Matewu 24 - Testamente Leyimpsha Xichangana

Ta svikombiso sva makumu ya tinguva

¹ Loko Yesu ali karhi ahuma hi le Tempeleni afamba, vajondzisiwa vata ka yena vamukomba sviyenge sva Tempele.

² Kambe Yesu aku ka vona: “Xana masvivona svilo lesvi hinkwasvu? Nitiyisile nili ka n'wina: Akungasali ribze henhla ka ribze rin'wana leri ringatakala ringahirimuxiwi.”

Ta masungulu ya mahlomulu

³ Kuteloko atshamile Ntshaveni ya Maolivhera vajondzisiwa vata ka yena tlhelweni, vaku: “Hibzele: Xana timhaka leti titahumelela nkarhi wihi ke? Xana xikombiso xa kuvuya ka wena ni xa kuhela ka minkarhi xitava xihi ke?”

⁴ Yesu avahlamula aku: Tivoneleni lesvaku mingatshuki mikanganyisiwa hi munhu.

⁵ “Hikuva lavotala vatata hi vito ra mina, mun'wana ni mun'wana aku: ‘Hi mina Kriste hi ntshima’, kutani vatakanganyisa lavotala.”

⁶ Mitatwa huwa ya tinyimpi ni mahungundlela ya tinyimpi; tivoneleni lesvaku mingadzukisiwi, hikuva svosvo svifanela kuhumelela, kambe ahi wona makumu.

⁷ Tiko rin'wana ritapfukela tiko rin'wanyana, mfumu wun'wanyana wutalwa ni mfumu wun'wanyana; kutava ni tindlala, ni kutsekatseka ka misava matlhelweni lawa yotala.

⁸ Kambe, svilo lesvi hinkwasvu i masungulu ya mahlomulu ntsena.

⁹ Nkarhini wolowo vataminyiketa akuxanisiweni, vamidlaya; mitavengiwa hi vanhu va matiko hinkwawu hikolaho ka vito ra mina.

¹⁰ Nkarhini wolowo, lavotala vatakhunguvanyeka; vatahehlana hi xivona, mun'we atavenga mun'wana.

¹¹ Kutahumelela vaprofeta va mavunhwa lavotala, vatakanganyisa vanhu lavanyingi.

¹² Kutani rirhandzu ra lavotala ritasungula kutitimela, hikuva kuhomboloka kutava kuyandzile.

¹³ Kambe lweyi angatatiyisela kufika makumu, hi yena lweyi angataponisiwa.

¹⁴ Kutani Evhangeli leyi ya Mfumu yitachumayeliwa misaveni hinkwayu, tani hi vumboni ka vanhu va matiko hinkwawu; kutani hi kona makumu mangatafika.

Ta kuxaniseka lokukulu

¹⁵ Xilesvo, loko mivona xilo xa manyala lexiwonhetelaka lexivuliweke hi muprofeta Daniyele, xili ndhawini leyokwetsima, lweyi ahlayaka aatwisise,

¹⁶ lavanga Yudeya avatsutsumele tintshaveni;

¹⁷ lweyi angahenhla ka yindlo angatshuki axika kuyateka lesvinga ndlwini ya yena

¹⁸ nasvona lweyi anga masin'wini, angatshuki atlhelela kaya kuyateka mpahla ya yena.

¹⁹ Vatava ni khombo vavasati lavatikeke ni lavanyan'wisaka ka masiku wolawo.

²⁰ Khongelani lesvaku kubaleka ka n'wina kungahumeleli hi vuxika, hambi kuli hi siku ra Savata,

²¹ hikuva nhlomulu wutava lowukulu nkarhini wolowo; nhlomulu lowotano awusiva kona hi mpfhuka misava yitumbulukile kutafika namuntlha, nasvona awungahavi kona ni siku ni rin'we.

²² Loko masiku wolawo amangahungutiwanga, akungatapona munhu, kambe hikolaho ka vahlawuliwa va Xikwembu, masiku yakona matahunguliwa.

²³ “Nkarhini wolowo, loko munhu amibzela aku: ‘Vonani, Kriste hi lweyi!’ Kumbe: ‘Hi lwiya!’ Mingatshukeni mipfumela.”

²⁴ Hikuva kutahumelela va kriste va mavunhwa, ni vaprofeta va mavunhwa, vatayendla mahlori lamakulu ni svihlamaliso, kukanganyisa hambi valivona vahlawuliwa va Xikwembu, loko svikoteka.

²⁵ “Masvivo, nimitlharihisa ka timhaka leti, tingasihumelela;

²⁶ hi kolaho, loko vaku ka n'wina; ‘Vonani, a le mananga le!’ Mingayeneni kona; kumbe loko vaku: ‘Vonani, lomu ndlwini!’ Mingasvipfumeleni svosvo.”

