Matewu 17 - Testamente Leyimpsha Xichangana

Takuhundzuka ka nghohe ya Yesu

¹ Loko kuhundzile masiku ya ntlhanu ni rin'we, Yesu ateka Petrosi na Yakobe na Yohani makwavu wa Yakobe, aya na vona ntshaveni leyoleha na vali voxe.

² Kutani ahundzuka mahlweni ka vona; nghohe ya yena yivangama kufana ni jambu, nasvona sviyambalu sva yena svihundzuka lesvobasa, svivangama kukotisa kuvonakala.

³ Hi loko Moxe na Eliya vahumelela kolaho, vavulavula na yena.

⁴ Kutani Petrosi aku ka Yesu: “Hosi, svatsakisa kuva kola; loko usvirhandza, ningayaka mintsonga yinharhu kola, wun'we wa wena, wun'wanyana wa Moxe, wun'wanyana wa Eliya.”

⁵ Aku ahavulavula, refu lerovangama rihumelela, rivafunengeta; kutani kutwakala rito lerihumaka ka refu, riku: “Lweyi i N'wananga lweyi nimurhandzekaka, lweyi nimutsakelaka, muyingiseni!”

⁶ Loko vajondzisiwa vatwa rito lero, vawa hi svimombo, hi kuchava.

⁷ Kambe Yesu avatshinelela, avakhumba aku: “Sukanimiyima, mingachaveni!”

⁸ Loko vatlakusa mahlo, vavona Yesu na ali yexe, kungali na mun'wana kolaho.

⁹ Loko vahaxika hi le ntshaveni, Yesu avalerisa aku: “Mingatshukeni mibzela vanhu lesvi misvivoneke, kukondza N'wana-wa-Munhu atava apfukile kufeni.”

¹⁰ Kutani vajondzisiwa vamuvutisa, vaku: “Hikolaho ka yini Vatsali vavula lesvaku Eliya afanele kurhanga ata xana?”

¹¹ Avahlamula aku: “Kunene Eliya wata, kutani atatlhela alulamisa hinkwasvu.

¹² Kambe mina namibzela lesvaku Eliya atile, kambe avamutivanga; kutani vamuyendlile hinkwasvu lesvi vasvirhandzeke. Hi mukhuva wolowo, vatatwisa na yena N'wana-wa-Munhu kuvava.”

¹³ Hi loko vajondzisiwa vatwisisa lesvaku aavabzela hi ta Yohani Mukhuvuli.

Ta Yesu loko ahanyisa jaha leri arili ni dimoni

¹⁴ Kuteloko vafikile axitshungwini, munhu ata ka yena, atakhinsama, aku:

¹⁵ “Hosi, twela n'wana wa mina vusiwana, hikuva axanisiwa ngopfu hi vuvabzi bza n'weti; hakanyingi awela ndzilweni, ni le matini.

¹⁶ Nimutisile ka vajondzisiwa va wena, kambe vatsandzekile kumuhanyisa.”

¹⁷ Yesu ahlamula, aku: “Ha! Rixaka leringapfumeliki, lerohomboloka, nitava na n'wina kufika rini xana? Nitamixanisekela kufika kwihi ke? Mutiseni halenu.”

¹⁸ Hi loko Yesu akhahla dimoni, kutani dimoni rihuma ka lweyi wajaha; kusukela nkarhi wolowo jaha leriya riva rihanyile.

¹⁹ Kutani vajondzisiwa vata ka Yesu hi tlhelo, vaku ka yena: “Xana hina hitsandzekile ha yini kurihlongola ke?”

²⁰ Aku ka vona: “Hikolaho ka kupfumela kutsongo ka n'wina. Nitiyisile nili ka n'wina: Loko mili ni kupfumela loku kuringanaka ni ndzoho ya sinapi, mingaku ka ntshava leyi: ‘Suka laha uya lahaya!’ Kutani yitarhurha; kuhava lexi xingatamitsandza.

²¹ [Dimoni ra rixaka leri arihumi loko kungali hi kukhongela ni kutitsona svakuja.]”

Ta Yesu loko atlhela ativisa ta rifu ra yena

²² Loko vajondzisiwa vatlhele vahlangana Galileya, Yesu aku ka vona: “N'wana-wa-Munhu atanyiketiwa mavokweni ya vanhu;

²³ vatamudlaya, kambe atatlhela apfuka kufeni hi siku ra vunharhu.” Kutani vajondzisiwa vatala hi kuvaviseka lokukulu.

Ta Yesu loko arhesa

²⁴ Loko Yesu ni vajondzisiwa vafika Kapernawume, vahakelisi va rhesa ra tidrakma timbirhi vata ka Petrosi, vaku: “Xana mujondzisi wa n'wina angahumesi tidrakma timbirhi ke?”

²⁵ Aku: “Ina, wahumesa.” Loko Petrosi anghenile ndlwini, Yesu atekela kumuvutisa, aku: “Xana upimisa yini Simoni? Tihosi ta misava titeka ka mani rhesa ke? Ka vana va tona, kumbe a ka vanhu va le handle xana?”

²⁶ Petrosi aku ka yena: “Ka vanhu va le handle.” Yesu aku ka yena: “Loko svilitano, vana va tona avarhesi.

²⁷ Kambe lesvaku hingavakhunguvanyisi, yana ativeni, uyaringela; kutani hlampfi leyorhanga leyi ungatayiphasa, yikhome, uyipfula nomo; utakuma xitatare kona; xiteke, uvanyika xona, uhumesela mina na wena.”