Matewu 23 - Testamente Leyimpsha Xichangana

Ta Yesu loko asandza Vatsali ni Vafarisi

¹ Hi loko Yesu abzela xitshungu ni vajondzisiwa va yena, aku:

² “Vatsali ni Vafarisi vatshamile xitshan'wini xa Moxe;

³ hi kolaho, yendlani hinkwasvu lesvi vamibzelaka svona, misvihlayisa, kambe mingaringiseleni lesvi vasviyendlaka, hikuva vasvivula, kambe avasviyendli.

⁴ Vaboha mindzhwalu leyotika, vayirhwexa makatleni ya vanhu, kasi vona avalavi ni kuyitsekatsekisa hi ritiho.

⁵ Mintirho ya vona hinkwayu, vayitirha lesvaku vatavoniwa hi vanhu; hikuva vayanamisa atifilaktera ta vona, valehisa ni makumu ya sviyambalu ya vona;

⁶ varhandza kutshama lomu kochaviseka aminkhubzeni, vahlawula ni svitshamu lesvinene masinagogeni;

⁷ vatsakela kuxewetiwa hi vajondzi mintsendzeleni, ni kuvitaniwa hi vanhu vaku: ‘Mujondzisi.’

⁸ “Loko mili n'wina, mingatshukeni mitivitanisa hi vito ra ‘Mujondzisi’, hikuva Mujondzisi wa n'wina i mun'we ntsena; n'wina hinkwenu mi vamakwavu.

⁹ Mingatshukeni mivitana munhu wa laha misaveni, miku, i ‘Tatana wa n'wina’, hikuva Tatana wa n'wina i mun'we ntsena, lweyi anga tilweni.

¹⁰ Nasvona mingasindziseni kuvitaniwa ‘Varhangeli’, hikuva Murhangeli wa n'wina i mun'we ntsena, anga yena Kriste.

¹¹ Kambe lwenkulu ka n'wina atava mutirheli wa n'wina,

¹² hikuva mani na mani lweyi atikulisaka, atatsongahatiwa; kutani mani na mani lweyi atitsongahataka, atakulisiwa.

Ta Yesu loko asola Vafarisi

¹³ “Yowee n'wina Vatsali ni Vafarisi, hikuva mi vakanganyisi! Hikuva mipfalela vanhu kunghena Mfun'wini wa matilo. N'wina amingheni ka wona, nasvona lavaringetaka kunghena amivatshiki.

¹⁴ [ Yowee n'wina Vatsali ni Vafarisi, hikuva mi vakanganyisi! Mihlasela vafelakazi minjangwini ya vona, na mitivhikhela hi kuyendla svikhongelo lesvoleha; hi kolaho mitayavanyisiwa hi kuyavanyisa loku kukarhataka.]

¹⁵ “Yowee, n'wina Vatsali ni Vafarisi, hikuva mi vakanganyisi! Hikuva mirhendzeleka malwandle ni le misaveni, lesvaku mitakuma mujondzisiwa mun'we ntsena; kutani loko mimukumile, mimuyendla lweyi afaneliwaka hi Tihele, kuphindha kambirhi kutlula n'wina.

¹⁶ “Yowee n'wina vafambisi lavofa mahlo! Hikuva mili: ‘Loko munhu ahlambanya hi Tempele, asvi na mhaka; kambe loko ahlambanya hi golidi ya Tempele, atibohile hi kuhlambanya ka yena.’

¹⁷ N'wina svihunguki ni lavavofa mahlo! Lexikulu hi xihi xana: i golidi, kumbe i Tempele leyinga yona yikwetsimisaka golidi xana?

¹⁸ Nasvona mili: ‘Loko munhu ahlambanya hi alitari, asvi na mhaka; kambe loko ahlambanya hi nyiko leyinga alitarini, atibohile hi kuhlambanya ka yena.’

¹⁹ N'wina svihunguki ni lavofa mahlo! Lexikulu hi xihi xana: i mhamba, kumbe i alitari, leyinga yona yikwetsimisaka mhamba xana?

