Marka 4 - Testamente Leyimpsha Xichangana

Ta xifaniso xa muhaxi

¹ Yesu atlhela asungula kujondzisa kusuhi ni tiva. Kutani xitshungu lexikulu xihlengeletana ximutela, kukondza anghena bzatsweni, atshamisa ndzeni ka rona ativeni; loko xili xitshungu hinkwaxu, xona axitshame ridongeni ra tiva.

² Kutani avajondzisa timhaka letotala hi svifaniso. Akujondziseni ka yena avabzela lesvi:

³ “Yingisani! Muhaxi ahumile aya akuhaxeni.

⁴ Loko ali karhi ahaxa, timbewu tin'wana tiwela ndleleni, kutani tinyanyana tita, titaja hinkwatu.

⁵ Tin'wana tiwela amaribzeni, laha akungali na misava leyotala, kutani tihantla timila, hikuva misava ayingatalanga.

⁶ Kambe loko jambu ritlhava, svimilwa svivuna, kutani sviwoma hi kupfumala timintsu.

⁷ Timbewu tin'wana tiwela amintweni; loko mintwa yikula, yiti kamanyeta, kutani tingaveki nchumu.

⁸ Tin'wana kambe tiwela misaveni leyinene, timila, tikula, tiveka timbewu, yin'we yichela makume manharhu, yin'wana ntlhanu wa makume ni rin'we (60), yin'wana dzana (100).”

⁹ Kutani aku: “Lweyi anga ni tindleve toyingisa, aayingise!”

Ta Nkongometo wa svifaniso

¹⁰ Kuteloko Yesu ayile tlhelweni, lava avali kusuhi na yena, svin'we ni lava va khume ni vambirhi, vamuvutisa hi ta xifaniso.

¹¹ Kutani aku ka vona: “N'wina minyikiwile kutiva svihundla sva Mfumu wa Xikwembu, kasi ka lava vanga handle, hinkwasvu svivuliwa hi svifaniso.”

¹² Svinga lesvaku, “‘loko kuli kuvona, vavona, kambe vangavonisisi, hambi kulikutwa, vatwa, kambe vangatwisisi, lesvaku vangatshuki vahundzuka, varivaleliwa svijoho.’”

Ta Yesu loko ahlamusela xifaniso xa muhaxi

¹³ Yesu aku ka vona: “Xana amitwisisi xifaniso lexi ke? Loko svilitano, mitatwisisisa kuyini svifaniso hinkwasvu ke?

¹⁴ Lweyi ahaxaka ahaxa Rito.

¹⁵ Timbewu letingawela ndleleni i vanhu lava Rito rihaxiweke ka vona; kutani loko varitwile, Sathana ahantlisa ata ka vona, avatekela Rito lerihaxiweke.

¹⁶ Timbewu leti tiweleke amaribzeni i vanhu lava loko vatwa Rito, vahantlisaka kuliyamukela hi kutsaka;

¹⁷ kambe vangarinyiki nkarhi woveka timintsu, vatiyisela nkarhinyana ntsena; kutani loko khombo, kumbe kuxaniseka svifika hikolaho ka Rito, vahantlisa vakhunguvanyeka.

¹⁸ Timbewu letiweleke amintweni, hi lava vatwaka Rito;

¹⁹ kambe kuvilela hi sva misava leyi, ni kukanganyisiwa hi rifuwo ni kunavela svilo svin'wana ni svin'wana, svinghena ka vona, svikamanyeta Rito, kutani ritsandzeka kuveka mihandzu.

²⁰ Timbewu letiweleke misaveni leyinene, hi lava vayingisaka Rito, variyamukela, vaveka mihandzu; mbewu yin'we yichela makume manharhu, yin'wana ntlhanu wa makume ni rin'we (60), yin'wana dzana (100).”

Ta xifaniso xa rivoni

²¹ Avabzela kambe aku: “Xana rivoni ritisiwa lesvaku ritambhonyiwa hi xirhundzu, kumbe kuvekiwa hansi ka mubedo ke? Xana aritisiwi kutavekiwa henhla ke?

²² Aku na xilo lexinga xihundleni, lexingatakala xingapaluxiwi; nakona aku na xilo lexifihliweke lexingatakala xingahumeli rivaleni.

²³ Loko munhu ali nitindleve ta kuyingisa, aayingise.”

Ta kuyavanyisa van'wana

²⁴ Yesu atlhela avabzela lesvi: “Yingisani svinene lesvi misvitwaka. Mpimo lowu mipimelaka van'wana ha wona, na n'wina, mitapimeliwa ha wona, ni kutlula kolaho.

²⁵ Lweyi anga ni xanchumu, atanyikiwa ni svin'wana, kasi lweyi angaliki na nchumu, atatekeliwa ni lexi anga na xona.”

Ta xifaniso xa mbewu leyimilaka yikula

²⁶ Yesu atlhela aku: “Mfumu wa Xikwembu wufana ni munhu lweyi ahaxeke mbewu misaveni;

²⁷ hambi ayetlele, hambi apfukile, vusiku ni nhlekanhi mbewu yitlhava, yikula, yena angativi lesvi yikulisaka xisvona.

²⁸ Misava hi yoxe yimilisa mbewu, yirhanga yivakhava, yihumesa nchocho, ndzhaku kuhuma tindzhoho totala anchochweni;

²⁹ kutani loko tindzhoho tiwupfile, vahantla vanghenisa sikelo, hikuva kutshovela kufikile.”

Ta xifaniso xa mbewu ya nsinapi

³⁰ Atlhela aku: “Mfumu wa Xikwembu wutafanisiwa nayini? Hi xihi xifaniso lexi hingawufanisaka na xona ke?

³¹ Wufana ni mbewu ya nsinapi leyi yinga yona leyitsongo ka timbewu hinkwatu ta misava loko yibzaliwa.

³² Kambe loko yibzaliwile, yimila, yikula, yitlula minsinya hinkwayu hi kukula, yiva ni marhavi lamakulu, tinyanyana ta tilo tikondza titayaka andzhutini wa wona.”

Ta kutirhisa svifaniso

³³ Kutani hi svifaniso lesvotala, Yesu aavula Rito ka vona, hilaha avakota kutwisisa hakona.

³⁴ Angavabzelanga nchumu, loko kungali hi kutirhisa svifaniso; kambe loko vali voxe, ahlamusela hinkwasvu ka vajondzisiwa va yena.

Ta Yesu loko amiyeta xidzedze

³⁵ Hi siku lero, hi nkarhi wa majambu, Yesu aku ka vona: “Ahipeleleni ka tlhelo rin'wana ra tiva.”

³⁶ Kuteloko vasiyile xitshungu, vafamba na yena hi bzatsu leri aali ka rona, kutani mabzatso man'wana na wona amamupangalata.

³⁷ Kutani kupfuka xidzedze lexikulu; magandlati amanghena bzatsweni, kukondza rilava kutala hi mati.

³⁸ Yena aali nyalwini ayetlele ava aqamela. Vayamupfuxa, vaku ka yena: “Mujondzisi, xana ahi nchumu ka wena loko hilova ke?”

³⁹ Hi loko apfuka, amiyeta mheho, aku ka tiva: “Miyela, uku ntse!” Mheho yiva yimiyela, kuva ni kurhula lokukulu.

⁴⁰ Kutani aku ka vona: “Hikolaho ka yini mili ni vutoya ke? Amisiva ni kupfumela xana?”

⁴¹ Kutani vachava hi kuchava lokukulu, vabzelana vaku: “Xana munhu lweyi i munhu muni ke, lesvi mheho ni tiva svimuyingisaka?”