Matewu 25 - Testamente Leyimpsha Xichangana

Ta xifaniso xa vanhwanyana va khume

¹ “Nkarhini wolowo, Mfumu wa matilo wutafana ni vanhwanyana va khume lavangateka tivoni ta vona kuyahlangana ni muteki.

² Lava va ntlhanu ka vona avali lavorivala, lavan'wana va ntlhanu avatlharihile.

³ Lavorivala avatekile tivoni ta vona, kambe vangalonganga ni mafurha hi tlhelo;

⁴ kasi lavotlhariha avalongile asvikutswini mafurha svin'we ni tivoni ta vona.

⁵ Hikuhlwela ka muteki, vakhomiwa hi vurhongo hinkwavu, vayetlela.

⁶ Kambe xikarhi ka vusiku lebzikulu kutwakala huwa leyingo: ‘Muteki hi lweyi, humani, miyamutlhangaveta!’

⁷ Kutani vanhwanyana vapfuka hinkwavu, valungisa tivoni ta vona.

⁸ Lavorivala vaku ka lavotlhariha: ‘Hicheleleni mafurhanyana, hikuva tivoni ta hina tatimeka.’

⁹ Kambe lavotlhariha vahlamula vaku: ‘Ahihim, mafurha lawa mangakala mangaringani hina na n'wina; yanani miyaxava ya n'wina ka lava vaxavisaka.’

¹⁰ Vaku vahaya kuxaveni, muteki asala afika. Lava avatilungiselile, vanghena na yena nkhubzeni, kutani xipfalu xipfaliwa.

¹¹ Andzhakunyana, vanhwanyana lavan'wana vafika na vona, vaku: ‘Hosi, Hosi, hipfulele!’

¹² Kambe avahlamula, aku: ‘Nitiyisile nili ka n'wina: Animitivi.’”

¹³ Yesu atlhela aku: “Lavelelani ke, hikuva siku amiritivi, na wona nkarhi amiwutivi.”

Ta xifaniso xa titalanta

¹⁴ Hikuva lesvi svifana ni munhu lweyi alavaka kuteka riyendzo. Avitana vatirhi va yena, aveka rifuwo ra yena mavokweni ya vona.

¹⁵ Mun'we amunyika titalanta ta ntlhanu, mun'wana amunyika titalanta timbirhi, mun'wana amunyika talanta yin'we; mun'wana ni mun'wana anyikiwa hi kuringana matimba ya yena; kutani n'winyi wa munti ayendzela kule.

¹⁶ Lweyi anyikiweke titalanta ta ntlhanu, ahantla ayatibindzulisa, kutani akuma tin'wana ta ntlhanu.

¹⁷ Na yena lweyi anyikiweke titalanta timbirhi, ayatibindzulisa, kutani akuma tin'wana timbirhi.

¹⁸ Kambe lweyi aanyikiwile talanta yin'we ayacela hansi, acelela male ya n'winyi wa yena.

¹⁹ Ndzhaku ka masiku lawa yotala, n'winyi wa vatirhi lava avuya, kutani akamba tikonta na svona.

²⁰ “Lweyi aanyikiwile titalanta ta ntlhanu, atisa tin'wana ta ntlhanu aku: ‘Hosi, uninyikile titalanta ta ntlhanu; vona, nitibindzulisile nikuma tin'wanyana ta ntlhanu.’”

²¹ “Hosi ya yena yiku ka yena: ‘Hi svona mutirhi lwenene, lweyi atshembekeke; utshembekile ka svilo svingali svingani, nitakuveka kuva mulanguteli wa lesvotala; nghena kutsakeni ka hosi ya wena.’”

²² “Kutani lweyi aanyikiwile titalanta timbirhi, aku: ‘Hosi, uninyikile titalanta timbirhi; vona, nitibindzulisile nikuma tin'wanyana timbirhi.’”

²³ “Hosi ya yena yiku ka yena: ‘Hi svona mutirhi lwenene, lweyi atshembekeke; utshembekile ka svilo svingali svingani, nitakuveka kuva mulanguteli wa svilo lesvotala; nghena kutsakeni ka hosi ya wena.’”

²⁴ “Lweyi aanyikiwile talanta yin'we, na yena ata, aku: ‘Hosi, nitivile lesvaku u munhu wa kunonon'hwa; utshovela laha ungabzalangiki, uhlengeleta laha ungabzalangiki mbewu kona;

²⁵ hi kolaho nichavile, kutani niyile niyacelela talanta ya wena misaveni; vona, xahali xisvosvo xilo xa wena.’”

