Matewu 21 - Testamente Leyimpsha Xichangana

Ta Yesu loko anghena hi vunhenha doropeni ra Yerusalema

¹ Kuteloko vatshinelela Yerusalema, vafika Betfaje, Ntshaveni ya Maolivhera. Kutani Yesu arhuma vajondzisiwa vambirhi,

² aku ka vona: “Yanani xidoropanini lexivonekaka lahaya, mitahantla mikuma mbongolo ya mpsele leyibohiweke, na yili ni ximbongolwana xa yona; mititshunxa, mita na tona halenu ka mina.

³ Loko munhu amivutisa xokarhi, mitaku: ‘Hosi yatilava.’ Kutani atahantla aminyiketa tona.”

⁴ Svilo lesvi sviyendliwile lesvaku kuhetiseka rito ra muprofeta lweyi angaku:

⁵ “Bzelani va le Siyoni, miku: ‘Hosi ya n'wina hi leyi yata!’ Yita na yirhulile, Yigadile mbongolo Leyinga ni ximbongolwana, n'wana wa yona.”

⁶ Vajondzisiwa vaya, vayayendla hilaha Yesu angavabzela hakona;

⁷ vatisa mbongolo ni ximbongolwana xakona, vakapeka tinguvu ta vona henhla ka tona, kutani Yesu axigada.

⁸ Kutani xitshungu lexikulu xiyandlala tinguvu ta xona ndleleni, van'wana vatshova marhavi ya minsinya, vayandlala ndleleni.

⁹ Xitshungu lexi ximurhangeleke mahlweni ni lexi aximulandzela hi le ndzhaku, xihuwelela xiku: “Hozana ka N'wana Davhida! Akudzunisiwe lweyi ataka hi vito ra Hosi! Hozana matilweni ya le henhlahenhla!”

Ta kubasisiwa ka Tempele

¹⁰ Kuteloko Yesu anghenile Yerusalema, vanhu hinkwavu va doropa vayimayimeka, vaku: “Munhu lweyi, i mani xana?”

¹¹ Kutani xitshungu xihlamula xiku: “Munhu lweyi i Yesu, muprofeta lweyi ahumaka Nazareta wa Galileya.”

¹² Kutani Yesu anghena Tempeleni, ahlongola hinkwavu lava vaxavisaka ni lava vaxavaka Tempeleni, vahumela handle; awisetela mimeza ni svitshamu sva lava vaxavisaka svituvana,

¹³ aku ka vona: “Kutsaliwile lesvi: ‘Yindlo ya mina yitavuliwa yindlo ya xikhongelo’, kasi n'wina miyiyendla mhakwa wotumbela vayivi.”

¹⁴ “Svifamahlo ni lavokhwita vata ka Yesu Tempeleni, kutani avahanyisa.”

¹⁵ Kambe Vaprista lavakulu ni Vatsali vahlundzuka ngopfu loko vavona mahlori lawa amayendlaka, ni loko vatwa vatsongwana na vali karhi vahuwelela Tempeleni vaku: “Hozana ka N'wana Davhida!”

¹⁶ Hi loko vaku ka yena: “Xana wasvitwa lesvi vatsongwana lava vasvivulaka ke?” Yesu aku ka vona: “Ina! Xana amisihlaya rito leringe: ‘Adzunisiwile hi ndlela leyohetiseka hi milomo ya vatsongwana ni ya svihlangi lesvi svahayan'waka’ ke?”

¹⁷ Kutani asuka avasiya, ahuma doropeni kuya Betaniya, laha angayetlela kona.

Ta nkuwa lowurhukiweke

¹⁸ Nimixo loko avuyela doropeni, atwa ndlala;

¹⁹ kutani avona nkuwa kusuhi ni ndlela; ahambuka aya ka wona, kambe angakumanga nchumu ka wona loko mangali matluka ntsena. Hi loko aku ka wona: “Kungahatshuki kupsaliwa mihandzu ni siku ni rin'we ka wena!” Hi nomo-lo, nkuwa wuwoma.

²⁰ Loko vajondzisiwa vasvivona, vahlamala vaku: “Xana nkuwa utekelise kuyini kuwoma ke?”

²¹ Yesu avahlamula aku: “Nitiyisile nili ka n'wina: Loko mili ni kupfumela mingakanakani, amingayendli ntsena lesviyendliweke ka nkuwa lowu, kambe ni loko miku ka ntshava leyi: ‘Suka, uyatihoxa lwandle!’ Svitayendleka;

²² na svona, hinkwasvu lesvi misvikombelaka hi kukhongela, loko mili ni kupfumela mitanyikiwa svona.”

Ta kukaneta matimba ya Yesu

²³ Kuteloko Yesu afikile Tempeleni, Vaprista lavakulu ni vakulukumba va tiko vata ka yena loko ali karhi ajondzisa, vaku ka yena: “Xana uyendla svilo lesvi hi matimba wahi ke? Nasvona matimba wolawo, unyikiwile hi mani xana?”

