Marka 5 - Testamente Leyimpsha Xichangana

Ta kuhanyisiwa ka Mugerasi lweyi aalini moya wa chaka

¹ Kutani vafika tlhelweni rin'wana ra tiva, tikweni ra Vagerasi.

² Loko Yesu ahakuhuma bzatswini, hi nomo-lo munhu mun'we lweyi aali ni moya wa chaka, lweyi aahuma hi le masirheni, ahlangana na yena.

³ Aahanya masirheni, kutani akungali na munhu lweyi aakota kumuboha, hambi kuli hi machini;

⁴ hakanyingi, aabohiwa mavoko ni milenge, kambe aatsema machini yakona, kutani akungali na munhu lweyi aali ni matimba yomuhlula.

⁵ Hi masiku hinkwawu, vusiku ni nhlekanhi, aatshama masirheni ni le tintshaveni, na ali karhi ahuwelela, atitsemelela hi maribze.

⁶ Kuteloko avonile Yesu, ahali kule, atsutsuma, ayamukhinsamela;

⁷ kutani ahuwelela hi rito leritlakukeke, aku: “Mhaka ya mina na wena hi yihi ke, wena Yesu N'wana wa Xikwembu xa le henhlahenhla? Naku khongela hi vito ra Xikwembu, unganixanisi!”

⁸ (Aavula svosvo, hikuva Yesu aate ka yena: “Huma ka munhu lweyi, we moya wa chaka!”)

⁹ Kutani Yesu amuvutisa, aku: “Vito ra wena u mani?” Ahlamula aku: “Vito ra mina ni Vandla, hikuva hitele.”

¹⁰ Kutani akhongela Yesu aku: “Ungahihlongoli hihuma tikweni leri!”

¹¹ Kambe akuli ni ntlhambi lowukulu wa makhumba agangeni, lowu awuli kujeni,

¹² kutani mimoya yoleyo ya chaka yikhongela Yesu, yiku: “Ungahirhumela amakhumbeni, hiyanghena ka wona.”

¹³ Yena ayipfumelela. Hi loko mimoya ya chaka yihuma, yinghena amakhumbeni, kutani ntlhambi wolowo wutsutsumela nkoveni, uyatihoxa xiziveni; makhumba amalava kuringana makhulu mambirhi (2 000), kutani manwela kona.

¹⁴ Varisi va wona vabaleka, vayarungulela vahanyi va le doropeni ni va le masin'wini, kutani vona vata, vatavona lesvihumeleleke.

¹⁵ Kuteloko vafikile ka Yesu, vavona lweyi aangheniwile hi vandla ra madimoni atshamile, ayambalile ali munhu nene, kutani vachava ngopfu.

¹⁶ Lava vasvivoneke vavahlamusela lesvihumeleleke ka munhu lweyi wa madimoni, ni le ka makhumba.

¹⁷ Hi loko vona vakhongotela Yesu lesvaku asuka tikweni ra vona.

¹⁸ Loko Yesu ali karhi anghena bzatswini, munhu lweyi aali ni madimoni akombela svinene lesvaku amupfumelela kunghena atshama na yena bzatsweni.

¹⁹ Kambe Yesu angamupfumelelanga, ntsena ate ka yena: “Famba, kaya ka wena ni ka valekwenu, uyatwalisa hinkwasvu lesvi Hosi yikuyendleleke svona ni hilaha yikutweleke vusiwana hakona.”

²⁰ Hi loko yena asuka, aya tikweni ra Dekapolisi, ayatwalisa hinkwasvu lesvi Yesu amuyendleleke svona; kutani hinkwavu vahlamala.

Ta n'wana Yayiro, ni ta wansati lweyi akhumbeke xiyambalu xa Yesu

²¹ Kuteloko Yesu atlhelele ka tlhelo lerin'wana hi bzatsu, xitshungu lexikulu xitahlengeletana ka yena, kusuhi ni tiva.

