Marka 6 - Testamente Leyimpsha Xichangana

Ta Yesu loko angayamukeliwi Nazareta

¹ Yesu asuka kolaho, atlhelela tikweni ra le kwavu, kutani vajondzisiwa va yena vamulandza.

² Kuteloko kufikile siku ra Savata asungula kujondzisa sinagogeni, kutani lavotala lava vamuyingisaka, vahlamala vaku: “Xana svilo lesvi asvikume kwihi ke? I vutlhari muni lebzi abzinyikiweke, lesvi ni mahlori akotaka kumayendla hi mavoko ya yena xana?

³ Xana yelweyi ahi yena muvatli, n'wana Mariya, makwavu wa Yakobe, na Yosefa, na Yuda, na Simoni ke? Xana vamakwavu vaxisati ahi na vona kola ke?” Kutani vakhunguvanyeka svinene hikolaho ka yena.

⁴ Yesu aku ka vona: “Muprofeta angasoliwi, loko kungali tikweni ra yena ni ka le kwavu ni le maxakeni ya yena.”

⁵ Kutani atsandzeka kuyendla mahlori kona, loko kungali kuhanyisa timbabzi tingali tingani, hi kuvatlhanteka mavoko.

⁶ Nasvona ahlamala hi kuvona lesvaku avangalina kupfumela. Kutani arhendzeleka hi svidoropana lesvi asvili kusuhi, na ali karhi ajondzisa.

Ta kurhumiwa ka lava va khume ni vambirhi

⁷ Avitana lava va khume na vambirhi, avarhuma ha vambirhivambirhi, avanyika matimba yohlula mimoya ya chaka.

⁸ Avabzela lesvaku vangatshuki valonga nchumu xa ndlela loko kungali nhonga ntsena; vangateki timbuva ni nkwama, hambi yili male asvikhwameni sva vona;

⁹ masandhazi wona vangayambala, kambe vangateki sviyambalu svocinca.

¹⁰ Aku ka vona: “Loko minghena njangwini wokarhi tshamani kolaho, mikondza misuka ku wona.

¹¹ Hinkwaku lomu vayalaka kumiyamukela ni kumiyingisa, mphumunhani ntshuri hansi ka minkondzo ya n'wina loko mihuma, svitava vumboni ka vona.”

¹² Kuteloko vasukile, vajondzisa vanhu rivaleni lesvaku vahundzuka;

¹³ vahlongola madimoni lawa yotala, vatota timbabzi letotala hi mafurha, vavahanyisa.

Ta kufa ka Yohani Mukhuvuli

¹⁴ Hosi Heroda aatwile hi ta Yesu, hikuva vito ra yena aridumile ngopfu, nasvona vanhu avaku: “Yohani Mukhuvuli apfukile kufeni; hi svona lesviyendlaka lesvaku mintirho leyi ya matimba yivoneka ka yena”

¹⁵ Van'wana avaku: “I Eliya.” Van'wana avaku: “I muprofeta lweyi afanaka ni mun'we wa vaprofeta va khale.”

¹⁶ Kambe Heroda, loko asvitwa, aku: “Hiye Yohani lweyi ningamutsema nhloko. Ayopfuka kufeni.”

¹⁷ Heroda hi yena hakunene lweyi aarhumile vanhu kuyakhoma Yohani, ava amupfalela jele. Aayendlile svosvo hikolaho ka Herodiya, nsati wa Filipi makwavu, hikuva aachadile na yena.

¹⁸ Hikuva Yohani aabzela Heroda aku: “Awupfumeleliwi kutekela makwenu nsati wa yena.

¹⁹ Hikolaho Herodiya ahlundzukela Yohani, anavela kumudlaya, kambe aatsandzeka,”

²⁰ “hikuva Heroda aachava Yohani, hi kutiva lesvaku i munhu wolulama, lweyi ahlawulekeke; kutani aamulwela. Masiku hinkwawu loko atwa Yohani, aakarhateka svinene; hambi svilitano aatsakela kumuyingisa.”

²¹ Kambe siku rinene rifika, ra loko Heroda ayendlela tihosana ta yena ni tindhuna ta nyimpi ni vakulukumba va Galileya nkhuvo wa siku ra kuvelekiwa ka yena

²² Loko n'wana wa Herodiya waxisati anghena acina, atsakise Heroda ni lavatshameke kujeni na yena. Hosi yiku ka nhwanyana: “Kombela lesvi usvirhandzaka ka mina nitakunyika svona.”

²³ Atlhela amuhlambanyela hi matimba, aku: “Lesvi ungatasvikombela ka mina nitakunyika svona, hambi kuli kukupandzela hi le xikarhi tiko leri nirifumaka.”

²⁴ Nhwanyana ahuma, ayavutisa mamana wa yena aku: “Nitakombela yini xana?” Yena aku: “Kombela nhloko ya Yohani Mukhuvuli!”

²⁵ Hi kuhantlisa na ahefemuteka anghena ka hosi, akombela lesvi: “Nilava lesvaku uninyika nhloko ya Yohani Mukhuvuli ankambanini, svosvisvosvi.”

²⁶ Hosi yikhomiwa hi tingana ngopfu, kambe hikolaho ka kuhlambanya ka yona ni hikolaho ka lavatshameke kujeni, ayikotanga kumuyalela.

²⁷ Hosi yihantla yirhuma musochwa wa jele, yilerisa lesvaku kutisiwa nhloko ya Yohani.

