Eliya.”

⁴⁸ Hi nomo-lo mun'we wa vona atsutsuma, ayateka xiponjhi, axipeta ka ntsuvi, kutani axitlhoma arihlangeni, amunyika lesvaku anwa.

⁴⁹ Kambe van'wana vaku: “Mutshike, hitavona loko kunene Eliya ata, atamuponisa.”

⁵⁰ Hi loko Yesu atlhela ahuwelela hi rito leritlakukeke, kutani anhlala afa.

⁵¹ Hi nomo-lo, xisirhelo xa nguvu ndzeni ka Tempele xihandzuka hi le xikarhi, kusukela henhla, kuyafika hansi; misava yitsekatseka, ni maribze mapandzeka.

⁵² Masirha mapfuleka; vakwetsimi va Xikwembu lavotala lava avayetlele, vapfuka kufeni;

⁵³ Kutani vahuma masirheni, loko Yesu apfukile kufeni, vanghena doropeni leri rohlawuleka, vali karhi vavoniwa hi lavotala.

⁵⁴ Loko ndhuna ya dzana ra masochwa ni lava avali na yona kurindza Yesu, vavona kutsekatseka ka misava ni lesvihumeleleke, vachava ngopfu, vaku: “Hakunene munhu lweyi aali N'wana wa Xikwembu.”

⁵⁵ Akuli ni vavasati lavotala kolaho, avahlalela na vali kule. Avali lava avalandzelele Yesu ni kumutirhela loko ahuma Galileya.

⁵⁶ Xikarhi ka vona, akuli na Mariya wa Magadala, na Mariya mamana wa Yakobe na Yosefa, ni mamana wa vana va Zebedewu.

Ta kulahliwa ka Yesu

⁵⁷ Kuteloko riya kupeleni, kuta mun'we wa mufuwi wa le Arimateya; vito ra yena aali Yosefa, nakona na yena aali mujondzisiwa wa Yesu.

⁵⁸ Aya ka Pilato, ayakombela ntsumbu wa Yesu; kutani Pilato alerisa lesvaku vamunyika wona.

⁵⁹ Kuteloko Yosefa awutekile, awuphutsela hi lansoro leri aringasitirhisiwa,

⁶⁰ kutani aveka ntsumbu sirheni ra yena lerimpsha, leri aarikovotlile ribzeni; kutani avumbuluta ribze lerikulu ropfala nomo wa sirha, kutani atifambela.

⁶¹ Mariya wa Magadala na Mariya lweyi mun'wana, avali kolaho, vatshamile valangutene ni sirha.

Ta varindzi va sirha ra Yesu

⁶² Loko rixa hi siku leritlhantamaka, ringa ra Savata, Vaprista lavakulu ni Vafarisi vahlengeletana ka Pilato, vaku:

⁶³ “Hosi, hahatsundzuka lesvaku muxisi lwiya, loko ahahanya, ate: ‘Ndzhaku ka masiku manharhu, nitapfuka kufeni.’

⁶⁴ Hikolaho, lerisa lesvaku sirha rilaveleliwa kukondza kufika siku ra vunharhu, lesvaku vajondzisiwa va yena vangatshuki vayamuyiva, kutani vatabzela vanhu vaku: ‘Apfukile kufeni!’ Vunhwa lero ringatlula lerorhanga hi kubiha.”

⁶⁵ Pilato aku ka vona: “Mi ni ntlawa wa valaveleli, yanani miyarindza sirha, hilaha misvivonaka hakona.”

⁶⁶ Kutani vaya, vayatiyisa ribze hi kuveka amfungo wa vona, nasvona vaveka ni varindzi lesvaku vasala varindza.