Matewu 10 - Testamente Leyimpsha Xichangana

Ta Yesu loko ahlawula vapostola va khume ni vambirhi

¹ Loko Yesu avitanile vajondzisiwa va yena va khume ni vambirhi, avanyika matimba yohlongola mimoya ya chaka ni matimba ya kuhanyisa hinkwavu lava vaxanisiwaka hi mavabzi ya tinxakaxaka.

² Mavito ya vapostola lava va khume ni vambirhi hi lawa: Wosungula i Simoni lweyi ativiwaka hi vito ra Petrosi, kulandza Andreya makwavu, na Yakobe n'wana Zebedewu, na Yohani makwavu;

³ Filipi na Bartolomewu; Tomasi na Matewu muhakelisi wa rhesa; Yakobe, n'wana Alfewu, na Tadewu;

⁴ Simoni wa Kanana, na Yudasi Iskariyota, lweyi angaxenga Yesu.

Ta kurhumiwa ka lava va khume ni vambirhi

⁵ Yesu arhuma lava va khume ni vambirhi, ndzhaku ka loko avalayile aku: Mingatshukeni miya ka vamatiko; nasvona mingangheneni madoropeni ya Vasamariya,

⁶ kambe yanani ka Vaisrayele, lavalahlekeke kufana ni tinyempfu.

⁷ “Kutani loko mili karhi mifamba, chumayelani miku: ‘Mfumu wa matilo wu le kusuhi.’”

⁸ Hanyisani lavavabzaka, mipfuxa vafi, mibasisa va nhlokonho, mihlongola madimoni. Minyikiwile mahala; na n'wina, nyikani mahala.

⁹ Mingatshukeni miteka male ya golidi kumbe ya silivhere hambi ya koporo asvikhwameni sva n'wina;

¹⁰ mingafambeni ni nkwama wa timbuva ta ndlela, male kumbe sviyambalu svoncinca, hambi masandhazi, kumbe nhonga, hikuva mutirhi afaneliwa hi svakuja sva yena.

¹¹ Hinkwaku lomu minghenaka kona, doropeni hambi asvidoropanini, lavani njangu lowu wungamiyamukelaka, kutani mitshama ka wona kukondza misuka.

¹² Loko minghena muntini, xewetani.

¹³ Loko munti wolowo wufanela, kurhula ka n'wina akute henhla ka wona; kambe loko svingawufaneli, kurhula ka n'wina akutlhelele ka n'wina.

¹⁴ Kutani loko vangamiyamukeli, kumbe loko vangayingisi marito ya n'wina, muntini wolowo, kumbe doropeni rolero, humani miphuhuna ntsurhi milengeni ya n'wina.

¹⁵ Nitiyisile nili ka n'wina: Hi siku ra kuyavanyisa, tiko ra Sodoma na Gomora ritavevukiseliwa kutlula doropa rolero.

Ta maxangu lawa mangatahumelela

¹⁶ Vonani, nimirhuma na mifana ni tinyempfu xikarhi ka mahlolwa; hi kolaho ke tlharihani kufana ni tinyoka, miva lavorhula kufana ni svituvana.

¹⁷ Tivoneleni, hikuva vanhu vataminyiketa atihubzeni, vamiba hi minkhavi masinagogeni ya vona.

¹⁸ Nasvona mitayisiwa mahlweni ka tindhuna ni le mahlweni ka tihosi hikolaho ka mina, lesvaku miveka vumboni ka vona ni ka vamatiko.

¹⁹ Kambe siku leri vaminyiketaka ka vona, mingakanakaneni hi lesvi mingatavula svona ni mavulavulela yakona; hikuva svosvo, mitanyikiwa svona nkarhini wolowo.

²⁰ Ahi n'wina mingatavulavula, kambe i Moya wa Tatana wa n'wina lowu wungatavulavula hi n'wina.

²¹ Makwavu atanyikela mun'wana makwavu lesvaku adlawa, ni tatana atayendlisa svosvo ka n'wana wa yena; vana vatapfukela vapsali va vona, vavadlaya.

²² Mitavengiwa hi vanhu hinkwavu hikolaho ka vito ra mina; kambe lweyi angatatiyisela kufika makumu, hi yena lweyi angataponisiwa.

