Matewu 13 - Testamente Leyimpsha Xichangana

Xifaniso xa muhaxi

¹ Hi siku rolero, Yesu ahuma ndlwini, ayatshama kusuhi ni tiva.

² Kutani xitshungu lexikulu xihlengeletana xitela yena, akondza anghena bzatswini, atshama ndzeni ka rona; loko xili xitshungu hinkwaxu, xona axiyimile ridongeni.

³ Kutani axibzela timhaka letotala hi svifaniso, aku: “Yingisani! Muhaxi ahumile aya kuhaxeni ka timbewu.

⁴ Loko ali karhi ahaxa, timbewu tin'we tiwela ndleleni; kutani tinyanyana tita, titaja hinkwatu.

⁵ Timbewu tin'wana tiwela maribzeni, laha akungali na misava leyotala, kutani tihantla timila, hikuva misava yakona ayingatalanga.

⁶ Kambe loko jambu ritlhava, svimilwa svivuna, kutani sviwoma hi kupfumala timintsu.

⁷ Timbewu tin'wana tiwela xikarhi ka mintwa; loko mintwa yikula, yitikamanyeta.

⁸ Kasi tin'wana tona tiwela misaveni leyinene, tiveka mihandzu, yin'wana yichela dzana (100), yin'wana ntlhanu wa makume ni rin'we (60), yin'wana makume manharhu.

⁹ Lweyi anga ni tindleve, aayingise!”

Nkongometo wa svifaniso

¹⁰ Vajondzisiwa vata ka Yesu, vaku: “Hikolaho ka yini uvulavula ni vanhu hi svifaniso ke?”

¹¹ Avahlamula, aku: Hi lesvaku n'wina, minyikiwile kutiva svihundla sva Mfumu wa matilo, kambe vona avanyikiwanga.

¹² Lweyi anga ni xanchumu, atanyikiwa ni svin'wana, kutani atava ni lesvotala; kambe lweyi angaliki ni nchumu, atatekeliwa ni lexi anga na xona.

¹³ Lesviyendlekaka hi lesvaku nivulavula na vona hi svifaniso hikusa vavona, kambe avavonisisi; ni kuyingisa, avayingisisi, hambi kusvitwisisa.

¹⁴ Kutani kuyendleka ka vona lesvingavuliwa khale hi muprofeta Ezaya, loko aku: “ ‘Kuyingisa mitayingisa hi tindleve, kambe amingayingisisi nikutsongo, nasvona, kuvona hi mahlo mitavona, kambe amingavonisisi!

¹⁵ Timbilu ta vanhu lava titlanyalile; vatipfale tindleve ni mahlo, lesvaku vangahavoni, ni kuyingisa vangahayingisi hi tindleve ta vona, hambi kuli kutwisisa hi timbilu ta vona, vangahatwisisi, lesvaku vahundzuka, na mina nivahanyisa.’ ”

¹⁶ Kambe makatekile mahlo ya n'wina, hikuva mavona, na tona tindleve ta n'wina, hikuva tayingisa.

¹⁷ Nitiyisile hakunene nili ka n'wina: Vaprofeta lavotala ni lava volulama, vanavelile kuvona lesvi n'wina misvivonaka kambe avasvivonanga; hambi kuli kuyingisa lesvi n'wina misviyingisaka kambe avasviyingisanga.

Ta Yesu loko ahlamusela xifaniso xa muhaxi

¹⁸ “Loko mili n'wina, yingisani xifaniso xa muhaxi mixitwisisa:

¹⁹ Mani na mani lweyi atwaka Rito ra Mfumu wa Xikwembu, kambe angaritwisisi, svifana ni loko mbewu yiwile kusuhi ni ndlela. Lweyi wobiha ata, amutekela lesvihaxiweke mbilwini ya yena.

