Marka 15 - Testamente Leyimpsha Xichangana

Ta Yesu mahlweni ka Pilato

¹ Loko bzahakuxa, Vaprista lavakulu vahantla valungisa makungu ni vakulukumba, svin'we ni Vatsali ni huvu hinkwayu. Kuteloko vabohile Yesu, vafamba na yena, vayamunyiketa ka Pilato.

² Pilato yena amuvutisa, aku: “Xana u hosi ya Vayuda ke?” Ahlamula aku ka yena: “Uvula svona.”

³ Hi loko Vaprista lavakulu vamurhwexa nandzu wa timhaka totala.

⁴ Pilato atlhela amuvutisa, aku: “Xana awuhlamuli nchumu ke? Yingisa timhaka letotala leti vakurhwexaka nandzu hi tona!”

⁵ Kambe Yesu angahahlamulanga nchumu, Pilato akondza ahlamala.

Ta Yesu loko ayavanyiseliwa rifu

⁶ Hi nkarhi wa nkhuvu Pilato aatolovela kutshunxa xib'ochwa xin'we lexi vanhu vaxikombelaka.

⁷ Kutani akuli ni xin'we lexi axivuliwa Barabasi, lexi axibohiwile ni svin'wana lesvi asvipfuxile dzolonga, svidlaye ni munhu adzolongeni rakona.

⁸ Loko xitshungu xifambile xiya hubzeni, xikombela lesvaku Pilato ayendla hilaha aatolovela kuvayendlela hakona.

⁹ Pilato avahlamula, aku: “Xana mirhandza lesvaku nimitshunxela hosi ya Vayuda ke?”

¹⁰ Aavula svosvo hi kutiva lesvaku Vaprista lavakulu avanyiketile Yesu hikolaho ka matshoho.

¹¹ Kambe Vaprista lavakulu vahlohlotela xitshungu, lesvaku Pilato avatshunxela Barabasi, kungali Yesu.

¹² Pilato atlhela avulavula na vona, aku: “Loko svilitano, mili nitayendla yini hi munhu lweyi mimuvulaka Hosi ya Vayuda ke?”

¹³ Vona vatlhela vahuwelela, vaku: “Muvambe!”

¹⁴ Pilato avavutisa aku: “Xana ajohile yini ke?” Vona vaba huwa leyikulu, vaku: “Muvambe!”

¹⁵ Kutani Pilato, hi kurhandza kutsakisa xitshungu, avatshunxela Barabasi; kutani loko alerisile lesvaku Yesu abiwa, amunyiketa lesvaku vayamuvamba.

Ta masochwa loko matseketsela Yesu

¹⁶ Masochwa mafamba na Yesu, mamuyisa ndlwini ya vuhosi; kutani mavitanana mayakona hinkwawu.

¹⁷ Kuteloko vamuyambexile xiyambalu xovangama xaxivunguvungu, valuka hari ya mintwa, vamutlhanteka nhlokweni.

¹⁸ Kutani vamuxeweta, vaku: “Xeweni, Hosi ya Vayuda!”

¹⁹ Vamuba nhloko hi nhonga, vamupshitela marhi, vawa hi matsolo vamukhinsamela.

²⁰ Kuteloko vamutseketselile, vamuhlivila xiyambalu xovangama xa xivunguvungu, vatlhela vamuyambexa xiyambalu xa yena.

Ta kuvambiwa ka Yesu

²¹ Vamuyisa handle ka doropa kuyamuvamba. Vahlangana ni wanuna mun'we lweyi aahundza kolaho na ata hi le masin'wini, kutani vamusindzisa kurhwala xihambanu xa Yesu. Wanuna lweyi aali Simoni wa Kirene, tatana wa Alexandre na Rufo;

²² vayisa Yesu ndhawini leyi vange i Golgota, hi lesvaku “Ndhawu ya Pala”.

²³ Vamunyika vhinyu leringapatsanyetiwa ni mira; kambe angayinwanga.

²⁴ Hi loko vamuvamba, vayavelana sviyambalu sva yena hi kuhlahluva, lesvaku vatativa lesvi mun'wana ni mun'wana angatakuma svona.