²³ Loko vamixanisa doropeni leri, tsutsumelani ka rin'wana, hikuva nitiyisile nili ka n'wina: N'wana-wa-Munhu atahumelela na mingasitlhanganisa madoropa hinkwawu ya Israyele.

²⁴ Mujondzisiwa ahi nkulu ka mujondzisi wa yena, ni xikarawa ahi nkulukumba ka n'winyi wa xona.

²⁵ Sviringene loko mujondzisiwa angahundzuka lweyi afanaka ni mujondzisi wa yena, ni loko xikarawa xingahundzuka lexi xifanaka ni n'winyi wa xona. Loko n'winyi wa njangu vamuchulile lesvaku i Belzebule, ka va njangu wa yena svitatlula mpimo.

Ta lweyi afanelaka kuchaviwa

²⁶ Hikolaho mingatshukeni michava vanhu, hikuva aku na xilo lexingafunengetiwa lexingatakala xingafununguliwi, ni xilo xa xihundla lexingatakala xingativiwi.

²⁷ Lesvi nimibzelaka svona axinyameni, svivuleni kuvonakaleni; ni lesvi misvitwaka svihleveteliwa tindleveni, svihuweleleni asvichungweni sva tiyindlo.

²⁸ Mingatshukeni michava lavadlayaka miri, na valihava matimba yodlaya moya; kambe chavani lweyi anga ni matimba yolovisa moya ni miri wa munhu Tiheleni.

²⁹ Xana svindzingiri svimbirhi asvixaviwi hi “sentavhu” yin'we ntsena ke? Kasi akungawi ni xin'we xa svona hansi, handle ka kurhandza ka Tatana wa n'wina.

³⁰ Xilesvo, loko kuli n'wina, hambi yili misisi ya tinhloko ta n'wina yihlayiwile hinkwayu.

³¹ Hikolaho mingachaveni; n'wina mitlula svindzingiri lesvotala hi risima.

Ta kuvula Kriste mahlweni ka vanhu

³² Mani na mani lweyi angatanivula mahlweni ka vanhu, na mina nitamuvula mahlweni ka Tatana wa mina lweyi anga matilweni.

³³ Kambe mani na mani lweyi angatanilandzula mahlweni ka vanhu, na mina nitamukaneta mahlweni ka Tatana wa mina lweyi anga matilweni.

Matlhari matshan'weni ya kurhula

³⁴ Mingatshukeni mipimisa lesvaku nitile kutisa kurhula misaveni; kambe, nitisa tlhari, kungali kurhula.

³⁵ Hikuva nitile kutahambanisa “‘munhu ni tatana wa yena, nhwanyana ni mamana wa yena, mamanyana ni n'wingi wa yena;

³⁶ ni svirho sva njangu wa munhu svitava valala va yena.’ ”

³⁷ Lweyi arhandzaka tatana wa yena kumbe mamana wa yena kutlula mina, asvimufaneli kuva wa mina; svitano ni lweyi arhandzaka n'wana wa yena waxinuna kumbe waxisati kutlula mina.

³⁸ Nasvona, lweyi angatekiki xihambanu xa yena anilandza anganifaneli.

³⁹ Lweyi alavaka kutihlayisela vutomi bza yena, atalahlekeliwa hi bzona; kambe lweyi alahlekeliwaka hi vutomi bza yena hikolaho ka mina, atabzikuma.

Ta hakelo

⁴⁰ Lweyi amiyamukelaka, waniyamukela; ni lweyi aniyamukelaka, ayamukela lweyi anirhumeke.

⁴¹ Lweyi ayamukelaka muprofeta hi lesvi anga muprofeta, atakuma hakelo yofana ni ya muprofeta; ni lweyi ayamukelaka lweyi alulameke hi lesvi anga lweyi alulameke, atakuma hakelo yofana ni ya lweyi alulameke.

⁴² Nitiyisile nili ka n'wina: Mani na mani lweyi anyikaka hambi wuli ndzheko wa mati yotitimela ka mun'we wa lavatsongo lava, hi kutiva lesvaku i mujondzisiwa wa mina, angakala angapfumali hakelo ya yena.