²⁶ Hosi ya yena yimuhlamula yiku: “‘Mutirhi lweyi wa lunya, wololoha, awusvitiva lesvaku nitshovela laha ningabzalangiki kona, ni lesvaku nihlengeleta laha ningahaxangiki mbewu kona!’”

²⁷ Loko svilitano, awufanelile kuva uvekile male ya mina ka vabindzulisi, kutani loko nifika, anitateka xilo xa mina svin'we ni bindzu rakona.

²⁸ Svosvi-ke, mutekeleni talanta, minyika lweyi anga ni titalanta ta khume.

²⁹ Hikuva kutanyikiwa mani na mani lweyi anga ni xanchumu, kutani ava ni lesvotala; kambe lweyi angaliki na nchumu, atatekeliwa ni lexi anga na xona.

³⁰ Loko ali xitirhi lexi, xokala xingapfuni nchumu, xicukumeteni handle munyameni; kona kutava ni minkosi, ni kuketsela ka matinyo.

Ta tinyempfu ni timbuti

³¹ Siku leri N'wana-wa-Munhu angatata hi kutwala ka yena, na tintsumi hinkwatu tili na yena, atatshamisa xiluvelweni xa kutwala ka yena.

³² Kutani vanhu va matiko hinkwawu vatahlengeletiwa mahlweni ka yena; atahlawula van'we asiya van'wana, kufanana ni mubzisi loko ahlawula tinyempfu xikarhi ka timbuti.

³³ Ataveka tinyempfu vokweni ra yena ra xinene, timbuti tona ka leri ra ximantsi.

³⁴ Hilaha Hosi yingatabzela lavanga vokweni ra yona ra xinene yiku: “‘Tanani n'wina lavakatekisiweke hi Tatana wa mina, yamukelani Mfumu lowungalungiseliwa n'wina hi mpfhuka misava yitumbuluka;

³⁵ hikuva anili ni ndlala, kutani minifihlutile; anili ni torha, minisiyele ninwa; anili muluveli, minirhurhelile;

³⁶ anipfumala svoyambala, miniyambexile; anivabza, minipfuxelile; anili jele, mitile mitanipfuxela.’”

³⁷ Hikona lavalulameke vangatahlamula, vaku: “‘Hosi, hitshama hikuvona kwihi na uli ni ndlala, kutani hikufihluta, kumbe na uli ni torha, hikunyika mati unwa ke?

³⁸ Hikuvone kwihi na uli muyendzi, hiva hikurhurhela, kumbe na upfumala svoyambala, hikuyambexa ke?

³⁹ Hikuvone kwihi na uvabza, kumbe na uli jele, kutani hita hitakupfuxela ke?’”

⁴⁰ “Hosi yitavahlamula, yiku: ‘Nitiyisile nili ka n'wina, lokomitshama misviyendla svilo lesvi ka mun'we wa vamakwerhu lavatsongo lava, misviyendlele mina.’”

⁴¹ “Kutani Hosi yitabzela lavanga vokweni ra yona ra ximantsi yiku: ‘Sukani ka mina, n'wina lavarhukiweke; miya ndzilweni lowungatimekiki, lowulungiseliweke Diyavulosi ni tintsumi ta yena;

⁴² hikuva anili ni ndlala, aminifihlutanga; anili ni torha, amininyikanga ninwa;

⁴³ anili muluveli, aminirhurhelanga; anipfumala svoyambala, aminiyambexanga; anili kuvabzeni ni le jele, amitanga mitanipfuxela.’”

⁴⁴ “Hilaha na vona vangatahlamula, vaku: ‘Hosi, hitshama hikuvona kwihi na uli ni ndlala, kumbe na uvabza, kumbe na uli ni torha, kumbe na wuli muyendzi, kumbe na wupfumala svoyambala, kumbe na uli jele, kutani hingakupfuni ke?’

⁴⁵ Kutani Hosi yitavahlamula, yiku: ‘Nitiyisile nili ka n'wina: Loko mingayendlelanga mun'we wa lavatsongo lava, na mina aminiyendlelanga.’

⁴⁶ Kutani volavo vataya kukhatisiweni lokungaheliki, kambe lavolulama vataya vuton'wini lebzingaheliki.”