Matewu 20 - Testamente Leyimpsha Xichangana

Ta Xifaniso xa vatirhi nsin'wini ya mvhinya

¹ Mfumu wa matilo wufana ni n'winyi wa munti lweyi apfukiseke ahuma kuyathola vatirhi, kuyatirha nsin'wini ya yena ya mvhinya.

² Kuteloko atwananile ni vatirhi lava lesvaku vatakuma denari yin'we, yinga hakelo ya siku, avarhuma vaya nsin'wini ya yena ya mvhinya

³ Atlhela ahuma loko kulava kuva nkarhi wa vunharhu nimixo, avona van'wana lava avali ntsendzeleni wa vuxaviselo bza doropa na vangatirhi nchumu;

⁴ aku ka vona: “ ‘Na n'wina, yanani nsin'wini ya mvhinya, nitaminyika lesvi svinga svona.’ ”

⁵ Kutani vaya. Atlhela ahuma loko kulava kuva nkarhi wa vuntlhanu na wun'we ni nkarhi wa vuntlhanu ni mune ayendlisa svosvo.

⁶ Kuteloko ahumile kambe kusuhi ni nkarhi wa vukhume ni wun'we avona van'wana na vayoyima, kutani aku ka vona: “‘Mitshamela yini siku hinkwaru mingatirhi nchumu xana?’”

⁷ Vamuhlamula vaku: “ ‘Hitshama, hikuva ahitholiwanga.’ Aku ka vona: ‘Na n'wina, fambani nsin'wini ya mvhinya nitaminyika lesvi svinga svona.’”

⁸ “Kutani loko svilava kuva vusiku n'winyi wa nsimu ya mvhinya aku ka muhlayisi wa svilo sva yena: ‘Vitana vatirhi, uvanyika hakelo ya vona; utasungula hi lava vangata ndzhaku, ugamesa hi lavangarhanga vatirha.’

⁹ Kutani lavangatholiwa kolomu ka nkarhi wa vukhume ni wun'we vata, mun'wana ni mun'wana akuma denari yin'we.

¹⁰ Kutani kutafika lavorhanga, vapimisa lesvaku vona vatahakeliwa kutlula van'wana; kambe mun'wana ni mun'wana wa vona akuma denari yin'we;

¹¹ loko vaholile, vangurangurela n'winyi wa munti,

¹² vaku: ‘Va le ndzhaku vatirhile wora rin'we ntsena, kambe uvaringanisile na hina hingakhukhumbisana ni siku hinkwaru, na hili karhi hitirha na hipsha hi mumu!’

¹³ Kambe yena ahlamula mun'we wa vona, aku: ‘Nakulorhi, anikukanganyisanga. Xana awutwanananga na mina kuhakeliwa denari yin'we ke?

¹⁴ Teka muholo wa wena lowu, ufamba; munhu lweyi angatholiwa ndzhaku, nirhandza kumuholela kufana na wena.

¹⁵ Xana anipfumeleliwi kuyendla lesvi nisvirhandzaka hi svilo sva mina ke? Kumbe vunene bza mina bzakuvilelisa xana? Kumbe unilanguta hi tihlo ropshuka hikuva mina nili munene xana?’”

¹⁶ Yesu atlhela aku: Hi mukhuva wolowo, valendzhaku vatava va le mahlweni, ni va le mahlweni vatava va le ndzhaku.

Ta Yesu loko ativisa ka vunharhu ta rifu ra yena

¹⁷ Loko Yesu ali karhi atlhantukela Yerusalema, ateka vajondzisiwa lava va khume ni vambirhi hi tlhelo, avulavula na vona loko vahali ndleleni, aku:

¹⁸ “Vonani, hitlhantukela Yerusalema, kutani N'wana-wa-Munhu atanyiketiwa ka Vaprista lavakulu ni ka Vatsali; vatamuyavanyisela rifu;

¹⁹ vatamunyiketa ka vamatiko lesvaku vona vatlanga hi yena, vamuba hi timpsika ni kumuvamba xihambanwini; kutani, hi siku ra vunharhu, atapfuka kufeni.”

Ta xikombelo xa Yakobe na Yohani

²⁰ Kutani nsati wa Zebedewu ata ni vana va yena vambirhi vaxinuna, akhinsamela Yesu akombela xanchumu ka yena.

²¹ Yesu aku ka yena: “Ulava yini xana?” Yena aku ka Yesu: “Tshembisa lesvaku vana lava vambirhi va mina vatatshama Mfun'wini wa wena, mun'we vokweni ra wena ra xinene, mun'wana ka leri ra ximantsi.”

²² Hi loko Yesu ahlamula aku: “Amixitivi lexi mikombelaka xona. Xana mingakota kunwela axinweleni lexi ningatanwela ka xona ke?” Vaku ka yena: “Hingasvikota.”

²³ Aku ka vona: “Hakunene mitanwela andzhekweni wa mina, kambe loko kuli kutshama vokweni ra mina ra xinene kumbe ra ximantsi, ahi mina ningaminyikaka svona, kambe i sva lava vangalungiseliwa svona hi Tatana wa mina.”

²⁴ Loko lava va khume vatwa mhaka leyi, vahlundzukela vamakwavu lava vambirhi.

²⁵ Hi loko Yesu avavitanela kusuhi na yena, aku ka vona: “Masvitiva lesvaku tihosi ta vamatiko tivafuma hi ntamu, na vona vakulukumba vavafuma hi matimba;

²⁶ svingatshuki sviva tano xikarhi ka n'wina, kambe mani na mani lweyi anavelaka kuva lwenkulu xikarhi ka n'wina, aave mutirhi wa n'wina;

²⁷ nasvona mani na mani lweyi anavelaka kuva wa le mahlweni xikarhi ka n'wina, aave xikarawa xa n'wina;

²⁸ tani hi lesvi N'wana-wa-Munhu angatelangiki kutirheliwa, kambe kutirhela van'wana ni kunyiketa vutomi bza yena kuponisa lavotala.”

Ta kuhanyisiwa ka svifamahlo svimbirhi

²⁹ Kakuloko vahuma Yeriko, xitshungu lexikulu xilandzelela Yesu.

³⁰ Kutani vanhu vambirhi vasvifamahlo avatshamile kusuhi ni ndlela; loko vatwa lesvaku i Yesu lweyi ahundzaka vahuwelela vaku: “Hosi, N'wana Davhida, hitwele vusiwana!”

³¹ Xitshungu xivatshinya lesvaku vamiyela, kambe vona vatlhela vahuwelela vaku: “Hosi, N'wana Davhida, hitwele vusiwana!”

³² Yesu ayima, avavitana, aku: “Milava lesvaku nimiyendlela yini xana?”

³³ Vaku ka yena: “Hosi, hilava lesvaku uhipfula mahlo!”

³⁴ Hi loko Yesu avatwela vusiwana, akhumba mahlo ya vona; hi nomo-lo vatlhela vavona, kutani vamulandza.