²⁰ Loko svilitano, lweyi ahlambanyaka hi alitari, ahlambanya ha yona kupatsa ni hinkwasvu lesvinga henhla ka yona;

²¹ lweyi ahlambanyaka hi Tempele, ahlambanya hi yona kupatsa ni Lweyi atshamaka ka yona;

²² nasvona lweyi ahlambanyaka hi tilo, ahlambanya hi xiluvelo xa Xikwembu kupatsa ni Lweyi atshameke henhla ka xona.

²³ “Yowee n'wina Vatsali ni Vafarisi, hikuva mi vakanganyisi! Mihumesa sva vukhume sva ximbowambowana, ni sva aneta, ni sva kumini, kambe ami na mhaka ni lesvikulu, ni sva risima ka Nawu, kunga kululama, ni timpsalu, ni kupfumela; kasi amifanelile kurhanga hi svilo lesvi, na mingasiyanga lesvin'wana.

²⁴ N'wina vafambisi lavanga svifamahlo, miwungula nsuna, kambe miminta kamela!

²⁵ “Yowee n'wina Vatsali ni Vafarisi, hikuva mi vakanganyisi! Mihlampsa ndzheko ni nkambana hi le handle ka svona, kasi ndzeni ka svona svitele hi vuphangi ni vubihi hinkwabzu.

²⁶ Mufarisi wa kufa mahlo! Rhanga hi kuhlampsa ndzheko ni nkambana hi le ndzeni ka svona kubasa, hi kona ni le handle kungatahlampseka kubasa.

²⁷ “Mi ni khombo n'wina Vatsali ni Vafarisi, hikuva mi vakanganyisi! Mifana ni masirha lawa mapendiweke hi muvala wobasa, lawa mavonekaka na masasekile hi le handle, kasi ndzeni ka wona kutele hi marhambu ya vafi ni hinkwasvu sva chaka.

²⁸ Hi mukhuva wolowo vanhu vamivona na mili lava valulameke handle, kasi ndzeni, mitele hi vukanganyisi ni vubihi.

²⁹ “Yowee n'wina Vatsali ni Vafarisi, hikuva mi vakanganyisi! Miyaka masirha ya vaprofeta, misasekisa hi maribze yovatsundzuka ha wona lava volulama, kutani mivula miku:

³⁰ ‘Loko ongi hihanyile minkarhini ya vatatana va hina, ina hingatwanananga na vona kuhalata ngati ya vaprofeta.’

³¹ Hi mukhuva wolowo, mitivula ha n'wexe lesvaku mi vana valava vangadlaya vaprofeta.

³² Hikolaho-ke, hetisisani mpimo wa kujoha ka vatatana va n'wina loku vakusunguleke.

³³ N'wina tinyoka, rixaka ra svipshahla, xana mitaponisa kuyini kuyavanyiseliwa Tihele ke?

³⁴ “Xilesvo, masvivo, nahamirhumela vaprofeta, tintlhari, ni Vatsali; mitadlaya van'we va vona, van'wana mitava vamba svihambanwini; mitaba van'wana va vona masinagogeni ya n'wina, mivahlongolisa vasuka doropeni rin'we, vaya ka rin'wanyana;

³⁵ lesvaku angati ya lava volulama leyi yingahalatiwa misaveni yiva henhla ka n'wina, kusukela kudlaweni ka Abele lweyi aalulamile, kuyafika kudlaweni ka Zakariya n'wana Barakiya, lweyi mimudlayeke xikarhi ka Tempele ni alitari.

³⁶ Nitiyisile nili ka n'wina: Svilo lesvi hinkwasvu svitawela rixaka leri.

Ta Yesu loko arilela Yerusalema

³⁷ “Yerusalema, Yerusalema, wena lweyi udlayaka vaprofeta, lweyi ukhandlaka hi maribze lavarhumiweke ka wena, i kangani ninavelile kuhlengeleta vana va wena, kukotisa huku loko yihlengeleta sviciwana sva yona hansi ka timpapa ta yona, kambe awusvilavanga!

³⁸ Vonani, munti wa n'wina wutasala wuli rhumbi.

³⁹ Nasvona namitivisa lesvaku kusukela svosvi, amingahanivoni, kukondza kufika siku leri mingataku: ‘Akukhensiwe, lweyi ata ka hi vito ra Hosi.’”