Matewu 12 - Testamente Leyimpsha Xichangana

Yesu i Hosi ya Savata

¹ Nkarhini wolowo Yesu ahundza xikarhi ka masimu ya trigu hi siku ra Savata. Vajondzisiwa va yena avatwa ndlala, kutani vasungula kutshova minchocho ya trigu, vaja.

² Loko Vafarisi vasvivona, vaku ka yena: “Vona! Vajondzisiwa va wena vayendla lesvingapfumeleliwiki kuyendliwa hi siku ra Savata.”

³ Kambe Yesu aku ka vona: “Xana amijondzanga lesviyendliweke hi Davhida, siku leri angatwa ndlala, yena ni lava avali na yena ke?”

⁴ Atshama anghena na vona ndlwini ya Xikwembu, vaja xinkwa xa mhamba lexi axingafanelanga kujiwa hi yena ni lava avali na yena, kambe axijiwa hi Vaprista ntsena.

⁵ Kumbe, amijondzanga Nawini xana lesvaku, hi siku ra Savata, Vaprista vatlula Nawu wa Savata hi kutirha Tempeleni, kambe vangakumi nandzu ke?

⁶ Namibzela lesvaku ku ni lweyi atlulaka Tempele hi vukulu kola.

⁷ Loko amitwisisile rito leringo: “ ‘Nitsakela timpsalu, kungali timhamba, n'wina ina mingasolanga lavangaliki na nandzu,

⁸ hikuva N'wana-wa-Munhu i Hosi ya Savata.’”

Ta munhu wa kukhwanyala voko

⁹ Loko Yesu asukile kolaho, ayanghena sinagogeni ra vona.

¹⁰ Kona kolaho, akuli ni munhu wa kukhwanyala voko. Kutani vavutisa Yesu hi kulava xomunyika nandzu ha xona vaku: “Xana svapfumeleliwa kuhanyisa munhu hi siku ra Savata ke?”

¹¹ Yena aku ka vona: “I mani munhu xikarhi ka n'wina lweyi anga ni nyempfu yin'we ntsena, kaku loko yiwela kheleni hi siku ra Savata, angatakala angayitlakuli, ayihumesa hi siku lero ke?

¹² Kasi munhu atlula ngopfu svinene tinyempfu hi risima. Hikolaho, kuyendla lesvinene hi siku ra Savata, svapfumeleliwa.”

¹³ Kutani aku ka munhu yelweyo: “Tshambuluta voko ra wena!” Aritshambuluta; kutani ritlhela riwololoka rifana ni lerin'wana.

¹⁴ Vafarisi vahuma handle, vayaboha makungu mayelanu ni vutomi bza Yesu kuvona hilaha vangamudlayaka hakona.

Ta nandza lweyi ahlawuliweke hi Xikwembu

¹⁵ Kambe loko Yesu asvitiva, asuka kolaho. Lavotala vamulandza, kutani avahanyisa hinkwavu.

¹⁶ Kambe avatshinyisisa lesvaku vangatshuki vamudumisa vanhwini.

¹⁷ Akuli kuhetisa lesvivuliweke hi muprofeta Ezaya, loko aku:

¹⁸ “Vonani nandza wa mina lweyi ningatihlawulela yena, murhandziwa wa mina lweyi mbilu ya mina yimutsakelaka. Nitaveka Moya wa mina henhla ka yena, kutani atativisa vamatiko lesvaku kuyavanyisa lokolulama ku kona;

¹⁹ angakala angaholovi, angebi huwa, aku na munhu lweyi angatatwa rito ra yena asvitaratwini.

²⁰ Angakala angatshovi rihlanga lerikhinyekeke, nasvona angakala angatimi rivoni leringe ketiketi, akondza ahlulisa kuyavanyisa lokolulama.

²¹ Kutani vamatiko vatatshemba vito ra yena.”

Ta Yesu na Belzebule

²² Hi loko vatisa munhu lweyi aali ni dimoni; wa xifamahlo, nasvona ali mbheveve. Yesu amuhanyisa, kutani lweyi wa mbheveve avulavula, nasvona atlhela avona.

²³ Kutani xitshungu hinkwaxu xihlamala, xivutisana xiku: “Xana munhu lweyi angava yena N'wana Davhida ke?”

²⁴ Loko Vafarisi vatwa svosvo, vahlamula vaku: “Munhu lweyi angekoti kuhlongola madimoni loko kungali hi Belzebule, hosana ya madimoni.”

²⁵ Kambe Yesu, hi kutiva miyehleketo ya vona, aku ka vona: Mfumu wun'wana ni wun'wana lowuyavaneke hi le xikarhi, wutawa; svitano ni ka doropa rin'wana ni rin'wana, hambi wuli njangu, lowuyavaneke hi le xikarhi, wungakala wungatiyi.

²⁶ Ni loko Sathana ahlongola Sathana, watilwisa; hi kolaho mfumu wa yena wungakala wungatiyi.

²⁷ Ni loko kunene nihlongola madimoni hi Belzebule, xana vana va n'wina vona vamahlongola hi mani ke? Loko svilitano vatava vayavanyisi va n'wina.

