Marka 14 - Testamente Leyimpsha Xichangana

Ta vaprista ni vatsali loko vatwanana hi ta kudlaya Yesu

¹ Akuyosala masiku mambirhi, kungasifika nkhuvu wa Paska ni wa xinkwa xokala comela; kutani Vaprista lavakulu ni Vatsali avalava ndlela yokhoma Yesu ha yona hi vutlhari lesvaku vatamudlaya.

² Kambe avaku: “Svingayendliwi nkhubzeni, hikuva kungatshuka kupfuka dzolonga xikarhi ka vanhu.”

Ta Yesu loko acheliwa mafurha nhlokweni Betaniya

³ Yesu aali Betaniya, muntini wa Simoni lweyi wa nhlokonho; loko atshamile svakujeni, kuta wansati lweyi aali ni ximbitana xa alabaxtru xotala hi mafurha yonun'hwela yodura ngopfu, lawa mayendliweke hi nsinya wa narda lowunene. Hi loko wansati lweyi afaya ximbitani, achela mafurha nhlokweni ya Yesu.

⁴ Van'we vavilela svinene vaku: “Mafurha lawa mahalateliwela yini ke?

⁵ Kuve amataxavisiwa hi tidenari letitlulaka 300; male yakona ayitanyikiwa svisiwana!” Kutani vamuholovela.

⁶ Kambe Yesu aku: “Mutshikeni, mimukarhatela yini? Aniyendlele ntirho lowunene.

⁷ Loko svili svisiwana, mina svona masiku hinkwawu, kutani mitakota kusviyendlela lesvinene, siku leri misvirhandzaka; kasi nkarhi wa mina wotshama na n'wina wahela svosvi.

⁸ Wansati lweyi ayendlile lesvi asvikoteke, atotile miri wa mina hi mafurha ningasilahliwa sirheni.

⁹ Nitiyisile nili ka n'wina: Misaveni hinkwayu laha Evhangeli leyi yingatatwalisiwa kona, lesvi angasviyendla svitavuliwa na svona, ayanakanyiwa ha svona.”

Ta Yudasi loko apfumela kuxenga Yesu

¹⁰ Kutani Yudasi Iskariyota, mun'we wa lava va khume ni vambirhi, aya ka Vaprista lavakulu kuyava nyiketa Yesu.

¹¹ Loko vamuyingisile, vatsaka; vamutshembisa male; kutani alava nkarhi lowunene wa kuvanyiketa yena.

Ta Yesu loko aja Paska ni vajondzisiwa va yena

¹² Hi siku rorhanga ra nkhuvu wa xinkwa xokala comela, ringa leri vatlhavaka svinyempfana sva Paska ha rona, vajondzisiwa va yena vamuvutisa vaku: “Xana ulava lesvaku hiyakulungisela kwihi, laha ungatajela kona Paska ke?”

¹³ Hi loko arhuma vajondzisiwa va yena vambirhi, aku ka vona: “Yanani doropeni, mitahlangana ni wanuna lweyi apakatseke khuwana ra mati: Mulandzeni.

¹⁴ Laha anghenaka kona, mitaku ka n'winyi wa munti: ‘Mujondzisi ali, xikwihi xilawu lexi angatajela ka xona Paska, na ali ni vajondzisiwa va yena xana?’

¹⁵ Yena atamikomba xilawu lexikulu axitezini lexi xinga ni svigotso, xilulameke; mitalungisela kona.”

¹⁶ Kutani vajondzisiwa va yena vasuka, vayafika doropeni, vakuma svili hilaha angavabzela hakona; kutani valungisa Paska.

¹⁷ Loko jambu ripelile, Yesu afika ni lava va khume ni vambirhi.

¹⁸ Kuteloko vatshamile, vali karhi vaja, Yesu aku: “Nitiyisile nili ka n'wina: Mun'we wa n'wina lweyi ajaka na mina atanixenga.”

¹⁹ Kutani vasungula kuxukuvala vamuvutisa ha mun'we mun'we vaku: “Xana angava mina?”

²⁰ Ahlamula aku: “I mun'we wa n'wina va khume ni vambirhi, lweyi ajaka na mina nkambaneni.

²¹ Loko ali N'wana-wa-Munhu, atatifambela hilaha kutsaliweke hakona mayelanu na yena; kambe a ni khombo munhu lweyi N'wana-wa-Munhu axengiwaka ha yena! Asvitayampsa ka munhu yelweyo loko angapsaliwanga.”

Ta Xilalelo xa Hosi

²² Loko vahali kujeni, ateka xinkwa, kutani loko akhensile, akhema, anyika vajondzisiwa, aku: “Tekani; lesvi i miri wa mina.”

