Marka 13 - Testamente Leyimpsha Xichangana

Ta Yesu loko ativisa kuwonheka ka Tempele

¹ Loko Yesu ahakuhuma Tempeleni, mun'we wa vajondzisiwa va yena aku ka yena: “Mujondzisi, languta kukula ni kuhlamalisa ka maribze lawa ni ka svilawu lesvi!”

² Yesu amuhlamula aku: “Xana wa svivona svilawu lesvikulu lesvi ke? Akungasali ribze henhla ka ribze rin'wana; hinkwawu matahirimuxiwa.”

Ta masungulu ya tinxaniso

³ Kuteloko atshamile ntshaveni ya Maolivhera alangutane ni Tempele, Petrosi na Yakobe svin'we na Yohani na Andreya, vamuvutisa tlhelweni vaku:

⁴ “Hibzele, xana timhaka leti titahumelela rini xana? Ni xikombiso xitava xihi xa lesvaku hinkwasvu lesvi, svi le kusuhi ni kuhumelela ke?”

⁵ Hi loko Yesu asungula kuvajondzisa aku: “Tivoneleni lesvaku mingatshukeni mixisiwa hi munhu.

⁶ Lavotala vatata hi vito ra mina, mun'wana ni mun'wana aku: ‘Mina ni yena’, kutani vatakanganyisa lavotala.

⁷ Kutaku loko mintwa hi tinyimpi ni mahungundlela ya tinyimpi, mingachaveni, hikuva svosvo svifanela kuhumelela; kambe ahi wona makumu.

⁸ Tiko rin'wana ritapfukela tiko rin'wanyana, mfumu wun'wana wutalwa ni mfumu wun'wanyana; kutsekatseka ka misava kutava kona matlhelweni lawa yotala, ni tindlala titava kona. Svosvo i masungulu ya tinxaniso.

⁹ “Loko kuli n'wina, tivoneleni; vataminyiketa ka tihuvu ta vuthethisi; mitabiwa masinagogeni, mitayimisiwa mahlweni ka tindhuna ni tihosi hikolaho ka mina, lesvaku mitava timboni ka vona.

¹⁰ Kambe Evhangeli yifanele kurhanga yitwalisiwa matikweni hinkwawu.

¹¹ Kutani siku vangatamikhoma, vamiyisa kuthethisiweni, mingatshukeni mivilela hi lesvi mingatavula svona, kambe vulani lesvi mingatanyikiwa svona nkarhini wolowo, hikuva ahi n'wina mingatavulavula, kambe i Moya Lowokwetsima.

¹² “Makwavu atanyiketa makwavu kudlaweni, tatana atayendlisa svosvo ka n'wana wa yena; ni vana vatapfukela vapsali va vona, vavadlaya.

¹³ Mitavengiwa hi vanhu hinkwavu hikolaho ka vito ra mina, kambe lweyi atiyiselaka kufika makumu hi yena lweyi angataponisiwa.

Ta kuxaniseka lokukulu

¹⁴ “Kutaku loko mivona ‘xilo xa manyala lexiwonhetelaka’ xililaha xingafaneliki kuva kona lweyi ahlayaka aatwisise, nkarhini wolowo, lava vanga Yudeya avatsutsumele tintshaveni;

¹⁵ lweyi angahenhla ka yindlo angatshuki axika kuyanghena ndlwini ayateka xanchumu kona;

¹⁶ lweyi anga masin'wini, angatshuki atlhelela kaya kuyateka mpahla ya yena.

¹⁷ Vatava ni khombo vavasati lavatikeke ni lavanyan'wisaka minkarhini yoleyo.

¹⁸ Khongelani lesvaku svilo lesvi svingahumeleli hi vuxika.

¹⁹ Hikuva minkarhini yoleyo, kutava ni nhlomulu lowungasiki tshama wuhumelela, kusukela loko Xikwembu xitumbuluxile misava ni hinkwasvu, kutakala namuntlha; nasvona nhlomulu lowu wotanu wungakala wungahavi kona.

²⁰ Loko Hosi ayingahungutanga masiku wolawo, akungatapona munhu ni mun'we; kambe yimahungutile hi mhaka ya vahlawuliwa va yona.

²¹ “Nkarhini wolowo, loko munhu amibzela aku: ‘Vonani, Kriste hi lweyi’, kumbe: ‘Hilwiya’, mingatshukeni mipfumela;

²² hikuva kutahumelela va Kriste va mavunhwa, ni vaprofeta va mavunhwa; vatayendla mahlori ni svihlamaliso kuhambukisa na vona vahlawuliwa va Xikwembu, loko svikoteka.

²³ Kambe loko kuli n'wina, tlharihani! Nimibzelile hinkwasvu svingasina humelela.

Ta kuhumelela ka N'wana-wa-Munhu

²⁴ “Ndzhaku ka masiku wolawo ya nhlomulu, ” “‘jambu ritahundzuka ra ntima, ni n'weti awungahavoningi;

²⁵ tinyeleti titawa hi le tilweni, ni mintamu leyi yinga le tilweni yitatsekatseka.’”

²⁶ “Hikona vangatavona N'wana-wa-Munhu ata hi marefu, na ali ni matimba lamakulu ni kukwetsima.

²⁷ Kutani atarhuma tintsumi ta yena kutahlengeleta vahlawuliwa va yena; vatahuma ka mimoya ya mune wa matlhelo ya misava, kusukela magemetamusi ya misava kuyafika magemetamusi ya tilo.

Ta Jondzo ya nkuwa

²⁸ “Jondzani lesvi hi nkuwa: Loko marhavi ya wona masungula kuwolova ni loko matluka ya wona mahluka, mitiva lesvaku malanga malekusuhi.

²⁹ Hi mukhuva wolowo, loko mivona svilo svosvo svihumelela, tivani lesvaku nkarhi wu le kusuhi, wu le nyangweni.

³⁰ Nitiyisile nili ka n'wina: Vanhu va nguva leyi vangakala vangahundzi, kungasihumelela svilo lesvi hinkwasvu.

³¹ Tilo ni misava svitahundza, kambe marito ya mina mangakala mangahundzi.

Aku na munhu lweyi ativaka siku ni nkarhi

³² “Loko rili siku rakona ni nkarhi wakona, aku na lweyi asvitivaka, hambi tili tintsumi ta le tilweni, hambi ali N'wana; svitiviwa hi Tatana ntsena.

³³ Tlharihani, lavelelani, hikuva amitivi lesvaku nkarhi wutafika rini.

³⁴ Svifana ni munhu loko ayendza, asuka muntini wa yena, asiyile hinkwasvu mavokweni ya svitirhi sva yena, xin'wana ni xin'wana ntirhweni wa xona, abzela ni murindzi wa nyangwa lesvaku alavelela.

³⁵ Laveleleni ke, hikuva amitivi nkarhi lowu n'winyi wa munti angatata ha wona; kungava nimajambu, kumbe nivusiku lebzikulu, kumbe loko nkuku wuyimba, kumbe ni mixo;

³⁶ lesvaku loko afika hi xitshuketa, angatamikuma na miyetlele.

³⁷ Kutani lesvi nimibzelaka svona, nibzela hinkwenu, nili: Lavelelani!”