Marka 8 - Testamente Leyimpsha Xichangana

Ta Yesu loko aphamela vanhu va mune wa makhulu (4 000)

¹ Masikwini wolawo xitshungu lexikulu xitlhela xihlengeletana, kutani axingali na svakuja; hi loko Yesu avitana vajondzisiwa va yena, aku ka vona:

² “Nitwela vusiwana xitshungu lexi, hikuva sviyendla masiku manharhu na xitshame na mina, kutani axahali na svakuja.

³ Hikolaho loko nixitlhelisela makaya na xili ni ndlala, xitawa ndleleni, hikuva van'we va xona vata hi le kule.”

⁴ Vajondzisiwa va yena vamuhlamula vaku: “Xingalaveliwa kwihi svakuja lesvi xingajaka xixurha kola mananga ke?”

⁵ Avavutisa aku: “Mi ni svinkwa svingani ke?” Vaku: “Hi ni ntlhanu wa svinkwa ni svimbirhi.”

⁶ Hi loko abzela xitshungu lesvaku xitshama hansi, kutani ateka svinkwa lesvi sva ntlhanu ni svimbirhi, akhensa, asvikhemelela, asvinyika vajondzisiwa va yena, lesvaku vayavela xitshungu; hi loko xitshungu xiyaveliwa.

⁷ Nasvona avali ni svihlampfana svingali svingani; kuteloko akhensile, alerisa lesvaku nasvona sviyaveliwa vanhu.

⁸ Kutani vaja vaxurha, varholela ni matlhantlha lawa masaleke, matata svirhundzu sva ntlhanu ni svimbirhi;

⁹ kasi vanhu avalava kuringana mune wa makhulu (4 000) Kutani avatlhelisela makaya.

¹⁰ Kutani ahantla anghena bzatsweni ni vajondzisiwa va yena, aya tikweni ra Dalmanuta.

Ta Vafarisi loko vakombela xikombiso

¹¹ Kuhumelela Vafarisi, vasungula kuphikizana na yena, vamuringa hi kukombela xikombiso lexihumaka tilweni.

¹² Hi loko Yesu aketa moyeni wa yena aku: “Rixaka leri rikombelela yini xikombiso? Nitiyisile nili ka n'wina: Rixaka leri aringanyikiwi xikombiso!”

¹³ Kutani avasiya, atlhela anghena bzatsweni, atsemakanya aya ka tlhelo rin'wana.

Ta comela ra Vafarisi ni ra Heroda

¹⁴ Vajondzisiwa avarivalile kuteka svinkwa, avova ni xinkwa xin'we ntsena bzatsweni.

¹⁵ Kutani avalaya, aku: “Tlharihani, michava comela ra Vafarisi, ni comela ra Heroda!”

¹⁶ Kutani vaphikizana vaku: “Kumbe hi lesvi hingaliki ni svinkwa.”

¹⁷ Kuteloko Yesu asvitwa, aku ka vona: “Hikolaho ka yini miphikizana hi lesvi mingaliki ni svinkwa xana? Amisisvitwa ni kusvitwisisa xana? Xana timbilu ta n'wina taha nonon'hwa ke?

¹⁸ Lesvi minga ni mahlo amivoni ke? Lesvi minga ni tindleve, amitwi ha yini-ke? Amitsundzuki xana?

¹⁹ Siku leri nikhemeleleke ntlhanu wa svinkwa ninyika lava va ntlhanu wa makhulu (5 000), xana mirhwele svirhundzu svingani lesvi asvitele hi matlhantlha ke?” Vaku ka yena: “Hirhwele khume ni svimbirhi”

²⁰ “Ni siku leri niphameleke lava va mune wa makhulu (4 000) hi ntlhanu wa svinkwa ni svimbirhi, mirhwalile svirhundzu svingani lesvi asvitele hi matlhantlha ke?” Vaku: “Hirhwele ntlhanu ni svimbirhi.”

²¹ Kutani aku ka vona: “Amisitwisisa ni svosvi-ke?”

Ta kuhanyisiwa ka xifamahlo xa Betisayida

²² Vafika Betisayida. Kutani vatisa munhu wa kufa mahlo, vakombela Yesu lesvaku amukhumba.

²³ Hi loko akhoma xifamahlo hi voko, axiyisa handle ka xidoropana, axipshitela marhi matihlweni axitlhanteka mavoko, axivutisa aku: “Xana uvona xanchumu ke?”

²⁴ Xona, xitlakusa mahlo, xiku: “Nivona vanhu, nivavona na vafambafamba, vafana ni minsinya.”

²⁵ Yesu atlhela aveka mavoko ya yena matihlweni ya xifamahlo, xona xihonoka kutani xihanyisiwa, xivona svilo hinkwasvu khwatsi.

²⁶ Yesu axibzela lesvaku xifamba, aku: “Ungatshuki utlhelela axidoropanini.”

Ta Petrosi loko avula lesvaku Yesu i mani

²⁷ Kutani Yesu asuka ni vajondzisiwa va yena, vaya svidoropanini sva Khezariya wa Filipi. Ndleleni, avutisa vajondzisiwa va yena aku ka vona: “Vanhu vali ni mani xana?”

²⁸ Vona vaku: “Van'wana vali, hi wena Yohani Mukhuvuli; van'wana vali, hi wena Eliya; van'wana vali, u mun'we wa vaprofeta.”

²⁹ Kutani avavutisa aku: “Xana n'wina, mili nimani ke?” Petrosi ahlamula aku ka yena: “Hi wena Kriste.”

³⁰ Hi loko avalaya lesvaku vangatshuki vabzela vanhu, hambi kuvulavula hi yena vanhwini.

Ta Yesu loko ativisa rifu ra yena

³¹ Kutani Yesu asungula kuvajondzisa aku: “N'wana-wa-Munhu atafanela kutwisiwa kuvaviseka lokukulu, asoliwa hi vakulukumba ni Vaprista lavakulu, ni Vatsali; atadlawa, atlhela apfuka hi siku ra vunharhu.”

³² Avula mhaka leyi rivaleni; kutani Petrosi amutekela tlhelweni, asungula kumutshinya.

³³ Kambe Yesu ahundzukula; kuteloko alangutile vajondzisiwa va yena, atshinya Petrosi, aku: “Suka ka mina Sathana, hikuva awuyehleketi sva Xikwembu, uyehleketa sva vanhu ntsena.”

³⁴ Kuteloko avitanile xitshungu ni vajondzisiwa va yena, aku ka vona: “Loko munhu alava kunilandza, aatitshike, atirhwexa xihambanu xa yena, kutani anilandza.

³⁵ Lweyi arhandzaka kutihlayisela vutomi bza yena atalahlekeliwa hi bzona; kambe lweyi alahlekeliwaka hi vutomi bza yena hikolaho ka mina ni hikolaho ka Evhangeli, atabziponisa.

³⁶ Hikolaho, loko munhu akota kufuwa misava hinkwayu, kambe alahlekeliwa hi vutomi bza yena svingamupfuna yini ke?

³⁷ Xana munhu angahumesa yini kuxava vutomi bza yena ke?

³⁸ Lweyi anga ni tingana hikolaho ka mina ni marito ya mina rixakeni leri ra vawosvi ni vajohi, N'wana-wa-Munhu na yena atakhomiwa hi tingana hikolaho ka munhu lweyi siku leri angatavuya akukwetsimeni ka Tatana na ali ni tintsumi letokwetsima.”