Matewu 26 - Testamente Leyimpsha Xichangana

Ta Vaprista ni Vatsali loko vatwanana hi ta kudlaya Yesu

¹ Kuteloko Yesu ahetile kuvulavula timhaka toleto hinkwatu, aku ka vajondzisiwa va yena:

² “Masvitiva lesvaku loko kutava kuhundzile masiku mambirhi, kutava ni nkhuvu wa Paska; kutani N'wana-wa-Munhu atanyiketiwa lesvaku avambiwa xihambanwini.”

³ Nkarhini wolowo Vaprista lavakulu, ni Vatsali ni vakulukumba, vahlengeletana hubzeni ya Muprista lwenkulu lweyi avaku i Kayafasi,

⁴ kutani vatwanana kuyakhoma Yesu hi maqhinga, vatamudlaya.

⁵ Kambe avaku: “Svingayendliwi nkhubzeni, hikuva kungatshuka kupfuka mpfilumpfilu xikarhi ka vanhu.”

Ta Yesu loko acheliwa mafurha nhlokweni le Betaniya

⁶ Yesu aali Betaniya, muntini wa Simoni lweyi wa nhlokonho.

⁷ Kutani kuta wansati lweyi aatamele ximbitana xa alabaxtru, xa kutala hi mafurha yonun'hwela yodura ngopfu, amachela nhlokweni ya Yesu na vali kujeni.

⁸ Loko vajondzisiwa vasvivona, vakhunguvanyeka svinene, vaku: “Mafurha lawa maxakeliwela yini ke?

⁹ Amataxavisiwa hi male leyotala, kutani yinyikiwa svisiwana.”

¹⁰ Hikuva Yesu ativa kuvilela ka vona, aku ka vona: “Xana wansati lweyi mimukarhatela yini ke? Aniyendlele ntirho lowunene.

¹¹ Hikuva, loko svili svisiwana, mitava na svona hi masiku hinkwawu, kambe mina, ningakala ningavi na n'wina hi masiku hinkwawu.

¹² Loko atota miri wa mina hi mafurha lawa, ayendlela siku ra kulahliwa ka mina.

¹³ Nitiyisile nili ka n'wina: Misaveni hinkwayu laha Evhangeli leyi yingatapaluxixa kona, lesvi asviyendleke svitavuliwa na svona, ayanakanyiwa ha svona.”

Ta Yudasi loko apfumela kuxenga Yesu

¹⁴ Kutani mun'we wa lava va khume ni vambirhi lweyi avaku i Yudasi Iskariyota, aya ka Vaprista lavakulu,

¹⁵ Aku: “Mitaninyika yini, loko niminyiketa yena ke?” Kutani vamuhumesela male ya silivhere yoringana makume manharhu.

¹⁶ Hi loko Yudasi asungula kulava nkarhi lowunene wovanyiketa Yesu ha wona.

Ta Yesu loko aja Paska ni vajondzisiwa va yena

¹⁷ Hi siku rorhanga ra nkhuvu wa Xinkwa xokala comela, vajondzisiwa vata ka Yesu, vaku: “Xana ulava lesvaku hiyakulungisela kwihi, kuyajela kona Paska?”

¹⁸ Yesu avabzela kuya doropeni, ka munhu wokarhi, vafika vaku ka yena: “Mujondzisi ali: ‘Nkarhi wa mina wukusuhi; nitaja nkhuvu wa Paska laha ka wena, svin'we ni vajondzisiwa va mina.’”

¹⁹ Vajondzisiwa vayendla hilaha Yesu avabzeleke hakona, kutani valungisa Paska.

²⁰ Loko jambu ripelile, Yesu atshama kujeni, ni lava va khume ni vambirhi.

²¹ Loko vahaja, aku ka vona: “Nitiyisile nili ka n'wina: Mun'we ka n'wina atanixenga.”

²² Vakhunguvanyeka ngopfu, kutani vasungula kumuvutisa ha mun'we mun'we, vaku: “Hosi, ungava uvula mina xana?”

²³ Ahlamula, aku: “Lweyi angatanixenga, hi lweyi apetaka voko na mina nkambaneni.

²⁴ Loko ali N'wana-wa-Munhu, atatifambela hilaha svitsaliweke hakona mayelanu na yena, kambe a ni khombo munhu lweyi N'wana-wa-Munhu axengiwaka ha yena! Asvitayampsa ka munhu lweyi loko ongi angapsaliwanga.”

²⁵ Na yena Yudasi lweyi aali karhi amuxenga aku: “Hosi, ungava uvula mina xana?” Yesu aku ka yena: “Kuvula wena svosvo!”

Ta Xilalelo xa Hosi

²⁶ Loko vahali kujeni, Yesu ateka xinkwa, kutani loko axikatekisile, axikhema, anyika vajondzisiwa, aku: “Tekani mija, lowu i miri wa mina.”

