Matewu 11 - Testamente Leyimpsha Xichangana

Ta varhumiwa va Yohani Mukhuvuli

¹ Kuteloko Yesu ahetile kukombisana ni vajondzisiwa va yena lava va khume ni vambirhi, asuka kolaho, ayajondzisa ni kuchumayela Evhangeli madoropeni ya vona.

² Kuteloko Yohani atwa ta mintirho ya Kriste na ali jele arhuma vajondzisiwa va yena kuyavutisa Yesu, vaku:

³ “Xana hi wena lweyi vangate wata, kumbe xana hifanela kurindzela mun'wana ke?”

⁴ Yesu ahlamula, aku ka vona: “Fambani miyarungulela Yohani lesvi misvitwaka ni lesvi misvivonaka:

⁵ Svifamahlo svitlhela svivona, svilima svafamba, va nhlokonho vabasisiwa, lavofa tindleve vatwa, vafi vapfuka, svisiwana svibzeliwa Evhangeli.

⁶ Kutani kukatekile lweyi angatakala angakhunguvanyeki hikolaho ka mina.”

⁷ Kutani loko varhumiwa vasukile, Yesu asala avulavula hi Yohani, aku ka xitshungu: Amiyile kuyavona yini mananga xana? Arili rihlanga leritsekatsekisiwaka hi moya xana? Ahihim!

⁸ Loko svilitano, amiyela kuyavona yini ke? Xana aali munhu lweyi ayambakele svosaseka ngopfu ke? Vonani, lavayambaleke lesvosaseka va le tindlwini ta vuhosi.

⁹ Kutani nibzeleni, amiyela kuyavona yini ke? Aali muprofeta xana? Ina, namibzela, aali yena, ni kutlula ni muprofeta.

¹⁰ Lweyi hi yena kungatsaliwa ta yena loko vaku: “ ‘Vona! Nirhuma ntsumi ya mina mahlweni ka wena; yitakurhangela mahlweni, yilungisa ndlela ya wena.’ ”

¹¹ Nitiyisile hakunene nili ka n'wina: Xikarhi ka vanhu lavapsaliweke hi vavasati, akuhumelelanga lweyi atlulaka Yohani Mukhuvuli; kambe lweyi anga lwentsongo Mfun'wini wa matilo i nkulu ka Yohani.

¹² Kusukela nkarhini wa Yohani Mukhuvuli kutafika nkarhi wa svosvi, kungheniwa Mfun'wini wa matilo hi kutirhisa tihanyi, kutani va tihanyi hi vona lava vatitekelaka wona.

¹³ Vaprofeta hinkwavu ni Vatsali va Nawu vaprofetile lesvingatahumelela kukondza kufika Yohani.

¹⁴ Kutani loko kunene mipfumela marito lawa, Yohani hi yena Eliya lweyi aafanela kuta.

¹⁵ Lweyi anga ni tindleve, aayingise!

¹⁶ Hikolaho, vanhu va masiku lawa, ningavafanisa ni yini ke? Vafana ni vatsongwana vohuha, lava vatshameke ndhawini yoxavisela ka yona na vali karhi valengetana vaku:

¹⁷ “ ‘Himichayele nanga, kambe amicinanga; hiyimbelelile tinsimu ta mahlomulu, kambe amirilanga.’”

¹⁸ “Hi mukhuva lowu Yohani atile; aangaji, anganwi, kutani vaku: ‘A ni dimoni!’

¹⁹ N'wana-wa-Munhu atile aja, anwa, kutani vaku: ‘Langutani, munhu wa makolo hi lweyi, wa xidakwa, lweyi atwananaka ni vahakelisi va rhesa ni vajohi!’ Kambe vutlhari bza Xikwembu bzitikomba na bzilulamile hi mintirho ya bzona.”

Ta madoropa manharhu lawa mangahundzukangiki

²⁰ Nkarhini wolowo Yesu asungula kusola madoropa lawa angayendla mahlori lawa yotala ka wona, hi mhaka ya lesvi mangayala kuhundzuka,

²¹ aku: U ni khombo wena Korazini, na wena Betisayida, hikuva mahlori lawa mangayendliwa xikarhi ka n'wina, loko amayendliwile le Tiro ni le Sidoni, madoropa lawaya ingi mahundzukile khale, mayambale lesvokhwaxa, matshamile nkumeni.

²² Hambi svilitano, namibzela lesvaku, hi siku ra kuyavanyisa, madoropa ya Tiro na Sidoni matavevukiseliwa kutlula n'wina.

²³ Na wena Kapernawume: “ ‘Xana utatlakusiwa kuyafika tilweni ke? Ahihim! Utatsongahatiwa kuyafikela Tiheleni.’ ” “Hakunene, mahlori lawa mayendliweke ka wena, loko amayedliwile Sodoma, doropa leriya ni namuntlha aritava rahali kona.

²⁴ Hambi svilitano nakubzela lesvaku, hi siku ra kuyavanyisa, tiko ra Sodoma ritavevukiseliwa kutlula wena.”

Tanani ka mina, nitamiwisisa!

²⁵ Nkarhini wolowo Yesu avulavula aku: Nakukhensa Tatana, Hosi ya tilo ni misava, hikuva timhaka leti, utifihlele lava votlhariha, ni lava va vutivi, kambe utitivisile ka lavatsongo.

²⁶ Ina Tatana, usvilavise svosvo.

²⁷ Tatana avekile svilo hinkwasvu mavokweni ya mina; kutani aku na lweyi ativaka N'wana, loko angali Tatana; nasvona aku na lweyi ativaka Tatana, loko angali N'wana, ni lweyi N'wana alavaka kumutivisa ka yena.

²⁸ “Tanani ka mina, n'wina hinkwenu lavakarhaleke, ni lavatikeliwaka, nitamiwisisa.

²⁹ Rhwalani mpingu wa mina, mijondza ka mina, hikuva ni ni mbilu yorhula ni ya timpsalu; kutani mimoya yitakuma kuwisisiwa;

³⁰ hikuva mpingu wa mina wawolova, ni ndzhwalu wa mina wavevuka.”