²² Kutani kufika mun'we wa varhangeli va sinagoga lweyi avaku i Yayiro. Loko amuvona, atiwisa milengeni ya yena,

²³ amukhongela ngopfu, aku: “N'wana wa mina wanhwanyana wafa. Nakukombela, tana utamutlhanteka mavoko lesvaku apfuka ahanya.”

²⁴ Kutani Yesu afamba na yena; xitshungu lexikulu ximulandza, na xili karhi ximukamanyeta.

²⁵ Kambe akuli ni wansati lweyi aali ni mavabzi ya kuhumela ngati, aavabza hi xipimu xa malembe ya khume ni mambirhi;

²⁶ aaxanisekile ngopfu mavokweni ya tin'anga letotala; aahetile rifuwo ra yena hinkwaru, kambe asvingamupfunanga nchumu, hikuva mavabzi amaya makula.

²⁷ Loko atwile ndhuma ya Yesu, ata axitshungwini hi le ndzhaku ka Yesu, akhoma xiyambalu xa yena, hikuva yena aatibzelile aku:

²⁸ “Loko ningakhumba xiyambalu xa yena ntsena, nitahanyisiwa.”

²⁹ Kutani hi nomo-lo ngati ya yena yiyima yingahahumi, atitwa lesvaku kuvabza ka yena akuhanyisiwile.

³⁰ Hi nomo-lo Yesu asvitwa lesvaku kuhumile matimba ka yena, kutani Yesu ahundzukula ka xitshungu, aku: “I mani lweyi akhumbeke xiyambalu xa mina?”

³¹ Vajondzisiwa va yena vaku ka yena: “Waxivona xitshungu lexi xikukamanyetaka; xana uvutisela yini lesvaku: ‘Nikhumbiwe i mani’ ke?”

³² Yena alangutisisa hinkwaku kuvona lweyi asviyendleke.

³³ Kutani wansati yelweyo akhomiwa hi kuchava, arhurhumela hi kutiva lesvi svimuhumeleleke, kutani ata, atiwisela hansi mahlweni ka Yesu, amubzela ntiyiso hinkwawu.

³⁴ Yesu aku ka yena: “N'wananga, kupfumela ka wena kukuponisile, famba hi kurhula, nakuhanyisa nhlomulweni wa wena.”

³⁵ Aku ahavulavula, vanhu lavahumaka kaya ka murhangeli wa sinagoga vafika vabzela murhangeli wakona vaku: “N'wana wa wena afile, wahamukarhatela yini Mujondzisi ke?”

³⁶ Kambe Yesu angalandzanga hi marito lawa, kutani aku ka murhangeli wa sinagoga: “Ungachavi, pfumela ntsena.”

³⁷ Kutani angapfumelelanga munhu kumulandza, loko angali Petrosi, na Yakobe, na Yohani makwavu wa Yakobe.

³⁸ Loko vafika muntini wa murhangeli wa sinagoga, Yesu akuma kuli ni huwa leyikulu, van'we varila svinene, van'wana vaba nkalanga.

³⁹ Hi loko anghena, aku ka vona: “Mibela yini nyandha leyi, mirilela yini? Nhwanyana lweyi angafanga, ayoyetlela.”

⁴⁰ Kutani vamuhleka, kambe Yesu avahumesa handle hinkwavu, ateka tatana wa nhwanyana ni mamana wa yena ni vajondzisiwa lavanharhu, anghena laha nhwanyana aalatiwile kona.

⁴¹ Kutani akhoma nhwanyana hi voko, aku ka yena: “Talita, kumi!” Hi lesvaku: “Nhwanyana, nili ka wena: Pfuka!”

⁴² Hi nomo-lo nhwanyana apfuka, afambafamba (malembe ya yena amaringana khume ni mambirhi); kolaho vanhu vahlamala hi kuhlamala lokukulu.

⁴³ Kambe Yesu avalayisisa lesvaku svingatshuki svitiviwa hi munhu; kutani aku: “Munyikeni svakuja.”