Marka 9 - Testamente Leyimpsha Xichangana

¹ Atlhela aku ka vona: “Nitiyisile nili ka n'wina: Van'wana ka lava vangakola, ku ni lava vangatakala vangaringi rifu, vangasivona Mfumu wa Xikwembu wufika hi matimba.”

Ta kuvangama ka Yesu

² Ndzhaku ka ntlhanu wa masiku ni rin'we, Yesu ateka Petrosi na Yakobe na Yohani, aya na vona ntshaveni leyoleha na vali voxe. Kutani avangama mahlweni ka vona;

³ Sviyambalu sva yena svisungula kuvangama, svibasa svinene, kutlula lesvi vahlampsi va laha misaveni vangasvibasisisaka xisvona.

⁴ Kutani Eliya na Moxe vahumelela ka vona, na vali karhi vavulavula na Yesu.

⁵ Hi loko Petrosi aku ka Yesu: “Mujondzisi svisasekile loko hili kola; ahiyakeni mintsonga yinharhu, wun'we wa wena, wun'wana wa Moxe, ni wun'wana wa Eliya.”

⁶ Aangasvitivi lesvaku atavula yini, hikuva avachavile ngopfu.

⁷ Kutani refu rita ritavafunengeta, kuhuma ni rito arefini leringe: “Lweyi i N'wananga lweyi arhandzekaka; muyingiseni.”

⁸ Hi nomo-lo, varhalarhala hinkwaku, kambe vangahavoni munhu, loko angali Yesu ntsena.

⁹ Loko vahaxika hi le ntshaveni, Yesu avalaya aku: “Mingatshukeni mibzela munhu lesvi misvivoneke, N'wana-wa-Munhu angasipfuka kufeni.”

¹⁰ Vona vahlayisa mhaka leyi, na vali karhi vavutisana vaku: “Xana i mpsini Kupfuka kufeni?”

¹¹ Kutani vamuvutisa vaku: “Hikolaho ka yini Vatsali vavula lesvaku Eliya afanele kurhanga ata xana?”

¹² Avahlamula aku: “Eliya afanele kurhanga ata hakunene, atlhela apfuxeta hinkwasvu; kambe hikolaho ka yini kutsaliwile lesvaku N'wana-wa-Munhu atafanela kutwisiwa kuvaviseka lokukulu, ava asoliwa ke?

¹³ Ntsena namibzela lesvaku Eliya atile, kutani vamuyendlile hinkwasvu lesvi vasvirhandzeke, hilaha kutsaliweke hakona henhla ka timhaka ta yena.”

Ta Yesu loko ahanyisa n'wana lweyi anga ni moya wa chaka

¹⁴ Kuteloko vafikile ka vajondzisiwa lavan'wana, vakuma xitshungu lexikulu na xivarhendzelile vasala xikarhi, ni Vatsali na vali karhi vaphikizana na vona.

¹⁵ Loko xitshungu hinkwaxu xivona Yesu, xihlamala ngopfu, kutani xitsutsuma xiyahlangana na yena, lesvaku xitamuxeweta.

¹⁶ Yena axivutisa aku: “I ncini lexi miphikizanaka ni vajondzisiwa ha xona ke?”

¹⁷ Mun'we xikarhi ka xitshungu ahlamula aku: “Mujondzisi, nitisile n'wana wa mina ka wena; animoya lowu wumuyendlaka mbheveve.

¹⁸ Loko wumukhoma, wamutlatlalata la hansi, atlhutlha khuvi, aphorhela matinyo, kutani awoma svirho; nikombelile vajondzisiwa va wena lesvaku vawuhlongola, kambe vatsandzekile.”

¹⁹ Yesu ahlamula, aku: “Ha! Rixaka leringapfumeliki, nitava na n'wina kufika rini? Nitamilehisela mbilu kufika rini ke? Mutiseni halenu!”

²⁰ Kutani vamutisa ka yena. Loko moya wuvona Yesu, wurhurhumelisa n'wana hi matimba, awela hansi, avumbulukela na ali karhi atlhutlha khuvi.

²¹ Yesu avutisa tatana wa yena, aku: “Xana svimusungulile rini?” Aku: “Kusukela loko ahali ntsongo!

²² Makhambi yotala wumuwisela ndzilweni kumbe matini lesvaku wumudlaya; kambe loko usvikota, hitwele vusiwana uhipfuna.”

²³ Yesu aku ka yena: “Uli, ‘loko usvikota’? Hinkwasvu svakoteka ka lweyi apfumelaka.”

²⁴ Tatana wa n'wana ahantla atlakusa rito, aku: “Napfumela! Nipfune kutiyisa vupfumeli bza mina.”

²⁵ Loko Yesu avona lesvaku xitshungu xiya xiyengetelana, akhahla moya wa chaka, aku: “Wena moya lowungavulavuliki, nasvona wungatwiki, nakubzela nilihuma ka n'wana lweyi, ungahatlheli uvuya ka yena ni siku ni rin'we!”