²⁷ Kutani ateka ndzheko, awukatekisa, avanyika wona aku: “Nwelani ka wona hinkwenu;

²⁸ hikuva leyi i ngati ya mina, ngati ya ntwananu leyihalateliwaka lava votala lesvaku varivaleliwa svijoho.

²⁹ Kambe nili ka n'wina: Kusukela svosvi, aningahanwi kambe sva mihandzu ya mvhinya, kukondza kufika siku leri ningatasvinwa na n'wina hi ximpsha, Mfun'wini wa Tatana wa mina.”

³⁰ Kuteloko vayimbelelile risimu, vaya Ntshaveni ya Maolivhera.

Ta Petrosi loko ativisiwa ta kulandzula Yesu

³¹ Kutani Yesu aku ka vona: Vusiku lebzi, n'wina hinkwenu mitabaleka minisiya noxe, hikuva kutsaliwile lesvaku: “‘Nitaba mubzisi, kutani tinyempfu ta ntlhambi titahangalaka.’”

³² “Kambe loko nitava nipfukile kufeni, nitamirhangela nifika Galileya.”

³³ Kambe Petrosi aku ka yena: “Hambi loko hinkwavu vangabaleka vakusiya, mina ningakala ningakusiyi, ni siku ni rin'we.”

³⁴ Yesu aku ka yena: “Nitiyisile nili ka wena: Vusiku lebzi, nkuku wungasiyimba, utava unilandzulile kanharhu.”

³⁵ Petrosi aku ka yena: “Hambi loko svifanela kufa na wena, ningakala ningakulandzuli!” Vajondzisiwa hinkwavu na vona vavulisa svosvo.

Ta Yesu loko akhongela Getsemani

³⁶ Hi loko Yesu afamba ni vajondzisiwa ndhawini leyi yivuliwaka Getsemani, kutani aku ka vona: “Tshamani kola, nahaya lahaya, niyakhongela.”

³⁷ Ateka Petrosi ni vana lavambirhi va Zebedewu afamba na vona; hi loko asungula kuvaviseka ni kukhomiwa hi gome lerikulu.

³⁸ Kutani aku ka vona: “Moya wa mina wukhomiwa hi gome lerikulu, gome royisa kufeni; salanikola, milavelela na mina.”

³⁹ Kutani aya kulenyana, akhinsama, mombo wa yena wukhumba hansi ali karhi akhongela aku: “Tatana, loko svingakoteka, ndzheko lowu wungafambela kule na mina! Ntsena kungayendleki kurhandza ka mina, kambe akuyendleke kurhandza ka wena!”

⁴⁰ Atlhelela ka vajondzisiwa, avakuma na vayetlele; aku ka Petrosi: “Xana mitsandzekisa kuyini kulavelela na mina hambi ali wora rin'we ntsena ke?

⁴¹ Lavelelani na mili karhi mikhongela, lesvaku mingaweli amiringweni, hikuva moya wululamile, kambe nyama yitsanile.”

⁴² Kutani atlhela aya ka vumbirhi tlhelweni, akhongela aku: “Tatana wa mina, loko svingakoteki lesvaku ndzheko lowu wufambela kule na mina na ninganwelanga ka wona, akuyendliwe kurhandza ka wena!”

⁴³ Kuteloko atlhelela ka vona kambe, avakuma na vayetlele, hikuva mahlo ya vona amatika hi vurhongo.

⁴⁴ Avasiya, atlhela ayakhongela ka vunharhu tlhelweni, avula marito yofana ni ya kusungula.

⁴⁵ Kutani avuyela ka vajondzisiwa, aku ka vona: “Xana mahayetlela ni kuhumula ke? Vonani, nkarhi wufikile, N'wana-wa-Munhu anyiketiwa mavokweni ya vajohi.

⁴⁶ Sukani miyima, ahifambeni! Langutani, lweyi anixengaka a le kusuhi.”

Ta Yesu loko akhomiwa

⁴⁷ Aku ahavulavula, kuhumelela Yudasi, mun'we wa lava va khume ni vambirhi, ata ni xitshungu lexihlomeke matlhari ni tinhonga, xirhumiwile hi Vaprista lavakulu ni vakulukumba.

⁴⁸ Lweyi amuxengaka aavanyikile xikombiso, aku: “Lweyi ningatamun'qunta, hi yena, mukhomeni!”

⁴⁹ Hi loko Yudasi ata, ahantla akongoma Yesu, aku: “Xeweni Mufundhisi!” Kutani amuq'unta.

⁵⁰ Yesu aku ka yena: “Nakulorhi, lesvi ungatela svona, sviyendle.” Hi loko vatshinelela Yesu, vatshambuluta mavoko vamukhoma.

⁵¹ Hi nomo-lo mun'we wa lava avali na Yesu, ahlomula ripanga ra yena, axupula ndleve ya mutirhi wa Muprista lwenkulu.

