Marka 3 - Testamente Leyimpsha Xichangana

Ta munhu wa kukhwanyala voko

¹ Yesu atlhela anghena sinagogeni; kolaho akuli ni munhu wa kukhwanyala voko.

² Kutani Vafarisi avalangutisisa Yesu kuvona kumbe atahanyisa munhu lweyi hi siku ra Savata, lesvaku vatakota kumunyika nandzu.

³ Hi loko aku ka munhu wa kukhwanyala voko: “Suka, uyima laha xikarhi.”

⁴ Kutani aku ka vona: “Lesvilulameke kuyendliwa hi Savata hi svihi xana: Kuyendla lesvinene kumbe kuyendla lesvobiha, kuhanyisa munhu kumbe kumudlaya xana?” Kambe vona vamiyela.

⁵ Yesu avarhalarhala hi mahlo na ahlundzukile, na avavisekile hi kunonon'hwa ka timbilu ta vona, kutani aku ka wanuna lwiya: “Tshabuluta voko ra wena.” Aritshabuluta, kutani voko ra yena ritlhela riwololoka.

⁶ Kutani Vafarisi vahuma sinagogeni, vayaluka makungu svin'we ni va ntlawa wa Heroda, kuvona hilaha vangamudlayaka hakona.

Ta xitshungu ridongeni ra tiva

⁷ Yesu asuka ayakusuhi ni tiva svin'we ni vajondzisiwa va yena, kutani xitshungu lexikulu ximulandza, na xihuma Galileya, xin'wana xihuma Yudeya,

⁸ ni le Yerusalema ni le Idumeya ni le ka tlhelo rin'wana ra Yordani ni le matikweni ya Tiro na Sidoni. Avachololoka vaya ka yena hi kutwa lesvikulu lesvi aasviyendla.

⁹ Kutani abzela vajondzisiwa va yena lesvaku bzatsu ritshama riyimile kusuhi na yena, lesvaku xitshungu xingamukamanyeti.

¹⁰ Hinkwavu lava avali ni mavabzi avakamanyetana vaya ka yena lesvaku vatamukhumba, hikuva aahanyisile lavotala.

¹¹ Ni lava avali ni mimoya ya chaka, loko vamuvona, avakhinsama mahlweni ka yena, vahuwelela, vaku: “Wena u N'wana wa Xikwembu!”

¹² Hi loko Yesu akhahla madimoni hi matimba lesvaku mangatshuki matwalisa lesvaku yena i mani.

Ta Yesu loko ahlawula vapostola va khume ni vambirhi

¹³ Kutani Yesu atlhantukela ntshaveni, ativitanela lava avalaveke; hi loko vata ka yena.

¹⁴ Ahlawula khume ni vambirhi lesvaku vava na yena ni lesvaku atavarhuma kupaluxa Evhangeli,

¹⁵ avanyika ni matimba ya kuhlongola madimoni.

¹⁶ Vapostola va khume ni vambirhi lava angavahlawula hi lava: Simoni (lweyi angamuchula vito ra Petrosi),

¹⁷ na Yakobe na Yohani vana va Zebedewu (lava angavachula vito ra Bowanerjesi, hi lesvaku vana vaxingwalangwandza);

¹⁸ kulandza Andreya, na Filipi, na Bartolomewu, na Matewu, na Tomasi, na Yakobe n'wana Alfewu, na Tadewu, na Simoni wa Kanana,

¹⁹ na Yudasi Iskariyota, lweyi axengeke Yesu.

Ta Yesu na Belzebule

²⁰ Loko Yesu atlhelele kaya, xitshungu xitlhela xihlengeletana kona, lakakuva yena ni vajondzisiwa va yena vatsandzeka ni kuja svakuja.

²¹ Loko maxaka ya yena vatwa svosvo, mata, matela kutamukhoma, hikuva avaku: “Ahlangane nhloko.”

²² Na vona Vatsali lavangirimeleke hi le Yerusalema, avaku: “Afumiwa hi Belzebule, nasvona ahlongola madimoni hi hosana ya madimoni.”

²³ Kuteloko Yesu avavitanile, avulavula na vona hi svifaniso, aku: “Xana Sathana angasvikotisa kuyini kuhlongola Sathana ke?

²⁴ Nasvona, loko mfumu wuyavana hi le xikarhi, mfumu lowu awukoti kutiya.

²⁵ Ni loko njangu wuyavane hi le xikarhi, njangu wolowo awungatiyi.

²⁶ Na yena Sathana, loko atilwisa, ayavana hi le xikarhi, angakala angatiyi, kutava kuhela ka yena.

²⁷ Aku na munhu lweyi akotaka kunghena ndlwini ya nhenha ya matimba kuyaphanga rifuwo ra yona, na angarhanganga hi kuboha nhenha yoleyo; kuli kona aphangaka sva yindlo ya yona.

²⁸ “Nitiyisile nili ka n'wina: Svijoho hinkwasvu ni svisandzu hinkwasvu sva vana va vanhu svitarivaleliwa;

²⁹ kambe lweyi angatasandza Moya Lowokwetsima angakala angarivaleliwi ni siku ni rin'we; hi lesvaku a ni nandzu wa xijoho lexingaheliki.”

³⁰ Aavulisa svosvo, hikuva avaku: “A ni moya wa chaka.”

Ta mamana wa Yesu ni vamakwavu

³¹ Mamana wa Yesu ni vamakwavu vata, vayima handle, varhuma munhu ayamuvitana.

³² Kambe xitshungu axitshamile, ximurhendzelile. Kutani vaku ka yena: “Vona, mamana wa wena ni vamakwenu vakona laha handle, vakulava.”

³³ Avahlamula aku: “Mamana wa mina ni vamakwerhu i vamani?”

³⁴ Kutani Yesu alanguta vanhu lava avamurhendzelile, aku: “Langutani, mamana wa mina ni vamakwerhu, hi volava;

³⁵ hikuva mani na mani lweyi ayendlaka kurhandza ka Xikwembu, hi yena makwerhu waxinuna ni waxisati na mamana.”