Matewu 15 - Testamente Leyimpsha Xichangana

Ta svihena sva Vayuda

¹ Nkarhini wolowo, Vafarisi ni Vatsali lavahumaka Yerusalema vata ka Yesu, vaku:

² “Hikolaho ka yini vajondzisiwa va wena vangalandzi svihena lesvi hisvikumeke ka lava va khale xana? Hikuva vaja na vangahlambanga mavoko.”

³ Avahlamula, aku: Na n'wina, mitlulela yini Nawu wa Xikwembu hi mikhuva ya n'wina ke?

⁴ “Xikwembu xite: ‘Uva ni xichavu ka tatana wa wena ni ka mamana wa wena.’ Nasvona xite: ‘Lweyi arhuketelaka tatana wa yena kumbe mamana wa yena, aadlayiwe!’”

⁵ “Kasi n'wina mili, munhu angabzela tatana wa yena kumbe mamana wa yena, aku: ‘Lexi awufanela kuxilondzovota ka mina, i mhamba leyihlawuleliweke Xikwembu.’”

⁶ Ka n'wina, munhu lweyi angahalina yo mfanelo ya kupfuna tatana wa yena. Kutani-ke miwonha rito ra Xikwembu hi mikhuva ya n'wina.

⁷ Vakanganyisi, Ezaya aavula n'wina hakunene loko aku:

⁸ “‘Vanhu lava vanidzunisa hi milomo, kambe timbilu ta vona ti le kule na mina.

⁹ Vatikarhata mahala hi kunidzunisa, tijondzo leti vatijondzisaka i milawu ya vanhu ntsena.’”

Ta lesvi svinyamisaka

¹⁰ Kutani Yesu avitana xitshungu, aku ka xona: “Yingisani, mitwisisa.

¹¹ Lesvinghenaka non'weni, ahi svona lesvinyamisaka munhu, kambe lesvihumaka non'weni, hi svona lesvinyamisaka munhu.”

¹² Kutani vajondzisiwa vata ka yena, vaku: “Xana wasvitiva lesvaku Vafarisi vakhunguvanyekile, loko vatwile marito ya wena ke?”

¹³ Ahlamula, aku: “Nsinya wun'wana ni wun'wana lowu wungabzaliwangiki hi Tatana wa mina wa le tilweni, wutatsuvuliwa.

¹⁴ Vatshikeni, hi lava va svifamahlo lavafambisaka svifamahlokulobze. Loko xifamahlo xifambisa xin'wana, svitawela kheleni hi vumbirhi bza svona.”

¹⁵ Petrosi amuhlamula aku: “Hihlamusele xifaniso lexi.”

¹⁶ Aku: “Xana ni svosvi mahapfumala kutwisisa na n'wina ke?

¹⁷ Xana amisvitivi lesvaku hinkwasvu lesvinghenaka non'weni, sviya khwirini, kutani svicukumetiwa nhoveni ke?

¹⁸ Kasi lesvihumaka non'weni, svita hi le mbilwini, kutani hi svona lesvinyamisaka munhu.

¹⁹ Hikuva miyehleketo leyobiha, kudlayana, vuwosvi, vuphukuphuku, ni kuyiva, vumboni bza mavunhwa ni kurhuketela,

²⁰ hi svona lesvinyamisaka munhu; kambe kuja na ungahlambanga mavoko, ahi svona lesvi svinyamisaka munhu.”

Ta kupfumela ka wansati wa le Kanana

²¹ Yesu asuka kolaho, aya matlhelweni ya madoropa ya Tiro na Sidoni.

²² Kutani kuhumelela wansati lweyi aata hi le migangeni ya kusuhi na Kanana ahuwelela, aku: “Nitwele vusiwana, Hosi N'wana Davhida! N'wana wa mina wanhwanyana axanisiwa ngopfu hi madimoni.”

²³ Kambe Yesu angamuhlamulanga nchumu. Kutani vajondzisiwa va yena vamukombela vaku: “Muhlongole, hikuva ahibela huwa ali karhi ahilandzelela.”

²⁴ Yesu ahlamula aku: “Anirhumiwanga ka van'wana, loko kungali ka Vaisrayele, lavalahlekeke kufana ni tinyempfu.”

²⁵ Hi loko wansati ata, atamukhinsamela, aku: “Hosi, nipfune!”

²⁶ Amuhlamula, aku: “Asvisasekanga kutekela vana svakuja, unyika timbzana.”

²⁷ Yena aku: “Ina Hosi, kambe hambi tili timbzana, tija matlhantlha lawa mawaka hi le mezeni wa n'winyi wa tona.”

²⁸ Kolaho Yesu ahlamula, aku ka yena: “Wansati, kupfumela ka wena i kukulu; akuyendliwe hilaha ukombelaka hakona!” Kutani n'wana wa yena ahanyisiwa hi nkama wolowo.

Ta Yesu loko ahanyisa lavotala

²⁹ Loko Yesu asukile kolaho, atlhelela kusuhi ni tiva ra Galileya, kutani atlhantukela ntshaveni, afika atshama kona.

³⁰ Xitshungu lexikulu xita ka yena, na xili ni lavakhwitaka, svilima, svifamahlo, timbheveve ni van'wana lavotala; vavaveka milengeni ya Yesu, kutani avahanyisa.

³¹ Xitshungu xihlamala loko xivona timbheveve tivulavula, svilima svihanyisiwa, lavokhwita vafamba, lavofa mahlo vavona; kutani xidzunisa Xikwembu xa Israyele.

Ta Yesu loko aphamela vanhu va mune wa makhulu (4 000)

³² Yesu avitana vajondzisiwa va yena, aku ka vona: “Nitwela xitshungu lexi vusiwana, hikuva xixwile masiku manharhu na mina, kutani axahali na svakuja; anilavi kuxitlhelisela makaya na xili ni ndlala, hikuva xingawa ndleleni.”

³³ Vajondzisiwa vaku ka yena: “Xana hingasvikuma kwihi kola mananga svakuja svophamela xitshungu xotani, lesvaku xija xixurha ke?”

³⁴ Yesu aku ka vona: “Mi ni svinkwa svingani ke?” Vaku: “Hi ni svinkwa sva ntlhanu ni svimbirhi, ni tihlampfinyana tingali tingani.”

³⁵ Kolaho abzela xitshungu lesvaku xitshama hansi.

³⁶ Kutani ateka svinkwa sva ntlhanu ni svimbirhi ni tihlampfi, akhensa, akhema, anyika vajondzisiwa, vona vayavela xitshungu.

³⁷ Hinkwavu vaja vaxurha, varholela ni matlhantlha lawa mangasala, matata ntlhanu wa svirhundzu ni svimbirhi lesvikulu.

³⁸ Lavangaja, avali vanhu va mune wa makhulu (4 000), loko kungahlayiwi vavasati ni vatsongwana.

³⁹ Kuteloko atlhelisile xitshungu, anghena bzatswini, aya tikweni ra Magadala.