Matewu 22 - Testamente Leyimpsha Xichangana

Ta xifaniso xa nkhuvu wa vukati

¹ Yesu atlhela avulavula na vona hi svifaniso, aku:

² Mfumu wa matilo wufana ni hosi leyiyendleleke n'wana wa yona nkhuvo wa vukati.

³ Yirhuma svitirhi sva yona kuyavitana lavangarhambiwa nkhubzeni, kambe vona vayala kuta.

⁴ Yitlela yirhuma svitirhi svin'wana, yiku: “‘Bzelani lavarhambiweke, miku: Masvivo, nilungisile svakuja; tihomu ni svifuyu sva mina svonona svitlhaviwile; svilo hinkwasvu svilungisiwile, tanani nkhubzini.’”

⁵ Kambe varhambiwa avakhatalanga ha svona; vatifambela, mun'we masin'wini ya yena, mun'wana kuxaviseni ka svilo sva yena;

⁶ van'wana vakhoma svitirhi sva hosi, vasviyendlela tihanyi, vasvidlaya.

⁷ Hi loko hosi yikariha, yirhuma mab'uthu ya yona kuyalovisa vadlayi volavo ni kuhisa doropa ra vona.

⁸ Kutani yibzela svitirhi sva yona, yiku: “‘Nkhuvu wa vukati wulungisiwile, kambe lavarhambiweke awungavafanelanga.

⁹ Svosvi yanani mahlanganwini ya tindlela, miyarhamba hinkwavu lava mingatavakuma, vata nkhubzini.’”

¹⁰ Kutani svitirhi svosvo svihuma, sviya tindleleni, svihlengeleta hinkwavu lava svivakumeke, lavobiha ni lavolulama, kutani yindlo ya nkhuvu yitala hi vanhu lavarhambiweke.

¹¹ “Kuteloko hosi yinghenile kutavona lavarhambiweke, yivona munhu lweyi aangayambalanga xiyambalu xa muchado;

¹² kutani yiku ka yena: ‘Nakulorhi, unghenise kuyini laha, na ungali na xiyambalu xa muchado?’ Yena amiyela aku tititi.

¹³ Hi loko hosi yiku ka svitirhi: ‘Muboheni milenge ni mavoko, mimucukumeta handle munyameni laha kungatava ni nkosi ni kuketsela ka matinyo.’”

¹⁴ Kutani Yesu aku: “Lava vavitaniwaka i vanyingi, kambe lavahlawuliwaka i vatsongo.”

Ta kuhumesela Khezari rhesa

¹⁵ Kutani Vafarisi vasuka, vayatshama valuka makungu, kuvona hilaha vangamuphasaka hakona hi marito.

¹⁶ Kutani varhuma vajondzisiwa va vona ni va ntlawa wa va ka Heroda, vayaku: “Mujondzisi, hasvitiva lesvaku uvula lesvitiyeke, ni lesvaku ujondzisa ndlela ya Xikwembu mayelanu ni ntiyiso, na ungalandzi mavonela ya vanhu, hikuva awuyi hi nghohe.

¹⁷ Hibzele mavonela ya wena mhakeni leyi: Xana svafanela kuhumesela Khezari rhesa, kumbe asvifaneli ke?”

¹⁸ Kambe, Yesu hi kutiva vubihi bza vona, aku: “Miniringela yini, n'wina vakanganyisi?

¹⁹ Nikombeni male ya rhesa.” Kutani vamutisela male ya nsimbi ya denari.

²⁰ Aku ka vona: “Xifaniso lexi i xa mani ke? Ni vito leri i ra mani ke?”

²¹ Vamuhlamula vaku: “I sva Khezari.” Kutani aku ka vona: “Nyikani Khezari lesvinga sva Khezari, ni Xikwembu lesvinga sva Xikwembu.”

²² Loko vatwa svosvo, vahlamala, kutani vamusiya vasuka vafamba.