²³ Kutani ateka ndzheko, akhensa, avanyika; vanwa hinkwavu ha wona.

²⁴ Aku ka vona: Lesvi i ngati ya mina, ngati ya ntwananu, leyihalateliwaka lavotala.

²⁵ “Nitiyisile nili ka n'wina: Aningahanwi kambe sva mihandzu ya mvhinya, kukondza kufika siku leri ningatasvinwa na svili lesvimpsha Mfun'wini wa Xikwembu.”

²⁶ Kuteloko vayimbelelile risimu, vaya Ntshaveni ya Maolivhera.

Ta Petrosi Loko ativisiwa lesvaku atalandzula Yesu

²⁷ Yesu aku ka vona: “Hinkwenu mitakhunguvanyeka, hikuva kutsaliwile lesvaku: “‘Nitaba murisi, kutani tinyempfu titahangalaka.’”

²⁸ “Kambe loko nitava nipfukile kufeni, nitamirhangela kuya le Galileya.”

²⁹ Petrosi aku ka yena: “Hambi loko vangakhunguvanyeka hinkwavu, svingakala svingahumeleli ka mina.”

³⁰ Yesu aku ka yena: “Nitiyisile nili ka wena: Namuntlha, vusiku bzobzi, nkuku wungasiyimba kambirhi, utava unilandzulile kanharhu.”

³¹ Kambe Petrosi atlhela atiyisa hi matimba, aku: “Hambi loko svinganifanela kufa na wena, ningakala ningakulandzuli.” Kutani hinkwavu vavulisa svosvo.

Ta Yesu loko akhongela Getsemani

³² Hi loko vaya ndhawini leyivuliwaka Getsemani; kutani Yesu aku ka vajondzisiwa va yena: “Tshamani kola, nahaya niyakhongela.”

³³ Afamba na Petrosi, na Yakobe, na Yohani, kutani asungula kukarhateka ngopfu ni kuxaniseka svinene;

³⁴ aku ka vona: “Moya wa mina wukhomiwa hi gome lerikulu, gome ra kufa; salani kola, milavelela.”

³⁵ Kutani aya kulenyana, atiwisela hansi, akhongela lesvaku loko svingakoteka, nkarhi lowuya wufambela kule na yena.

³⁶ Aku: “Aba, Tatana! Ka wena hinkwasvu svakoteka; ndzheko lowu wutshinete kule na mina; ntsena kungayendliwi kurhandza ka mina, kambe akuyendliwe kurhandza ka wena.”

³⁷ Kutani atlhelela ka vona, avakuma na vayetlele; aku ka Petrosi: “Simoni, uyetlele xana? Utsandzekile kulavelela wora rili rin'we xana?

³⁸ Lavelelani na mikhongela, lesvaku mingangheni miringweni hikuva moya wasvilava, kambe nyama yitsanile.”

³⁹ Kutani atlhela aya tlhelweni, ayakhongela kufana ni le kusunguleni.

⁴⁰ Kuteloko atlhelele ka vona, avakuma vayetlele, hikuva mahlo ya vona amatika, nasvona avangativi lesvaku vangamuhlamula yini.

⁴¹ Loko avuya ra vunharhu, aku ka vona: “Xana mahayetlela ni kuwisa ke? Sviringene! Nkarhi wufikile, vonani, N'wana-wa-Munhu wanyiketiwa mavokweni ya vajohi.

⁴² Pfukani, miyima, ahifambeni! Langutani, lweyi anixengaka a le kusuhi.”

Ta Yesu loko axengiwa ni kukhomiwa

⁴³ Hi nomo-lo, na ahavulavula, kuhumelela Yudasi, mun'we wa lava va khume ni vambirhi, ata ni xitshungu lexihlomeke matlhari ni tinhonga, na varhumiwile hi Vaprista lavakulu, ni Vatsali, ni vakulukumba.

⁴⁴ Lweyi amuxengaka aavanyikile xikombiso aku: “Lweyi ningatamun'qunta, hi yena, mukhomeni mifamba na yena, mimulavelela svinene.”

⁴⁵ Kuteloko afika, ahantla amukongoma, aku: “Mufundhisi!” Kutani amun'qunta.

⁴⁶ Vona ke vatshambuluta mavoko, vamukhoma.

⁴⁷ Hi loko mun'we wa lava avali na Yesu, ahlomula tlhari, avavisa mutirhi wa Muprista lwenkulu, amuxupula ndleve.

⁴⁸ Kutani Yesu avavutisa aku: “Lesvi mihumeke na mili ni matlhari ni tinhonga kutanikhoma, nova xigevenga ke?