²⁶ Kutani wuhuma na wulikarhi wuhuwelela, wurhurhumelisa n'wana hi matimba, avatani hi lweyi afeke, lavotala vakondza vaku: “Afile.”

²⁷ Kambe Yesu amukhoma hi voko, amupfuxa, kutani ayima.

²⁸ Kuteloko Yesu anghenile ndlwini, vajondzisiwa va yena vamuvutisa na vali tlhelweni vaku: “Xana hina hitsandzekile ha yini kuhlongola moya lowu ke?”

²⁹ Aku ka vona: “Arixaka leri ra moya wotanu arikoti kuhuma loko kungali hi kukhongela ntsena.”

Ta Yesu loko atlhela ativisa ta rifu ra yena

³⁰ Loko vasuka kolaho, vatsemakanya Galileya, kambe Yesu aangalavi lesvaku svitiviwa hi munhu;

³¹ hikuva aajondzisa vajondzisiwa va yena, kutani aku ka vona: “N'wana-wa-Munhu atanyiketiwa svosvi mavokweni ya vanhu. Vatamudlaya; loko vamudlayile, atapfuka kufeni hi siku ra vunharhu.”

³² Kambe avatwisisanga marito lawa, nasvona avachava kumuvutisa.

I mani lwenkulu xikarhi ka vajondzisiwa?

³³ Vafika Kapernawume. Loko Yesu anghenile ndlwini, avutisa vajondzisiwa aku: “Amiphikizana hi mhaka yihi laha ndleleni xana?”

³⁴ Kambe vamiyela, hikuva ndleleni avaphikizana hi mhaka yaku lweyi nkulu ka vona i mani.

³⁵ Kuteloko Yesu atshamile hansi, avitana lava va khume ni vambirhi, aku ka vona: “Loko mun'we arhandza kuva lweyi worhanga, aave lweyi wogamesa ka hinkwavu, ava xitirhi xa hinkwavu.”

³⁶ Kutani ateka ntsongwana, amuyimisa xikarhi ka vona; kuteloko amuvukarhile mavokweni, aku ka vona:

³⁷ “Lweyi ayamukelaka mun'we wa vatsongwana lava hi vito ra mina, ayamukela mina; ni lweyi aniyamukelaka, angayamukeli mina ntsena, kambe ayamukela ni lweyi anirhumeke.”

Lweyi angalwiki na hina, ayima na hina

³⁸ Kutani Yohani amubzela aku: “Mujondzisi, hivonile mun'we lweyi angaliki wa hina, ahlongola madimoni hi vito ra wena, kutani himutsimbisile hikuva ahi mun'we wa hina.”

³⁹ Kambe Yesu aku: “Mingatshukeni mimusivela, hikuva aku na munhu lweyi angavulaka svobiha hi mina, ni kuyendla mahlori hi vito ra mina.

⁴⁰ Lweyi angalwiki na hina, ayima na hina.

⁴¹ Nitiyisile nili ka n'wina: Munhu lweyi aminyikaka ndzheko wa mati hi lesvi mivuliwaka va ka Kriste, angakala angapfumali hakelo ya yena.

Ta svikhunguvanyiso

⁴² “Lweyi akhunguvanyisaka mun'we wa lavatsongo lavapfumelaka ka mina, svingayampsa loko aboheleliwa ribze ra kusilela ka rona nhan'wini, ahoxiwa lwandle.

⁴³ Loko voko ra wena rikukhunguvanyisa, ritseme; svingayampsa loko unghena vuton'wini na uli xilima, kutlula kuya Tiheleni, ndzilweni lowungatimekiki, na uli ni mavoko mambirhi. [

⁴⁴ Axivandleni xoxo, ‘xivungwana lexi xivajaka axifi, ni ndzilo awutimeki.’]

⁴⁵ Ni loko nenge wa wena wuku khunguvanyisa, wutseme; svingayampsa loko unghena vuton'wini na uli karhi ukhwita, kutlula kuhoxiwa Tiheleni na uli ni milenge yimbirhi.

⁴⁶ Axivandleni xoxo, ‘xivungwana lexi xivajaka axifi, ni ndzilo awutimeki.’

⁴⁷ Ni loko tihlo ra wena rikukhunguvanyisa, rixokole; svingayampsa loko unghena Mfun'wini wa Xikwembu ufe tihlo rin'we, kutlula kuhoxiwa Tiheleni na uli ni mahlo mambirhi.

⁴⁸ Axivandleni xoxo, ‘xivungwana lexi xivajaka axifi, ni ndzilo awutimeki.’

⁴⁹ “mun'wana ni mun'wana atalungiwa hi ndzilo, kufana ni timhamba leticheliwaka munyu.

⁵⁰ “Munyu i xilo lexinandzihaka; kambe loko munyu wupshama, mitawupfuxeta ha yini ke? Vanani munyu ha n'wexe, mihanya hi kurhula ni van'wana.”