Matewu 16 - Testamente Leyimpsha Xichangana

Ta lavakombelaka xikombiso

¹ Vafarisi ni Vasaduki vata ka Yesu kutamuringa, vakombela lesvaku ayendla xikombiso lexihumaka tilweni.

² Yena avahlamula, aku: “[Nimajambu, mili: ‘Ritaxa khwatsi, hikuva tilo ripshukile kufana ni ndzilo.’]

³ [Kutani ni mixo mili: ‘Namuntlha yitana, hikuva tilo radzindza, ni kumphuma rimphumile.’ Vakanganyisi, mitiva matshamela ya tilo, kambe mitsandzeka kutiva svikombiso sva minkarhi leyi?]

⁴ Rixaka leri ra mona, ni vuwosvi, rilava xikombiso, kambe ringakala ringanyikiwi xona, loko xingali xikombiso xa muprofeta Yonasi.” Kutani avasiya, atifambela.

Ta comela ra Vafarisi ni ra Vasaduki

⁵ Loko vajondzisiwa vatsemakanyile vaya tlhelo rin'wana ra tiva vatsundzuka lesvaku avakhohlwile kuteka svinkwa.

⁶ Yesu aku ka vona: “Tlharihani, tivoneleni ka comela ra Vafarisi ni ra Vasaduki.”

⁷ Kutani vakanetana vaku: “Kumbe hi lesvi hingatekangiki svinkwa.”

⁸ Kuteloko Yesu asvitwile, aku ka vona: “Vanhu vakupfumela lokutsongo, hikolaho ka yini mikanetana hi lesvi mingaliki ni svinkwa xana?

⁹ Xana amisetwisisa ke? Xana amitsundzuki svinkwa sva ntlhanu lesvingaphamela vanhu va ntlhanu wa makhulu (5 000) ni lesvaku mitatile svirhundzu svingani lesvikulu hi matlhantlha ke?

¹⁰ Amitsundzuki ni svinkwa sva ntlhanu ni svimbirhi lesvingaphamela vanhu va mune wa makhulu (4 000) ni lesvaku mitatile svirhundzu svingani hi matlhantlha ke?

¹¹ Hikolaho ka yini mingatwisisi lesvaku aningavulavuli na n'wina hi ta svinkwa xana? Kambe hi lesvaku mitivonela ka comela ra Vafarisi ni ra Vasaduki xana?”

¹² Hikona vangatwisisa lesvaku aangavuli kutivonela ka comela ra svinkwa, kambe kutivonela ka tijondzo ta Vafarisi ni ta Vasaduki.

Ta Petrosi loko avula lesvaku Yesu i mani

¹³ Loko Yesu afikile tikweni ra Khezariya wa Filipi, avutisa vajondzisiwa va yena, aku: “Xana vanhu vali, N'wana-wa-Munhu i mani ke?”

¹⁴ Vaku: “Van'we vali, u Yohani Mukhuvuli; van'wana vali, hi wena Eliya; van'wana kambe vali, hi wena Yeremiya, kumbe mun'we wa vaprofeta.”

¹⁵ Aku ka vona: “N'wina ke, mili ni mani xana?”

¹⁶ Kutani Simoni Petrosi ahlamula aku: “U Kriste, N'wana wa Xikwembu lexinyikaka vutomi.”

¹⁷ Yesu ahlamula aku: “Ukatekile Simoni n'wana Yona, hikuva ahi munhu wa misava lweyi angakupfuletela svosvo, kambe i Tatana wa mina lweyi anga matilweni.

¹⁸ Kolaho-ke nili ka wena: U ‘Petrosi’, kutani henhla ka ribze leri, nitayaka kereke ya mina; kutani hambi wuli ntamu wa rifu wungakala wungayihluli.

¹⁹ Nitakunyika makhiya ya Mfumu wa matilo; kutani lexi ungataxiyalela la misaveni, xitayaleliwa ni le tilweni, ni lexi ungataxipfumelela la misaveni, xitapfumeleliwa ni le tilweni.”

²⁰ Kutani abzela vajondzisiwa va yena lesvaku vangatshuki vabzela munhu lesvaku hi yena Mesiya.

Yesu ativisa ta rifu ra yena

²¹ Kusukela nkarhini wolowo Yesu asungula kubzela vajondzisiwa va yena lesvaku afanele kuya Yerusalema ayatwisiwa kuvava lokukulu hi vakulukumba ni Vaprista lavakulu ni Vatsali, adlawa, atlhela apfuka kufeni hi siku ra vunharhu.

²² Kambe Petrosi amukokela tlhelweni, amukawuka aku: “Xikwembu axingesvipfumeleli lesvi, we Hosi! Svilo lesvi, svingakala svingakuhumeleli.”

²³ Hi loko yena ahundzukula, aku ka Petrosi: “Suka ka mina Sathana! U xikhunguvanyiso ka mina, hikuva awuyehleketi sva Xikwembu, uyehleketa sva vanhu ntsena.”

²⁴ Yesu atlhela aku ka vajondzisiwa va yena: Loko munhu alava kunilandza aatitshike, atirhwexa xihambanu xa yena, kutani anilandza,

²⁵ hikuva lweyi arhandzaka kutihlayisela vutomi bza yena, atalahlekeliwa hi bzona; kambe lweyi alahlekeliwaka hi vutomi bza yena hikolaho ka mina, atatlhela abzikuma.

²⁶ Hikolaho loko munhu akota kufuwa misava hinkwayu, kambe alahlekeliwa hi vutomi bza yena, svitava svimupfune yini ke? Kumbe munhu atahumesa yini kuxava vutomi bza yena xana?

²⁷ Hikuva N'wana-wa-Munhu atavuya hi kukwetsima ka Tatana wa yena na ali ni tintsumi ta yena, kutani hi kona angatanyika mani na mani hi kuya hi mintirho ya yena.

²⁸ “Nitiyisile nili ka n'wina: Ku ni van'wana xikarhi ka lavanga kola, lavangatakala vangakhumbiwi hi rifu na vangasivona N'wana-wa-Munhu avuya Mfun'wini wa yena.”