²⁵ Awuli nkarhi wa vunharhu loko vamuvamba.

²⁶ Papela rotivisa nandzu wa yena aritsaliwe marito lawa: “Hosi ya Vayuda.”

²⁷ Vamuvamba ni svigevenga svimbirhi, xin'we vokweni ra yena ra xinene, xin'wana ka leri ra ximantsi. [

²⁸ Hi loko kuhetiseka tsalwa leringe: “Ahlayiwile svin'we ni vajohi.”]

²⁹ Vahundzi va ndlela vamurhuketela, vahlakahla tinhloko vaku: “Ha! Wena lweyi uhirimuxaka Tempele, utlhela uyipfuxa hi masiku manharhu,

³⁰ tiponise ke, uxika xihambanwini!”

³¹ Hi mukhuva wolowo, na vona Vaprista lavakulu svin'we ni Vatsali vamutseketsela vaku: “Munhu lweyi aponisile van'wana, kambe yena watsandzeka kutiponisa!

³² Kriste, Hosi ya Israyele aaxike svosvi xihambanwini, lesvaku hisvivona, hitapfumela ka yena” Lavangavambiwa na yena, na vona avamurhukatela.

Ta kufa ka Yesu

³³ Loko kufikile nkarhi wa vuntlhanu na wun'we, munyama wufunengeta tiko hinkwaru, kuyafika nkarhi wa vuntlhanu ni mune.

³⁴ Hi nkarhi wolowo wa vuntlhanu ni mune, Yesu ahuwelela hi rito leritlakukeke aku: “Eloyi, Eloyi, Lama Sabaktani?”, hi lesvaku: “Xikwembu xanga, Xikwembu xanga, unitshikela yini?”

³⁵ Van'we ka lava avali kolaho, loko vamutwa vaku: “Yingisani, avitana Eliya.”

³⁶ Mun'we atsutsuma, ayapeta xiponjhi ka ntsuvi, axitlhoma rihlangeni, amunyika lesvaku anwa, aku: “Mutshikeni, hitavona loko hakunene Eliya atata, atamuhawula.”

³⁷ Hi loko Yesu ahuwelela hi rito leritlakukeke, anhlala afa.

³⁸ Kutani xisirhelelo xa nguvu xa Tempele xihandzuka hi le xikarhi, kusukela henhla kuyafika hansi.

³⁹ Loko ndhuna ya dzana ra masochwa leyi ayinyimile mahlweni ka yena, yivonile hilaha angahuwelela ni kufa hakona, yiku: “Hakunene munhu lweyi aali N'wana wa Xikwembu.”

⁴⁰ Vavasati na vona avali kona, valanguta valikule; xikarhi ka vona akuli na Salome, na Mariya wa Magadala, na Mariya mamana wa va Yakobe lwentsongo na Josi;

⁴¹ hi lava avatolovela kulandza Yesu ni kumutirhela loko ahali Galileya. Akuli ni van'wana lavotala lavatlhantukeke na yena loko aya Yerusalema.

Ta kulahliwa ka Yesu

⁴² Jambu ariya kupeleni, kutani siku lero arili ra vuntlhanu, rolungisa sva siku ra Savata.

⁴³ Hikolaho, nkulukumba mun'we wa huvu, lweyi avaku i Yosefa wa Arimateya, doda rochaviseka ngopfu ra huvu, lweyi na yena aalangutela Mfumu wa Xikwembu, ata ka Pilato na akanye mbilu, akombela ntsumbu wa Yesu.

⁴⁴ Pilato ahlamala kutwa lesvaku Yesu nankhale afile. Hi loko avitana ndhuna ya dzana ra masochwa, ayivutisa aku: “I khale afile xana?”

⁴⁵ Loko ndhuna ya dzana yitiyise svosvo, apfumelela Yosefa kuyateka ntsumbu.

⁴⁶ Yosefa ayaxava lansoro rosaseka rolahla ha rona; kutani amuhawula, amuphutsela ha rona, amuveka sirheni lerikovotliweke ribzeni, kutani avumbuluta ribze ripfala nomo wa sirha.

⁴⁷ Kambe Mariya wa Magadala, na Mariya mamana wa Josi, avalanguta laha avekiwaka kona.