²⁴ Yesu avahlamula, aku: “Na mina, nitamivutisa xivutiso xin'we; loko minihlamula xona, hi kona na mina ningatamibzela lomu matimba lawa nitirhaka ha wona mahumaka kona.

²⁵ Xana kukhuvula ka Yohani akuhuma kwihi ke? Akuhuma tilweni, kumbe ka vanhu ke?” Vona vavulavulisana vaku: “Loko hiku: ‘Akuhuma tilweni’, ataku: ‘Loko svilitano, hikolaho ka yini mingapfumelanga ka yena ke?’

²⁶ Kambe loko hiku: ‘Akuhuma ka vanhu’, hichava xitshungu, hikuva hinkwavu vakholwa lesvaku Yohani aali muprofeta.”

²⁷ Kutani vahlamula Yesu, vaku: “Ahisvitivi!” Hi loko aku ka vona: Na mina, aningamibzeli lomu mahumaka kona matimba lawa nitirhaka ha wona.

Ta xifaniso xa vana vambirhi

²⁸ “Xana mili yini hi mhaka leyi? Munhu aali ni vana vambirhi; aya ka lweyi worhanga, aku: ‘N'wananga, yana uyatirha nsin'wini ya mina ya mvhinya namuntlha.’

²⁹ N'wana lweyi ahlamula aku: ‘Anilavi!’ Kambe ndzhaku asala atilaya, kutani aya.

³⁰ Tatana wa yena aya ka lweyi mun'wana, amubzelisa svosvo. Yena ahlamula aku: ‘Nitaya tatana!’ Kambe, angayi.

³¹ Xana ka vona lavambirhi, hi wihi lweyi angayendla kurhandza ka tatana wa yena ke?” Vaku ka yena: “Hilweyi worhanga.” Yesu aku ka vona: Nitiyisile nili ka n'wina: Vahakelisi va rhesa ni tinghwavana vamirhangela kunghena Mfun'wini wa Xikwembu.

³² Hikuva Yohani atile ka n'wina atamitivisa hi ta ndlela ya kululama, kambe amipfumelanga timhaka ta yena; kasi vahakelisi va rhesa ni tinghwavana, vona vapfumelile; kutani n'wina, hambi misvivonile, amitilayanga ni kupfumela amipfumelanga timhaka ta yena.

Xifaniso xa nsimu ya mvhinya ni varimi vobiha

³³ Yingisani xifaniso xin'wana: Akuli ni munumuzana mun'we lweyi aabzalile mvhinya nsin'wini ya yena; ayibiyela hi rithangu, acela ni xikamelo xokamela kona mihandzu, ayaka ni xihondzo; kutani alugarisela varimi vangali vangani, yena ateka riyendzo afamba.

³⁴ Loko nkarhi wakutshovela mihandzu wuli kusuhi, arhuma vatirheli va yena ka valugari, kuyateka mihandzu ya nsimu ya yena.

³⁵ Kutani valugari vakhoma vatirhi lava, vaba mun'we, mun'wana vamudlaya, lweyi mun'wana vamukhandla hi maribze.

³⁶ Atlhela arhuma vatirhi van'wana lava vatlulaka lavorhanga hi kutala, kambe na vona vayendliwa svofana ni lava vorhanga.

³⁷ “Ndzhaku ka svona arhuma n'wana wa yena ka vona, aku: ‘Vatachava n'wana wa mina.’”

³⁸ “Kambe loko valugari vavona n'wana lweyi, vabzelana vaku: ‘Majandzhaka hi lweyi! Tanani hi mudlaya, hiteka rifuwo ra yena.’”

³⁹ Kutani vamukhoma, vamuhumesa handle ka nsimu, kutani vamudlaya.

⁴⁰ Kutani loko n'winyi wa nsimu avuya, atayendla yini hi “valugari” volavo xana?

⁴¹ Vahlamula Yesu vaku: “Atavalovisa vanhu lavobiha vahela hinkwavu; nsimu ya mvhinya, atayilugarisela varimi van'wana lavangatamunyika mihandzu ya nsimu hi nguva yakona.”

⁴² Yesu aku ka vona: Xana amisitshama mihlaya, Matsalweni, mhaka leyi yinge: “ ‘Ribze leri vayaki vangariyala, hi rona ringayendliwa ribze lerikulu rotiyisa ha rona’, ke? ‘Svilo lesvi sviyendliwile hi Hosi, i mhaka leyihlamalisaka loko hiyivona hi mahlo ya hina!’”

⁴³ Hikolaho namibzela lesvaku mitatekeliwa Mfumu wa Xikwembu; kutani wutanyikiwa tiko rin'wana leringataveka mihandzu ya rona.

⁴⁴ “[Lweyi angatawela henhla ka ribze lero atapshandlaka; nasvona ritapshandlasa lweyi ringatamuwela henhla.]”

⁴⁵ Loko Vaprista lavakulu ni Vafarisi vatwa svifaniso lesvi sva Yesu, vativa lesvaku avula vona;

⁴⁶ kutani valava ndlela yomukhoma ha yona, kambe vachava xitshungu, hikuva axiku: “I muprofeta!”