Marka 16 - Testamente Leyimpsha Xichangana

Ta kupfuka ka Yesu kufeni

¹ Loko siku ra Savata rihundzile, Mariya wa Magadala, na Mariya mamana wa Yakobe, na Salome, vaxava mafurha yonun'hwela kuyamutota ha wona.

² Nimpundzu wa siku ra kusungula ra vhiki, kuhumeni ka jambu, vaya sirheni.

³ Avalikarhi vavutisana, vaku: “I mani lweyi angatahivumbulutela ribze, arisusa non'weni wa sirha ke?”

⁴ Kambe loko vatlakusa mahlo, vavona lesvaku ribze rivumbulutiwile, kuve arili lerikulu ngopfu.

⁵ Loko vanghenile sirheni, vavona jaha leritshameke tlhelweni ra xinene, riyambale sviyambalu svoleha, svobasa; kutani vahlamala.

⁶ Kambe jaha riku ka vona: “Mingachaveni; Yesu wa Nazareta lweyi avambiweke, lweyi mimulavaka, apfukile, anga kona la; laha avamuvekile kona hi kola.

⁷ Fambani, miyabzela vajondzisiwa va yena, na Petrosi, lesvaku wa mirhangela kuya Galileya; hi kona laha mingatamuvona kona, hilaha amibzeleke hakona.”

⁸ Vavasati lavo vahuma sirheni, vatsutsuma na vakhomiwe hi kurhurhumela ni kuhloleliwa; kutani avavulanga nchumu ka munhu ni mun'we hikuva avachava. [

Ta Yesu loko atikombisa ka Mariya wa Magadala

⁹ Loko Yesu apfukile kufeni, ni mpundzu wa siku lerosungula ra vhiki, arhanga atikomba ka Mariya wa Magadala, anga wansati lweyi Yesu aahlongolile madimoni ya ntlhanu ni mambirhi ka yena.

¹⁰ Mariya ayativisa vajondzisiwa lavan'wana va Yesu lava avali nkosini, na varila;

¹¹ loko vona vatwa lesvaku Yesu wahanya, ni lesvaku avoniwile hi Mariya, avasvikholwanga.]

Ta Yesu loko atikombisa ka vajondzisiwa vambirhi

¹² Ndzhaku ka svona, atikombisa hi xivumbeko xin'wana ka vambirhi va vona, loko vali ndleleni yohuma doropeni.

¹³ Vona vatlhela, vayarungulela lavan'wana, kambe na vona lava avavakholwanga.

Ta Yesu loko arhuma vajondzisiwa va khume ni mun'we

¹⁴ Kuheteleleni, Yesu atikomba ka lava va khume na mun'we loko vali kujeni; kutani avasola hi lesvi avakala kupfumela ni lesvi avali ni timbilu tononon'hwa, hikuva avangapfumelanga ka lava vamuvoneke loko apfukile kufeni.

¹⁵ Kutani aku ka vona: “Fambani misaveni hinkwayu, miyahuwelela Evhangeli ka svivumbiwa hinkwasvu.

¹⁶ Lweyi angatapfumela, ava akhuvuliwa, ataponisiwa; kambe lweyi angapfumeliki, atayavanyisiwa.

¹⁷ Mahlori lamangatayendliwa hi lavapfumelaka hi lawa: Hi vito ra mina vatahlongola madimoni; vatavulavula tindzimi letimpsha;

¹⁸ vatakhoma tinyoka hi mavoko; kutani hambi vanganwa lesvidlayaka, svingakala svingavayendli nchumu; vatatlhanteka mavoko ka lavavabzaka, vavahanyisa.”

Ta kutlhantuka ka Yesu

¹⁹ Kuteloko Hosi Yesu avulavulile na vona, atlakuliwa aya tilweni, ayatshama vokweni ra xinene ra Xikwembu.

²⁰ [Loko vali vona, vasuka vafamba, vayahuwelela Evhangeli hinkwaku, Hosi yilikarhi yitirhisana na vona, yitiyisa marito ya yona hi mahlori lawa amahumelela nkarhini wolowo.]