Matewu 1 - Testamente Leyimpsha Xichangana

Ta rixaka ra Yesu Kriste

¹ Leyi i buku ya nxaxameto wa rixaka ra Yesu Kriste, N'wana Davhida, N'wana Abrahamu:

² Abrahamu aveleki Izaki, Izaki aveleka Yakobe, Yakobe aveleka Yuda ni vamakwavu,

³ Yuda na Tamara vaveleka Farezi na Zera, Farezi aveleka Esromo, Esromo aveleka Arama.

⁴ Arama aveleka Aminadaba, Aminadaba aveleka Nasoni, Nasoni aveleka Salmoni,

⁵ Salmoni na Rahabe vaveleka Bowazi, Bowazi na Ruti vaveleka Obede, Obede aveleka Yese, Yese aveleka hosi Davhida.

⁶ Davhida ni lweyi aali nsati wa Uriya vaveleka Solomoni;

⁷ Solomoni aveleka Robuwamu, Robuwamu aveleka Abiya, Abiya aveleka Aza,

⁸ Aza aveleka Yosafati, Yosafati aveleka Yorama, Yorama aveleka Uziya;

⁹ Uziya aveleka Yothamu, Yothamu aveleka Akazi, Akazi aveleka Hezekiya.

¹⁰ Hezekiya aveleka Manase, Manase aveleka Amosi, Amosi aveleka Yosiya;

¹¹ Yosiya aveleka Yekoniya ni vamakwavu, nkarhini lowu vayisiweke ha wona vukaraweni, Babilona.

¹² Loko vayisiwile Babilona, Yekoniya aveleka Salatiyele, Salatiyele aveleka Zerubabele,

¹³ Zerubabele aveleka Abiyudi, Abiyudi aveleka Eliyakimi, Eliyakimi aveleka Azori;

¹⁴ Azori aveleka Sadoki, Sadoki aveleka Akimi, Akimi aveleka Eliyudi,

¹⁵ Eliyudi aveleka Eliyazari, Eliyazari aveleka Matani, Matani aveleka Yakobe;

¹⁶ Yakobe aveleka Yosefa nuna wa Mariya, lweyi angaveleka Yesu, lweyi ativiwaka hi vito ra ku i Kriste.

¹⁷ Hikolaho-ke, kusukela ka Abrahamu kuyafika ka Davhida, tinxaka hinkwatu i khume ni mune; kusukela ka Davhida kuyafika nkarhini wa kuyisiwa Babilona i khume ni mune wa tinxaka; kutani kusukela nkarhini wa kuyisiwa Babilona kuyafika ka Kriste, i khume ni mune wa tinxaka.

Ta kuvelekiwa ka Yesu

¹⁸ Kuvelekiwa ka Yesu Kriste kuhumelelile hi ndlela leyi: Loko Mariya mamana wa yena atshembisiwile hi Yosefa, otshuka atikuma na ali ni nyimba hi Moya Lowokwetsima na vangasihlangana.

¹⁹ Lesvi Yosefa nuna wa yena aali munhu wolulama, nasvona aangalavi kumukhomisa tingana, ayendla makungu ya kumutshika xihundleni.

²⁰ Loko ahapimisa svosvo, ntsumi ya Hosi yihumelela ka yena hi norho, yiku: “Yosefa n'wana Davhida, ungachavi kutitekela Mariya nsati wa wena, hikuva lesvi anga na svona svihuma ka Moya Lowokwetsima.

²¹ Ataveleka n'wana wa mufana, kutani wena utamuchula vito ra Yesu, hikuva hi yena lweyi angataponisa vanhu va yena asvijohweni sva vona.”

²² Lesvi hinkwasvu svihumelelile lesvaku kuhetiseka lesvi Hosi ayisvivulile hi muprofeta lweyi angaku:

²³ “Masvivo, wanhwanyana atakuma nyimba, ataveleka n'wana wa mufana; vatamuchula vito ra ‘Emanuwele’ (hi lesvaku: ‘Xikwembu xi na hina.’”)

²⁴ Loko Yosefa apfukile hi le vurhongweni, ayendla hilaha ntsumi ya Hosi yingamubzela hakona, atitekela nsati wa yena.

²⁵ Kambe angamutivanga kukondza kuvelekiwa n'wana wa mufana, kutani amuchula vito ra Yesu.