Ta muchado ndzhaku ka rifu

²³ Hi siku rolero, van'wana va Vasaduki, vanga vanhu lavavulaka lesvaku vafi avapfuki, vata ka Yesu, vafika vamuvutisa, vaku:

²⁴ “Mujondzisi, Moxe ate: ‘Loko munhu afa angali na vana, makwavu atateka nsati wa mufi, apfuxa njangu wa makwavu.’

²⁵ Svosvi ku ni mhaka leyi: Akuli ni vamakwavu va ntlhanu ni vambirhi xikarhi ka hina; lweyi wa mativula aatekile nsati, kutani afa, na angali na vana; hikolaho ka svona, ndzisana yisala ni nsati wa yena.

²⁶ Sviyendlisa svosvo ni ka makwavu wa mufi wa vumbirhi, ni ka lweyi wa vunharhu, kuyafika ka lweyi wa vuntlhanu ni vambirhi.

²⁷ Ndzhaku ka vona hinkwavu, lweyi wansati na yena afa.

²⁸ Lesvi lava va ntlhanu ni vambirhi hinkwavu vangava vanuna va lweyi wansati, xana hi siku ra kupfuka kufeni, atava nsati wa mani xikarhi ka vona ke?”

²⁹ Yesu avahlamula, aku: “Milahlekile ngopfu, hikuva amitivi Matsalwa ni matimba ya Xikwembu.

³⁰ Hikuva nkarhini wa kupfuka kufeni, vanhu avahachadi, hambi kuli kutekiwa, kambe vatafana ni tintsumi ta le tilweni.

³¹ Loko kuli kupfuka ka vafi, xana amihlayanga lesvi Xikwembu xingamitivisa svona, loko xiku:

³² ‘Hi mina Xikwembu xa Abrahamu, ni Xikwembu xa Izaki, ni Xikwembu xa Yakobe.’ Xilesvo, xona ahi Xikwembu xa lavafeke, kambe i Xikwembu xa lavahanyaka.”

³³ Loko xitshungu xitwa svosvo, xihlamala ngopfu hi kujondzisa ka yena.

Ta Nawu lowukulu

³⁴ Loko Vafarisi vatwile lesvaku Yesu amiyetile Vasaduki, vahlengeletana ndhawini yin'we.

³⁵ Kutani mun'we wa vona lweyi aali mujondzisi wa nawu, aringa Yesu hi kumuvutisa, aku:

³⁶ “Mujondzisi, xana Nawu lowukulu Minaweni hi wihi ke?”

³⁷ Yesu aku ka yena: “Hi lowu wunge: ‘Rhandza Hosi Xikwembu xa wena, hi mbilu ya wena hinkwayu, ni moya wa wena hinkwawu, ni kuyanakanya ka wena hinkwaku.’

³⁸ Lowu hi wona nawu lowukulu, lowu worhanga;

³⁹ kutani lowu wa vumbirhi, lowufanaka na wona, hi lowu wunge: ‘Rhandza munhukuloni, kukota loko utirhandza.’

⁴⁰ Milawu leyimbirhi i tshinya ra Milawu hinkwayu ni marito ya Vaprofeta.”

Ta Yesu, n'wana Davhida

⁴¹ Yesu avutisa Vafarisi lavahlengeletaneke,

⁴² aku: “Xana mipimisa yini ha Kriste ke? I n'wana wa mani xana?” Vamuhlamula vaku: “I n'wana Davhida.”

⁴³ Aku ka vona: “Loko svilitano, hikolaho ka yini Davhida lweyi avulavulaka hi Moya, amuvitana Hosi, loko aku:

⁴⁴ “‘Hosi yite ka Hosi ya mina: Tshama vokweni ra mina ra xinene, nikondza niveka valala va wena hansi ka minkondzo ya wena.’”

⁴⁵ “Hikolaho-ke, loko Davhida amuvitana Hosi, xana angava n'wana wa yena hi ndlela yihi ke?”

⁴⁶ Akuvanga ni mun'we lweyi atiyeke kumuhlamula rito rili rin'we ntsena; na svona, kusukela nkarhini wolowo, akahavanga ni munhu lweyi angatiya nhlana kumuvutisa xivutiso xili xin'we.