⁴⁹ Masiku hinkwawu anili na n'wina nili karhi nijondzisa Tempeleni, kutani aminikhomanga; kambe Matsalwa mafanele kuhetiseka!”

⁵⁰ Hi loko vajondzisiwa hinkwavu vamusiya, vabaleka.

Ta jaha leritsutsumeke na ringayambalanga

⁵¹ Jaha rin'wana arilandza Yesu, na rifunengelile lansoro ntsena; kutani valava kurikhoma;

⁵² kambe rona richupula risiya lansoro, ritsutsuma ringayambalanga nchumu.

Ta Yesu loko ayisiwa hubzeni

⁵³ Vayisa Yesu ka Muprista lwenkulu, kutani Vaprista lavakulu hinkwavu, ni vakulukumba, ni Vatsali vahlengeletana kolaho.

⁵⁴ Petrosi na yena amulandza hi le kule, anghena rikupakupeni ra yindlo ya Muprista lwenkulu, atshamisa ni vatirhi, ali karhi aworha ndzilo.

⁵⁵ Vaprista lavakulu ni huvu hinkwayu avalava vumboni bza kurhwexa Yesu anandzu lesvaku vatamudlaya; kambe avabzikumanga.

⁵⁶ Lavotala avamuhehla hi mavunhwa, kambe vumboni bza vona abzingahetisekanga.

⁵⁷ Van'wana avayima vamuhehla hi kuhemba vaku:

⁵⁸ “Himutwile, aku: ‘Nitahirimuxa Tempele leyi yoyakiwa hi mavoko ya vanhu, kutani ndzhaku ka masiku manharhu nitatlhela niyimisa yin'wana leyingayakiwangiki hi mavoko ya vanhu.’”

⁵⁹ Hambi svilitano, vumboni bza vona abzingahetisekanga.

⁶⁰ Hi loko Muprista lwenkulu ayima xikarhi ka vona, avutisa Yesu, aku: “Xana awuhlamuli nchumu ke? Hi yihi mhaka leyi vakuhehlaka ha yona xana?”

⁶¹ Kambe Yesu amiyela, angahlamuli nchumu. Muprista lwenkulu atlhela amuvutisa, aku: “Xana hi wena Kriste, N'wana wa Xikwembu lexidzunekaka ke?”

⁶² Yesu aku: “Mina ni yena!” “‘Kutani mitavona N'wana-wa-Munhu atshamile vokweni ra xinene ra Lweyi anga ni matimba hinkwawu, mitamuvona ata hi marefu ya le tilweni.’”

⁶³ Hi loko Muprista lwenkulu ahandzula sviyambalu sva yena, aku: “Hahalavela yini timboni xana?

⁶⁴ Mitwile kusandza ka yena; mipimisa yini n'wina ke?” Hinkwavu vamuyavanyisa, vaku: “Afaneliwa hi kufa.”

⁶⁵ Van'wana vasungula kumupshitela marhi, vamuboha mahlo, vamuba hi svibakela, vaku ka yena: “Vhumbata! I mani lweyi akubeke. Vatirhi na vona vafamba na yena na vali karhi vamuhimetela.”

Ta Petrosi loko alandzula Yesu

⁶⁶ Nkarhini wolowo Petrosi aali le hansi rikupakupeni; kutani kuta mun'we wa vatirhi vaxisati va Muprista lwenkulu;

⁶⁷ loko avona Petrosi na ali karhi aworha ndzilo, amuhonokela, aku: “Na wena awuli ni Munazareta lwiya vange i Yesu.”

⁶⁸ Kambe Petrosi akaneta, aku: “Lesvi usvivulaka, anisvitivi; ni kusvitwisisa anisvitwisisi.” Kutani ahuma, ayayima handle kusuhi ni nyangwa. [Hi loko nkuku wuyimba.]

⁶⁹ Mutirhi lwiya waxisati, loko amuvona, atlhela abzela lava avali kolaho, aku: “Lweyi, i mun'we wa vona.”

⁷⁰ Kambe Petrosi atlhela akaneta. Ndzhakunyana, lava avali kolaho, vayengeta vaku ka Petrosi: “U mun'we wa vona hakunene, hikuva u Mugalileya na wena.”

⁷¹ Hi loko asungula kuhlambanya hi matimba aku: “Munhu lweyi mimuvulaka, mina animutivi!”

⁷² Nkarhi wolowo nkuku wuyimba ka vumbirhi. Kolaho Petrosi atsundzuka rito leri Yesu amubzeleke rona, loko aku: “Nkuku wungasiyimba ka mbirhi, utava unilandzulile kanharhu.” Hi loko Petrosi atlhaveka ngopfu arila.