²⁸ Kambe loko nihlongola madimoni hi Moya wa Xikwembu, svivula lesvaku Mfumu wa Xikwembu wutile ka n'wina.

²⁹ Kumbe munhu anganghenisa kuyini ndlwini ya nhenha ya matimba aphanga xuma xa yona, loko angasungulanga hi kuboha nhenha yoleyo ke? Hikona angakotaka kuphanga yindlo ya yona.

³⁰ Lweyi angayimiki na mina, alwa na mina; kutani lweyi angahlengeletiki na mina, wahangalasa.

³¹ Hilaha ninge ka n'wina: Vanhu vatarivaleliwa xijoho xihi ni xihi, hambi kova kusandza Xikwembu; kambe loko vasandza Moya Lowokwetsima, vangakala vangarivaleliwi;

³² mani na mani lweyi angatajohela N'wana-wa-Munhu hi kumusandza, atarivaleliwa; kambe lweyi angatajohela Moya Lowokwetsima hi kuwusandza, angakala angarivaleliwi, hambi kuli nkarhini wa svosvi, hambi kuli nkarhini lowutaka.

Ta nsinya ni mihandzu ya wona

³³ Vonani: Nsinya lowunene wuveka mihandzu ya wona leyinene. Vonani: Nsinya lowobiha, wuveka mihandzu ya wona leyobiha, hikuva nsinya wutiviwa hi mihandzu ya wona.

³⁴ “N'wina rixaka ra svipshahla, mingasvikotisa kuyini kuhumesa marito lamanene, lesvi minga lavobiha ke? Nomo wuvula lesvi mbilu yitaleke hi svona.

³⁵ Munhu wa munene ahumesa svilo lesvinene xihundleni lexinene xa rifuwo ra yena, kambe munhu lweyi wobiha ahumesa lesvobiha xihundleni xa rifuwo ra yena lerobiha.

³⁶ Hikolaho namibzela lesvaku, hi siku ra kuyavanyisa, vanhu vatatihlamulela ka rito rin'wana ni rin'wana ra hava leri vatshamaka varivula,

³⁷ hikuva wena, utahlayiwa lweyi alulameke hikolaho ka marito ya wena; na svona, utayavanyisiwa hikolaho ka marito ya wena.”

Ta lavakombelaka mahlori

³⁸ Nkarhini wolowo, van'wana va Vatsali ni Vafarisi vaku ka Yesu: “Mujondzisi, hilava kukuvona uyendla mahlori.”

³⁹ Avahlamula, aku: “Rixaka leri ra mona ni ra vuwosvi, rikombela mahlori, kambe ringakala ringanyikiwi wona, loko mangali wona mahlori ya muprofeta Yonasi.

⁴⁰ Hikuva hilaha Yonasi aheteke hakona masiku manharhu ni vusiku bzakona khwirini ra hlampfi leyikulu, N'wana-wa-Munhu na yena ataheta masiku manharhu ni vusiku bzakona hansi ka misava.

⁴¹ Hi siku ra kuyavanyisa, vavanuna va Ninivha vatahumelela svin'we ni rixaka leri, variyavanyisa, hikuva vahundzukile, loko vachumayeliwa hi Yonasi; kutani masvivo, lweyi anga laha i nkulu kutlula Yonasi.

⁴² Hi siku ra kuyavanyisa, hosinkazi ya le dzongeni yitapfuka kufeni svin'we ni rixaka leri, yiliyavanyisa, hikuva yisukile makun'wini ya misava kutayingisa vutlhari bza Solomoni, kutani masvivo, lweyi angalaha i nkulu kutlula Solomoni.

Ta moya wa chaka loko wutlhela wuvuya

⁴³ “Loko moya wa chaka wusukile ka munhu, wuya mananga kuyalava kuwisa, kambe wutsandzeka kukukuma;

⁴⁴ hi loko wuku: ‘Nitatlhelela ndlwini ya mina leyi nihumeke ka yona.’ Kutani loko wufika, wuyikuma yingali na nchumu, yisviyeliwile, yilungisiwile.

⁴⁵ Hi loko wutlhela wuyateka mimoya yin'wana ya ntlhanu ni yimbirhi leyobiha kutlulisa wona, kutani yinghena, yitshama ndlwini leyi; kutani matshamela yohetelela ya munhu lweyi, matatlula lawa yosungula hi kubiha. Svitava tano ka rixaka leri robiha.”

Ta mamana wa Yesu ni vamakwavu

⁴⁶ Aku ahavulavula ni xitshungu, kuhumelela mamana wa yena ni vamakwavu, vayima handle, valava kuvulavula na yena.

⁴⁷ Kutani munhu mun'we aku ka yena: “Vona, mamana wa wena ni vamakwenu, hi lava laha handle, valava kuvulavula na wena.”

⁴⁸ Kambe Yesu ahlamula lweyi angamutivisa aku: “Mamana i mani xana, ni vamakwerhu i va mani xana?”

⁴⁹ Kutani akomba vajondzisiwa va yena hi voko, aku: “Mamana ni vamakwerhu hi volava;

⁵⁰ hikuva mani na mani lweyi ayendlaka kurhandza ka Tatana wa mina lweyi anga matilweni, hi yena makwerhu waxinuna, ni waxisati, na mamana.”