²⁰ Mbewu leyihaxiweke amaribzeni, svifana ni loko munhu atwile Rito, ahantla ariyamukela hi kutsaka;

²¹ kambe anga na timintsu ndzeni ka yena, atiyisela nkarhinyana ntsena; kutani loko khombo kumbe kuxaniseka svihumelela hikolaho ka Rito, ahantla akhunguvanyeka.

²² Mbewu leyihaxiweke mintweni svifana ni loko munhu atwa Rito; kambe kuvilela hi sva misava ni kukanganyisiwa hi rifuwo svikamanyeta Rito, kutani ritsandzeka kuveka mihandzu.

²³ Kambe mbewu leyihaxiweke misaveni leyinene, svifana ni loko munhu atwa Rito aritwisisa; hi yena lweyi avekaka mihandzu leyinene, yin'wana yiveka ka dzana (100), yin'wana yiveka ka ntlhanu wa makume ni rin'we (60), yin'wana yiveka makume manharhu.”

Xifaniso xa trigu ni mfava

²⁴ Yesu avavekela xifaniso xin'wana, aku: “Mfumu wa matilo wufana ni munhu lweyi abzaleke mbewu leyinene nsin'wini ya yena.

²⁵ Kambe loko vanhu vayetlele, kuta nala wa yena, atabzala mfava xikarhi ka trigu, kutani atifambela.

²⁶ Kuteloko trigu ritlhavile rili khava, na wona mfava wuvonaka.

²⁷ Vatirhi va n'winyi wa munti vata, vaku ka yena: ‘Hosi, ahiku ubzalile mbewu leyinene nsin'wini ya wena; xana mfava lowu wuta hi kwihi ke?’

²⁸ Aku ka vona: ‘I ntirho wa nala.’ Vatirhi vaku ka yena: ‘Xana ulava lesvaku hiyatsuvula mfava ke?’

²⁹ Aku ka vona: ‘Ahihim, hikuva loko miyatsuvula mfava, mingatshuka mitsuvula na rona trigu.

³⁰ Svitshikeni svikula svin'we, kukondza kuyafika nkarhi wa kutshovela; hi kona ningataku ka vatshoveli: Rhangani hi mfava miwutsuvula, miwuboha hi tinyandza, mitawuhisa; kambe trigu mirihlengeleta tshaleni ra mina.’”

Xifaniso xa mbewu ya nsinapi ni xa comela

³¹ Avavekela xifaniso xin'wana, aku: “Mfumu wa matilo wufana ni mbewu ya nsinapi leyi munhu angayiteka, ayayibzala nsin'wini ya yena.

³² Mbewu yakona hi leyitsongo ka timbewu hinkwatu, kambe loko yimilile, yitlula svimilwa hinkwasvu hi kukula, yihundzuka nsinya, tinyanyana ta tilo, titayaka marhavini ya wona.”

³³ Atlhela avabzela xifaniso xin'wana, aku: “Mfumu wa matilo wufana ni comela leri wansati angariteka, aripfuva hi mimpimo yinharhu ya fulahu, yikondza yikukumuka hinkwayu.”

Yesu atirhisa svifaniso

³⁴ Yesu abzelile xitshungu timhaka leti hinkwatu hi svifaniso; angavabzelanga nchumu loko kungali hi svifaniso,

³⁵ lesvaku kutayendleka hilaha rito ra muprofeta ringaku: “Nitavulavula hi svifaniso, nipaluxa timhaka leti atifihliwile, hi mpfhuka misava yitumbuluxiwile.”

Ta Yesu loko ahlamusela xifaniso xa mfava

³⁶ Kutani Yesu asuka xitshungwini, ayanghena ndlwini; vajondzisiwa va yena vata ka yena, vaku: “Hihlamusele xifaniso xa mfava wa le masin'wini.”

³⁷ Avahlamula, aku: Lweyi abzaleke mbewu leyinene i N'wana-wa-Munhu;

³⁸ nsimu i misava; mbewu leyinene i vana va Mfumu; mfava i vana va Lweyi Wobiha.

