Matewu 14 - Testamente Leyimpsha Xichangana

Ta kufa ka Yohani Mukhuvuli

¹ Nkarhini wolowo, loko ndhuma ya Yesu yifikile tindleveni ta hosi Heroda,

² aku ka vatirhi va yena: “Munhu lweyi i Yohani Mukhuvuli, ayopfuka kufeni, kutani hi svona lesviyendlaka lesvaku mahlori ya matimba mavoneka ka yena.”

³ Mhaka hi lesvaku Heroda aakhomile Yohani, amuboha, amupfalela jele hikolaho ka Herodiya, nsati wa Filipi, makwavu wa Heroda;

⁴ hikuva Yohani aatshama abzela Heroda makhambi yotala aku: “Awupfumeleliwi kutekela makwenu nsati wa yena.”

⁵ Heroda aanavela kumudlaya, kambe aachava vanhu hikuva avaku: “Yohani i muprofeta!”

⁶ Kambe nkhubzeni wa siku ra kuvelekiwa ka Heroda, n'wana wa Herodiya waxisati acina mahlweni ka vanhu, atsakisa Heroda;

⁷ hi kolaho, Heroda amutshembisa hi kuhlambanya, aku: “Xihi ni xihi lexi ungataxikombela, nitakunyika xona.”

⁸ Hi loko lweyi wanhwanyana abzeleteliwa hi mamana wa yena kulanga, aku: “Ninyike nhloko ya Yohani Mukhuvuli svosvi kola, yili nkambaneni.”

⁹ Hosi yikhunguvanyeka, kambe hikolaho ka kuhlambanya ka yona, ni hikolaho ka lavatshameke na yona kujeni, yilerisa lesvaku nhloko yinyikiwa lweyi wanhwanyana.

¹⁰ Kurhumiwa vanhu, vayatsema nhloko ya Yohani jele.

¹¹ Kutani nhloko ya yena yitisiwa na yili nkambaneni, vanyika lweyi wanhwanyana; yena ayiyisa ka mamana wa yena.

¹² Kutani vajondzisiwa va Yohani vata, vatateka ntsumbu wa yena, vayawulahla; kutani vayativisa Yesu.

Ta kuphameliwa ka vanhu va ntlhanu wa makhulu (5 000)

¹³ Loko Yesu atwile timhaka toleto, asuka kolaho hi bzatsu, apelela aya mananga na ali yexe. Loko xitshungu xisvitivile, xihuma madoropeni, ximulandza hi milenge.

¹⁴ Akuhumeni ka yena bzatsweni, avona xitshungu lexikulu, kutani axitwela vusiwana, ahanyisa lavavabzaka xikarhi ka xona.

¹⁵ Kuteloko ripelile, vajondzisiwa vata ka yena vaku: “Lomu i mananga, nasvona nkarhi wuhundzile, tlhelisa xitshungu xiya madoropeni, xiyatixavela svakuja.”

¹⁶ Kambe Yesu aku ka vona: “Avafanelanga kusuka; vaphameleni n'wina.”

¹⁷ Vaku ka yena: “Ahi na nchumu la, loko kungali svinkwa sva ntlhanu ni tihlampfi timbirhi.”

¹⁸ Aku: “Svitiseni halenu.”

¹⁹ Kutani loko abzelile xitshungu kutshama hansi bzanyini, ateka svinkwa sva ntlhanu ni tihlampfi timbirhi, alanguta henhla tilweni, akhensa. Kutani akhemelela svinkwa svosvo, anyika vajondzisiwa, vona vayavela xitshungu.

²⁰ Hinkwavu vaja vaxurha; kutani varholela matlhantlha lawa mangasala, matata svirhundzu sva khume ni svimbirhi.

²¹ Kasi lavajeke avali vanhu lavalavaka kuva ntlhanu wa makhulu (5 000), loko kungakontiwi vavasati ni vatsongwana.

Ta Yesu loko afamba henhla ka mati

²² Ndzhaku ka svosvo, Yesu asindzisa vajondzisiwa lesvaku vanghena bzatsweni, varhanga vaya ka tlhelo lerin'wana ra tiva, loko yena ali karhi asalisana ni xitshungu.

²³ Kuteloko asalisanile ni xitshungu lexiya, atlhantukela ntshaveni kuyakhongela ali yexe; kutani apeleliwa hi jambu na ahali kolaho.

²⁴ Bzatsu rona, arifambile mpfhuka lowukulu risukile ribuweni, rili karhi ritsekatsekisiwa hi magandlati, hikuva mheho ayiba yikongoma bzatsu.

²⁵ Hi nkarhi wa mahlambandlopfu, ata ka vona, na afamba henhla ka mati ya tiva.

²⁶ Loko vajondzisiwa vamuvona na afamba henhla ka mati ya tiva, vadzuka ngopfu vaku: “I xipoko!” Kutani vaba nyandha hi kuchava.

²⁷ Kambe Yesu ahantla avulavula na vona, aku: “Tiyisani timbilu, hi mina; mingachaveni!”

²⁸ Petrosi amuhlamula, aku: “Hosi, loko uli wena hakunene, nilerise lesvaku nita kolaho unga kona hi le henhla ka mati.”

²⁹ Yesu aku ka yena: “Tana!” Kutani Petrosi ahuma bzatsweni, afamba henhla ka mati, aya ka Yesu.

³⁰ Kambe loko avona matimba ya mheho, akhomiwa hi kuchava; kutani loko asungula kumbombomela, aba nyandha aku: “Hosi, niponise!”

³¹ Yesu ahantla atshambuluta voko, amukhoma, aku ka yena: “Munhu wa kupfumela lokutsongo, ukanakanile hikolaho ka yini xana?”

³² Kuteloko vanghenile bzatswini, mheho yirhula.

³³ Kutani lava avali bzatswini vakhinsamela Yesu, vaku: “Hakunene, u N'wana wa Xikwembu.”

Ta Yesu loko ahanyisa timbabzi Genezareta

³⁴ Loko vatsemakanyile tiva, vafika tikweni ra Genezareta.

³⁵ Loko vanhu vakona vativile lesvaku hi yena Yesu, varhumela rito matlhelweni hinkwawu, kutani hinkwavu lavavabzaka vatisiwa ka yena.

³⁶ Vanhu vamukombela lesvaku apfumelela timbabzi kukhumba hambi mali makumu ya sviyambalu sva yena ntsena; kutani hinkwavu lavangamukhumba vahanyisiwa.