²⁸ Musochwa afamba jele ayamutsema nhloko, ayitisa ankambanini, anyika nhwanyana; yena anyika mamana wa yena.

²⁹ Loko vajondzisiwa va Yohani vasvitwa, vayateka ntsumbu wa yena, vayawulata sirheni.

Ta kuphameliwa ka vanhu va ntlhanu wa makhulu (5 000)

³⁰ Vapostola vayahlangana na Yesu, vamurungulela hinkwasvu lesvi vasviyendleke ni lesvi vasvijondziseke.

³¹ Kambe avangalina nkarhi wa kuja, hikuva vanhu lavotala avata, vatlhela vafamba. Kutani Yesu aku ka vona: “Tanani hiyatshama na hili hoxe mananga, mitakota kuwisanyana.”

³² Hi loko vajondzisiwa vanghena bzatsweni, vaya laha kunga mananga na vali voxe.

³³ Kambe lavotala vavavona loko vafamba, vavativa, kutani vahuma madoropeni hinkwawu, vatsutsumela kole hi milenge, vavarhangela mahlweni.

³⁴ Loko Yesu ahuma bzatsweni, avona xitshungu lexikulu, axitwela vusiwana, hikuva axifana ni tinyempfu letingaliki ni murisi; kutani axijondzisa lesvotala.

³⁵ Lesvi jambu aripelile, vajondzisiwa va yena vamutshinelela, vaku: “Lomu i mananga, nasvona ripelile;

³⁶ vatlhelise, vaya masin'wini ni le svidoropanini lesvi svinga kusuhi na hina, vayatixavela svakuja.”

³⁷ Avahlamula, aku: “Vaphameleni n'wina!” Vaku ka yena: “Xana uli hiyavaxavela svinkwa sva tidenari ta madzana mambirhi (200), hitava phamela svona ke?”

³⁸ Yena aku ka vona: “Mi ni svinkwa svingani ke? Yanani miyalanguta.” Kuteloko vasvikambile, vaku: “I ntlhanu wa svinkwa ni tihlampfi timbirhi.”

³⁹ Hi loko avabzela kutshamisisa vanhu hinkwavu hi mintlawantlawa abzanyini bza rihlaza.

⁴⁰ Kutani vatshama hi kulongoloka, vayavane hi mintlawa ya dzana (100) ra vanhu ni ya ntlhanu wa makume (50) ya vanhu.

⁴¹ Hi loko ateka svinkwa sva ntlhanu ni tihlampfi timbirhi, alanguta henhla tilweni, akhensa, akhemelela svinkwa, asvinyika vajondzisiwa va yena lesvaku vasviveka mahlweni ka vanhu ni tihlampfi timbirhi atiyavela hinkwavu.

⁴² Vaja hinkwavu, vaxurha.

⁴³ Kutani varholela matlhantlha ya svinkwa ni ya tihlampfi vatata khume ra svirhundzu ni svimbirhi.

⁴⁴ Lavajeke svinkwa avaringana ntlhanu wa makhulu (5 000) ya vavanuna.

Ta Yesu loko afamba henhla ka mati

⁴⁵ Ndzhaku ka svosvo, Yesu abzela vajondzisiwa va yena lesvaku vanghena bzatsweni, vatavakongoma tlhelweni rin'wana, le Betisayida, loko yena hi yexe ali karhi atlhelisa xitshungu.

⁴⁶ Kuteloko asalisanile ni vanhu, aya ntshaveni kuyakhongela kona.

⁴⁷ Nimajambu, bzatsu arili xikarhi ka tiva, yena ahali tlhelweni na ali yexe.

⁴⁸ Kutani avavona na vali karhi vakarhateka ngopfu hi kutluta bzatsu, hikuva moya awuvasivela; kakuloko kulava kuva nkarhi wa mahlambandlopfu, ata ka vona, na ali karhi afamba henhla ka mati, ayendla ingi arhangela mahlweni.

⁴⁹ Loko vamuvona afamba henhla ka mati, vapimisa lesvaku i xipoko, kutani vaba nyandha;

⁵⁰ avamuvonile hinkwavu, kutani avachava ngopfu; kambe ahantla avulavula na vona, aku: “Tiyisani timbilu, hi mina, mingachaveni!”

⁵¹ Kutani anghena bzatsweni laha avali kona; hi loko moya wumiyela, kutani vahlamala ngopfu,

⁵² hikuva avangatwisisanga sva hlori ra svinkwa, nasvona timbilu ta vona atili letononon'hwa.

Ta Yesu loko ahanyisa timbabzi Genezareta

⁵³ Kuteloko vatsemakayile tiva vaya ka tlhelo lerin'wana, vafika tikweni ra Genezareta, kutani vaxikela ridongeni ra tiva.

⁵⁴ Loko vali karhi vahuma bzatsweni, vanhu vakona vahantla vativa Yesu,

⁵⁵ kutani vatsutsumatsutsuma ka tiko lero hinkwaru, vatisa hi tinhlaka hinkwavu vanhu lavavabzaka, ovalomu avatwa lesvaku Yesu akona.

⁵⁶ Hinkwaku laha aanghena kona, madoropeni, svidoropanini kumbe tihandle ta madoropa, vanhu avalata lavavabzaka mintsendzeleni, kutani vamukhongela lesvaku avapfumelela kukhumba hambi mali makumu ya sviyambalu sva yena ntsena; kutani hinkwavu lava avamukhumba, avahanyisiwa.