²⁷ Hikuva kukotisa lesvi kuhatima kusukelaka avuxeni kuyafika vupelajambu, N'wana-wa-Munhu atayendlisa xisvosvo akuvuyeni ka yena.

²⁸ Laha ntsumbu wunga kona, hilaha makoti mangatahlengeletana kona.

Ta kuhumelela ka N'wana-wa-Munhu

²⁹ Hi nomo-lo loko nhlomulu wa masiku wolawo wutava wuhelile, “‘jambu ritahundzuka ra ntima, ni n'weti awungahavoningi; tinyeleti titawa hi le tilweni, ni matimba ya le matilweni matatsekatsekisiwa.’”

³⁰ Hikona xikombiso xa N'wana-wa-Munhu xingatavoneka tilweni; vanhu vatinxakaxaka ni svib'ongo hinkwasvu sva la misaveni vataba nkosi, kutani vatavona N'wana-wa-Munhu ata hi marefu ya le tilweni, hi matimba ni kutwala lokukulu.

³¹ Hi mpfumawulu lowukulu wa mhalamhala, atarhumela tintsumi ta yena; titahlengeleta vahlawuliwa va yena, vahuma matlhelweni ya mune ya misava, kusukela amakun'wini man'wana ya tilo kuyafika ka laman'wana.

Ta jondzo ya nkuwa

³² Jondzani lesvi hi nkuwa: Loko marhavi ya wona masungula kuwolova, ni loko matluka ya wona mahluka, mitiva lesvaku malanga ma le kusuhi.

³³ Hi mukhuva wolowo, loko mivona svilo lesvi hinkwasvu, tivani lesvaku nkarhi wu le kusuhi, se wu le nyangweni.

³⁴ Nitiyisile nili ka n'wina: Rixaka leri ringakala ringahundzi, kungasihumelela svilo lesvi hinkwasvu.

³⁵ Tilo ni misava svitahundza, kambe marito ya mina mangakala mangahundzi.

Ta kutiva siku ni nkarhi

³⁶ Loko rili siku rakona ni nkarhi wakona, aku na lweyi asvitivaka, hambi tili tintsumi ta le matilweni, hambi ali N'wana; kambe, svitiviwa ntsena hi Tatana.

³⁷ Kuvuya ka N'wana-wa-Munhu kutafana ni lesvi svihumeleleke masikwini ya Nowa.

³⁸ Hikuva masikwini wolawo, loko ndhambhi yingasiva kona, vanhu avali kujeni, vanwa, vachada ni kuchadisiwa, kukondza kufika siku leri Nowa angheneke ngalaweni ha rona;

³⁹ avangatwisisi nchumu kukondza ndhambi yifika, kutani yivakhukhuza hinkwavu. Svitava tano ni le kuvuyeni ka N'wana-wa-Munhu.

⁴⁰ Nkarhini wolowo, ka vanhu vambirhi lavangatava masin'wini, kutatekiwa mun'we, mun'wana asiyiwa;

⁴¹ ka vavasati vambirhi lavangatava kusileni, kutatekiwa mun'we, mun'wana asiyiwa.

⁴² Hitekani ke, hikuva amitivi siku leri Hosi ya n'wina yingatata ha rona.

⁴³ Kambe twisisani lesvi: Loko ongi n'winyi wa munti wawutiva nkarhi wa vusiku lowu muyivi angatata ha wona, aatahiteka, angatshiki munti wa yena wupfhanyiwa.

⁴⁴ Hikolaho na n'wina, tshamani na milungile, hikuva N'wana-wa-Munhu atata hi nkarhi lowu mingawupimiseliki.

Ta mutirhi leyi atshembekeke ni lweyi angatshembekangiki

⁴⁵ Xana i mani mutirhi lweyi atshembekeke, ni kutlhariha, lweyi n'winyi wa yena amuvekeke kuhlayisa vatirhikulobze va munti, avaphamela svakuja hi nkarhi wakona?

⁴⁶ Kukatekile mutirhi lweyi angatakumiwa na ayendlisa xisvosvo, siku leri n'winyi wa yena angatavuya ha rona.

⁴⁷ Nitiyisile nili ka n'wina: Atavekiwa kuva mulanguteli wa rifuwo hinkwaru ra n'winyi wa yena.

⁴⁸ “Kambe loko mutirhi yelweyo ali lweyi wobiha, atapimisa mbilwini ya yena aku: ‘Hosi ya mina yitahlwela kuvuya’,

⁴⁹ kutani asungula kuba vatirhikulobze, aja, anwa ni svidakwa.”

⁵⁰ Kasi hosi ya yena yitavuya, hi siku leri mutirhi lweyi angapimisiki lesvaku yitavuya ha rona, ni hi nkarhi lowu angawutiviki;

⁵¹ kutani hosi ya mutirhi lweyi yitamuba svinene, yimucukumeta svin'we ni vakanganyisi, laha kungatava ni minkosi, ni kuketsela ka matinyo.