³⁹ Nala lweyi abzaleke mfava i Diyavulosi; kutshovela i kuhela ka misava, vatshoveli vona i tintsumi.

⁴⁰ Kukotisa loko mfava wutsuvuliwile, wuya hisiwa ndzilweni, svitava tano akuheleni ka misava.

⁴¹ N'wana-wa-Munhu atarhuma tintsumi ta yena, titahlengeleta handle ka Mfumu wa yena vakhunguvanyisi hinkwavu ni lavayendlaka lesvobiha,

⁴² titavacukumeta kheleni ra ndzilo, laha minkosi yingatava kona, ni kuketsela ka matinyo.

⁴³ Nkarhini wolowo, lavolulama vatavangama kukotisa jambu, Mfun'wini wa Tatana wa vona. Lweyi anga ni tindleve, aayingise!

Xifaniso xa rifuwo lericeleliweke ni ta tinwarhu

⁴⁴ Mfumu wa matilo wufana ni rifuwo lericeleliweke nsin'wini, kaku loko munhu arithumbhile, angatlhela aricelela, kutani kutsakeni ka yena, ayaxavisa svilo sva yena hinkwasvu, atixavela nsimu yoleyo.

⁴⁵ Nasvona, Mfumu wa matilo wufana ni muxavi lweyi alavaka tinwarhu leti tinene;

⁴⁶ kutani loko akumile nwarhu yin'we yodura ngopfu, ayaxavisa svilo sva yena hinkwasvu, atixavela yona.

Xifaniso xa nkukutu

⁴⁷ Nasvona: Mfumu wa matilo wufana ni nkukutu lowupetiweke lwandle, wuphasa tihlampfi ta tinxakaxaka.

⁴⁸ Loko wutele, vaphasi vawukokela ridongeni, vatshama hansi, vakhetela tihlampfi letinene amindzhaveni ya vona, letingapfuniki nchumu vaticukumeta.

⁴⁹ Svitava tano akuheleni ka misava; tintsumi titahuma, titahlawula lavobiha ka lavolulama,

⁵⁰ lavobiha titavacukumeta kheleni ra ndzilo, laha minkosi yingatava kona, ni kuketsela ka matinyo.

⁵¹ “Xana matitwisisa timhaka leti hinkwatu ke?” Vaku ka yena: “Ina!”

⁵² Aku ka vona: “Hilaha ninge: Mutsali mun'wana ni mun'wana lweyi ajondzisiweke hi ta Mfumu wa matilo, afana ni n'winyi wa yindlo lweyi ahumesaka vuhosini bza yena svilo lesvimpsha ni lesvi sva khale.”

Ta Yesu loko angayamukeliwi Nazareta

⁵³ Kuteloko Yesu ahetile kuvula svifaniso svosvo, asuka kolaho;

⁵⁴ loko afikile tikweni ra le kwavu, ajondzisa vanhu sinagogeni ra vona, vakondza vahlamala, vaku: “Xana vutlhari lebzi ni mintirho leyi ya matimba, asvikume kwihi ke?

⁵⁵ Xana ahi yena n'wana wa muvatli ke? Mamana wa yena, xana ahi yena lweyi avuliwaka Mariya ke? Ni vamakwavu, xana ahi vona va Yakobe, Yosefa, Simoni, na Yuda ke?

⁵⁶ Xana vamakwavu vaxisati ahi na vona hinkwavu xikarhi ka hina ke? Nasvona svilo lesvi hinkwasvu asvikuma kwihi xana?”

⁵⁷ Kutani vakhunguvanyeka svinene hikolaho ka yena. Kambe Yesu aku ka vona: “Muprofeta angasoliwi, loko kungali tikweni ra le kwavu, ni le maxakeni ya yena.”

⁵⁸ Hikolaho, angayendlanga mahlori lawa yotala kona, hikuva avangalina kupfumela.