Marka 2 - Testamente Leyimpsha Xichangana

Ta Yesu loko ahanyisa munhu wa kukhwanyala svirho

¹ Loko kuhundzile masiku mangali mangani Yesu avuyela Kapernawume, kutani kutwakala lesvaku akona le kaya.

² Vanhu lavotala vahlengeletana kona, kukondza kupfumaleka ni vutshamo mahlweni ka nyangwa, kutani Yesu avajondzisa Rito ra Xikwembu.

³ Kutani kufika ka yena lavatisaka munhu wa kukhwanyala svirho, arhwaliwile hi mune wa vanhu.

⁴ Vona hi kutsandzeka kumufikisa ka Yesu hi kutala ka vanhu, vahahlula lwangu ra yindlo leyi aalikayona. Loko varihahlulile, vaxixa rihlaka leri lweyi wa kukhwanyala svirho aayetlelile ka rona.

⁵ Loko Yesu avona kupfumela ka vona, aku ka lweyi wa kukhwanyala svirho: “N'wananga, urivaleliwile svijoho sva wena.”

⁶ Kambe vatsali van'wana lava avatshamile kolaho, vavilela atimbilwini ta vona, vaku:

⁷ “Hikolaho ka yini munhu lweyi avulavulisa xilesvi xana? Asandza Xikwembu! I mani lweyi angarivalelaka svijoho, loko xingali Xikwembu ntsena ke?”

⁸ Yesu ahantla asvitiva moyeni wa yena lesvi avapimisa svona atimbilwini ta vona, kutani aku ka vona: “Mivilela hikolaho ka yini atimbilwini ta n'wina xana?

⁹ Kuyampsa yini ke? Loko niku ka lweyi wa kukhwanyala svirho: ‘Urivaleliwile svijoho sva wena’, kumbe loko niku ka yena: ‘Pfuka, uteka rihlaka ra wena, ufamba’ xana?

¹⁰ Svosvo ke mitativa lesvaku N'wana-wa-Munhu animatimba la misaveni kurivalela svijoho.” Kutani aku ka lweyi wa kukhwanyala svirho:

¹¹ “Nili ka wena: Pfuka, uteka rihlaka ra wena, umuka.”

¹² Hi nomo-lo, yena apfuka, ateka rihlaka, afamba mahlweni ka vanhu hinkwavu; hi loko hinkwavu vahlamala ngopfu, vadzunisa Xikwembu, vaku: “Svilo lesvotano ahisisvivona.”

Ta kuvitaniwa ka Levhi

¹³ Yesu atlhela asuka, aya matlhelweni ya tiva; xitshungu hinkwaxu xita ka yena, kutani axijondzisa.

¹⁴ Loko ahundza, avona Levhi, n'wana Alfewu, atshamile ndlwini ya vurheselo; aku ka yena: “Nilandze!” Kutani Levhi asuka ayima amulandza.

¹⁵ Kutani loko Yesu atshamile kujeni kaya ka Levhi, vakanganyisi lavotala ni vajohi vatshama na yena, svin'we ni vajondzisiwa va yena, hikuva vanhu lavotala avamulandza.

¹⁶ Kambe loko Vatsali va ntlawa wa Vafarisi vamuvona aja ni vakanganyisi ni vajohi, vaku ka vajondzisiwa va yena: “Xana ajela yini ni vakanganyisi ni vajohi ke?”

¹⁷ Loko Yesu atwa svosvo, aku ka vona: “Lava vangavabziki mirini avalavi n'anga, kambe yilaviwa hi lava vavabzaka. Anitanga kutavitana lavalulameke, kambe vona lavajoheke.”

Ta kutitsona svakuja

¹⁸ Loko vajondzisiwa va Yohani ni Vafarisi vali karhi vatitsona svakuja, kuta vanhu van'wana vatavutisa Yesu, vaku: “Xana vajondzisiwa va Yohani ni vajondzisiwa va Vafarisi vatitsonela yini svakuja, kasi vajondzisiwa va wena vona avatitsoni ke?”

¹⁹ Yesu aku ka vona: “Xana varhambiwa va muteki vangatitsona svakuja loko muteki ahali na vona ke? Nkarhi hinkwawu loko muteki ahali kona na vona, vangakala vangatitsoni svakuja.

²⁰ Kambe masiku matata, lawa muteki angatasusiwa ka vona; hi kona vangatatitsona svakuja, hi siku rolero.

²¹ Aku na munhu lweyi arhungelaka xiziva leximpsha ka nguvu ya khale; hikuva loko ayendlisa svosvo xiziva leximpsha xitahandzula nguvu leyi ya khale, kutani kuhandzuka kakona kutaya kuyengeteleka.

²² Nasvona aku na munhu lweyi achelaka vhinyu lerimpsha atindongeni ta khale, hikuva loko ayendlisa svosvo vhinyu ritahandzula tindonga, rihalaka, na tona titawonheka; kambe vhinyu lerimpsha varichela atindongeni letimpsha.”

Yesu i Hosi ya Savata

²³ Hi siku ra Savata loko Yesu ali karhi ahundza xikarhi ka masimu, vajondzisiwa va yena vasungula kutshova minchocho na vali karhi vafamba.

²⁴ Vafarisi vaku ka yena: “Vona! Xana vayendlela yini lesvingapfumeleliwiki hi siku ra Savata?”

²⁵ Yesu aku ka vona: “Xana amisihlaya lesviyendliweke hi Davhida, siku leri apfumaleke svakuja, na akhomiwe hi ndlala, yena ni lava avali na yena ke?”

²⁶ “Anghenile ndlwini ya Xikwembu, masikwini ya Abiyatari, Muprista lwenkulu, aja xinkwa xa mhamba lexingafanelangiki kujiwa hi vanhu van'wana, loko kungali hi vaprista ntsena, atlhela anyika ni lava avali na yena.”

²⁷ Kutani aku ka vona: “Savata riyendleliwe munhu, ahi munhu lweyi angayendleliwa Savata.

²⁸ Hikolaho-ke, N'wana-wa-Munhu i hosi hambi ya siku ra Savata.”