Marka 7 - Testamente Leyimpsha Xichangana

Ta mikhuva ya Vayuda va khale

¹ Vafarisi ni Vatsali van'wana lavahumaka Yerusalema, vatahlengeletana laha Yesu aali kona;

² loko vavona vajondzisiwa van'wana va yena, vaja svakuja hi mavoko lawa machakeke, hi lesvaku lawa mangahlambiwangiki.

³ Mhaka hi lesvaku, hinkwavu Vafarisi ni Vayuda hi nawu wa vona avaji na vangasihlamba mavoko, kutani hi ndlela yoleyo, vahlayisa mikhuva leyi vayiyamukeleke ka lava va khale.

⁴ Ni loko vavuya hi le kuxaveni, avaji na vangasihlamba, vaha hlayisa ni mikhuva yin'wana leyotala leyi vayitoloveleke, tani hi leyi ya kuhlampsa mindzheko, timbita, svibza sva koporo ni mibedo.

⁵ Kutani Vafarisi ni Vatsali vamuvutisa, vaku: “Hikolaho ka yini vajondzisiwa va wena vangahanyi mayelanu ni mikhuva ya lava va khale xana; na svona, hikolaho ka yini vaja svakuja na vangahlambanga mavoko?”

⁶ Avahlamula aku: “Ezaya aavula n'wina hakunene, n'wina vakanganyisi, loko atsalile aku:” “‘Vanhu lava vanixixima hi nomo, kambe timbilu ta vona ti le kule na mina;

⁷ vatikarhata ntsena hi kunikhinsamela, tijondzo leti vatijondzisaka i milawu ka vanhu ntsena.’”

⁸ “Mitshika Nawu wa Xikwembu, kambe minamarhela mikhuva leyi miyikumeke ka vanhu ntsena.”

⁹ Atlhela aku ka vona: “Mi ni tindlela totala totshika ha tona Nawu wa Xikwembu, miyendlela kuhlayisa mikhuva ya n'wina leyi miyitoloveleke.

¹⁰ Hikuva Moxe ate: ‘Uva ni xichavu ka tatana wa wena ni ka mamana wa wena.’ Nasvona ate: ‘Lweyi arhuketelaka tatana wa yena, kumbe mamana wa yena, aadlawe!’

¹¹ Kasin'wina mili, loko munhu aku ka tatana wa yena, kumbe ka mamana wa yena: Lesvi ningakupfunaka hi svona, i korbani (hi lesvaku mhamba leyihlayiseliweke Xikwembu),

¹² n'wina amimupfumeleli kuyendlela tatana wa yena kumbe mamana wa yena xanchumu;

¹³ hi ndlela leyi, miwonha rito ra Xikwembu hi mikhuva ya n'wina leyi minyikaka ni van'wana; miyendla ni svin'wana lesvotala svofana nisvosvo.”

Ta svilo lesvinyamisaka

¹⁴ Yesu atlhela avitana xitshungu aku ka xona: “Niyingiseni hinkwenu, mitwisisa.

¹⁵ Aku na nchumu lexingahandle ka munhu, lexikotaka kumunyamisa loko xinghena ka yena, kambe lexihumaka ka yena, hi xona lexi ximunyamisaka.” [

¹⁶ Lweyi anga ni tindleve ta kuyingisa, aayingise.]

¹⁷ Loko asukile axitshungwini, anghena ndlwini, vajondzisiwa va yena vamuvutisa mayelanu ni xifaniso lexi.

¹⁸ Aku ka vona: “Kasi na n'wina, amitwisisi xana? Amisvitivi xana lesvaku hinkwasvu sva le handle, loko svinghena ka munhu, asvikoti kumunyamisa,

¹⁹ hikuva asvingheni mbilwini ya yena, kambe sviya khwirini, kutani sviyahumela akhwatini ke?” (Hikuvula svosvo Yesu aakomba lesvaku svakuja hinkwasvu svilulamile, kumbe svibasile.)

²⁰ Atlhela aku: “Lesvi humaka ka munhu hi svona lesvi svimunyamisaka,

²¹ hikuva ndzeni, timbilwini ta vanhu, hi kona kuhumaka miyehleketo leyobiha, vuphukuphuku, vuyivi, vudlayi,

²² vuwosvi, kunavela rifuwo; hi kona kuhumaka lunya, kuxisa, sva tingana, mavondzo, kusandza, kutikulisa ni vuhunguki.

²³ Hinkwasvu lesvobiha lesvi, svihuma ndzeni ka mbilu, kutani hi svona lesvinyamisaka munhu.”

Ta kupfumela ka wansati wa rixaka ra Vasiro-Fenisa

²⁴ Loko asuka kolaho, aya tikweni ra Tiro. Kutani anghena ka yin'we ya tiyindlo, hikuva aangalavi lesvaku svitiviwa hi munhu; hambi svilitano angakotangakutifihla.

²⁵ Kutani wansati mun'we lweyi n'wana wa yena wanhwanyana aangheniwile hi moya wa chaka, loko atwile timhaka ta Yesu, ata hi kuhantlisa, akhinsama milengeni ya yena.

²⁶ Wansati lweyi aali wa matiko, wa rixaka ra Vasiro-Fenisa; akombela Yesu lesvaku ahlongola dimoni, rihuma ka n'wana wa yena.

²⁷ Kambe Yesu aku ka yena: “Tshika vana varhanga vaja vaxurha, hikuva asvisasekanga kutekela vana svakuja uhoxela svimbzanyana.”

²⁸ Wansati amuhlamula, aku: “Hosi! Hambi svili svimbzanyana lesvinga hansi ka meza, svaja matlhantlha lawa mawisiwaka hi vana.”

²⁹ Hi loko aku ka yena: “Hikolaho ka rito leri, famba, dimoni rihumile ka n'wana wa wena.”

³⁰ Loko wansati atlhelela kaya, ayakuma n'wana na ayetlele sangwini, ni dimoni rihumile.

Ta Yesu loko ahanyisa munhu wa manghanghamela lweyi afeke ni tindleve

³¹ Loko Yesu avuya hi le tikweni ra Tiro, ahundza hi le Sidoni, akongoma tiva ra Galileya hi kutsemakanya tiko ra Dekapolisi.

³² Kutani vamutisela munhu wa kufa tindleve, wa manghanghamela; vakombela Yesu lesvaku amutlhanteka mavoko.

³³ Kuteloko Yesu amususile xitshungwini, amutekela tlhelweni, anghenisa tintiho tindleveni ta yena, apshitela marhi, akhumba ririmi ra yena ha tona;

³⁴ kutani alanguta henhla tilweni, ahefemuteka, aku ka munhu lweyi: “Efata!” Hi lesvaku: “Pfuleka!”

³⁵ Hi loko tindleve ta yena tihantla tipfuleka, na rona ririmi ra yena ritshunxeka, kutani avulavula hi kuwolova.

³⁶ Hi loko Yesu avatshinya lesvaku vangabzeli munhu; kambe, hambi loko avatshinyile makhambi yotala, avasvihangalasa hi matimba.

³⁷ Kutani vanhu vahlamala ngopfu, vaku: “Ayendlile hinkwasvu hi ndlela leyinene; apfula tindleve ta lavangayingisiki ayendla lesvaku na tona timbheveve tikota kuvulavula.”