⁵² Yesu aku ka yena: “Tlhelisela ripanga ra wena ndhawini ya rona, hikuva hinkwavu lavatirhisaka matlhari, vatadlawa hi matlhari.

⁵³ Xana uyehleketa lesvaku ningatsandzeka kukhongela Tatana wa mina, anipfuna svosvisvosvi hi mavandla ya tintsumi lawa matlulaka khume na mambirhi ke?

⁵⁴ Kambe loko svingavatano, Matsalwa amatayendlekisa kuyini, lesvi mavulaka lesvaku svifanekele kufamba hi ndlela yoleyi ke?”

⁵⁵ Nkarhini wolowo, Yesu aku ka xitshungu: “Lesvi mihumeke na mili ni matlhari ni tinhonga kutanikhoma, nova xigevenga xana? Masiku hinkwawu anitshama Tempeleni, nili karhi nijondzisa: Aminikhomanga.

⁵⁶ Hambi svilitano, svilo lesvi hinkwasvu svihumelelile lesvaku kuhetiseka lesvitsaliweke hi vaprofeta.” Hi loko vajondzisiwa hinkwavu vamusiya, vabaleka.

Ta Yesu loko ayisiwa hubzeni

⁵⁷ Lavangakhoma Yesu vamuyisa ka Kayafasi Muprista lwenkulu, laha Vatsali ni vakulukumba avahlengeletanile kona.

⁵⁸ Petrosi amulandza hi le kule, anghena rikupakupeni ra yindlo ya Muprista lwenkulu; loko anghenile, atshamisa ni vatirhi, lesvaku atavona kuhela ka svona.

⁵⁹ Kutani Vaprista lavakulu, ni huvu hinkwayu ya Sinedri, avalava vumboni bza mavunhwa bzohehla Yesu ha bzona, lesvaku vatakuma xomudlaya ha xona;

⁶⁰ kambe avabzikumanga, hambi loko kuhumelelile timboni ta mavunhwa letotala. Kuheteleleni, kuhumelela timboni timbirhi tiku:

⁶¹ “Munhu lweyi ate: ‘Ni ni matimba ya kuhirimuxa Tempele ya Xikwembu, nikutlhela niyipfuxa ndzhaku ka masiku manharhu.’”

⁶² Hi loko Muprista lwenkulu ayima, aku ka Yesu: “Xana awuhlamuli nchumu ke? Hi yi hi mhaka leyi vakuhehlaka ha yona xana?”

⁶³ Kambe Yesu amiyela. Muprista lwenkulu atlhela, aku ka yena: “Nikuhlambanyisa hi Xikwembu lexi xihanyaka, hibzele loko uli wena Mesiya, N'wana wa Xikwembu.”

⁶⁴ Yesu amuhlamula aku: Wena se uvulile! Ntsena namibzela nili: “‘Kusukela svosvi, mitavona N'wana-wa-Munhu na atshamile vokweni ra xinene ra Lweyi anga ni matimba hinkwawu, mitamuvona ata hi marefu ya le tilweni.’”

⁶⁵ Hi loko Muprista lwenkulu ahandzula xiyambalu xa yena, aku: “Asandzile Xikwembu; hahalavela yini timboni ke? Mahakutwa kusandza ka yena svosvi. N'wina mili yini?”

⁶⁶ Vahlamula, vaku: “Afaneliwa hi rifu.”

⁶⁷ Kutani vamupshitela marhi nghoheni, vamuba hi svibakela, van'wana vamuba hi timpama, vaku:

⁶⁸ “Hivhumbhele lweyi akubeke, wena Kriste!”

Ta Petrosi loko alandzula Yesu

⁶⁹ Petrosi aatshamile handle rikupakupeni; kutani mutirhi mun'we waxisati ata ka yena, aku: “Na wena, awuli na Yesu wa Mugaleliya.”

⁷⁰ Kambe Petrosi akaneta mahlweni ka hinkwavu, aku: “Lesvi usvivulaka, anisvitivi.”

⁷¹ Hi loko ahuma, ayayima nyangweni; kutani mun'we wansati amuvona, aku ka lava avali kolaho: “Wanuna lweyi aali na Yesu wa Nazareta.”

⁷² Petrosi atlhela akaneta aku: “Mina nahlambanya lesvaku munhu lweyi, animutivi.”

⁷³ Andzhakunyana, lava avali kolaho vatshinela, vaku ka Petrosi: “Hakunene, na wena, u mun'we wa vona, hikuva utikomba hi mavulavulela ya wena.”

⁷⁴ Hi loko asungula kurhuketela ni kuhlambanya hi matimba aku: “Nitiyisile lesvaku munhu lweyi, mina animutivi!” Hi nomo-lo, nkuku wuyimba.

⁷⁵ Kutani Petrosi atsundzuka rito lerivuliweke hi Yesu, loko aku: “Nkuku wungasiyimba, utava unilandzulile kanharhu.” Hi loko ahumela handle, ayarila hi xiviti.