Marka 11 - Testamente Leyimpsha Xichangana

Ta Yesu loko anghena Yerusalema

¹ Loko vatshinelela Yerusalema ni le svidoropanini sva Betfaxje na Betaniya, kusuhi ni Ntshava ya Maolivhera, Yesu ahlawula vambirhi xikarhi ka vajondzisiwa va yena, avarhuma,

² aku: “Yanani axidoropanini lexi xivonekaka lahaya, kutani loko minghena ka xona, mitakuma ximbongolwana lexibohiweke, lexingasiki gadiwa hi munhu; xitlhantlheni, mita na xona halenu.

³ Loko munhu amivutisa aku: ‘Miyendlela yini svosvo?’, mitaku: ‘Hosi yaxilava; yitaxivuyisa svosvi.’”

⁴ Kutani vafamba, vayakuma ximbongolwana xilihandle, xibohiwile nyangweni kusuhi ni ndlela, kutani vaxitlhantlha.

⁵ Van'we ka lava avayimile kolaho, vaku ka vona: “Mitlhantlhela yini ximbongolwana xoxo ke?”

⁶ Vona vavahlamula hilaha Yesu angavula hakona, kutani vavatshika.

⁷ Vata ni ximbongolwana ka Yesu, kutani vakapeka tinguvu ta vona henhla ka xona, Yesu axigada.

⁸ Vanhu lavanyingi vayandlala tinguvu ta vona ndleleni, van'wana vatshova svigajani, lesvinga ni matluka sva le nhoveni, vayandlala ndleleni

⁹ Lava varhangeke mahlweni, ni lavalandzelaka hi le ndzhaku, vahuwelela, vaku: “Hozana! Akudzunisiwe lweyi ataka hi vito ra Hosi!

¹⁰ Akudzunisiwe Mfumu wa tatana wa hina Davhida lowutaka ka hina! Hozana matilweni lamanga henhlahenhla!”

¹¹ Yesu afika Yerusalema ayanghena Tempeleni, arhendzeleka na ali karhi avona hinkwasvu; kambe lesvi jambu aripelile, ahuma, aya Betaniya ni lava va khume ni vambirhi.

Ta nkuwa lowurhukiweke

¹² Hi siku leritlhantamaka loko vavuya hi le Betaniya, atwa ndlala.

¹³ Kutani avona nkuwa lowunga ni matluka na ahali kulenyana; ahambuka kuyakamba kumbexana angakuma xanchumu ka wona, kambe loko afika kona, angakumanga nchumu, loko mangali matluka ntsena, hikuva awungali nkarhi wa makuwa.

¹⁴ Kutani aku ka nsinya lowu: “Akungahavi na munhu lweyi angataja mihandzu ya wena ni siku ni rin'we!” Vajondzisiwa va yena avali karhi vasvitwa.

Ta kubasisiwa ka Tempele

¹⁵ Kutani vafika Yerusalema. Kuteloko anghenile Tempeleni, ahlongola lava vaxavisaka ni lava vaxavaka kona, awisetela mimeza ya lavabindzulisaka male, ni svitshamu sva lava vaxavisaka svituvana.

¹⁶ Nasvona, angapfumelelanga munhu kutsemakanya Tempeleni, na arhwele xanchumu.

¹⁷ Kutani avajondzisa, aku: “Xana akutsaliwanga lesvaku:” “‘Yindlo ya mina yitavuliwa yindlo ya xikhongelo ka matiko hinkwawu’ xana? Kasi n'wina miyiyendlile ‘mhakwa wa vayivi’. ”

¹⁸ Vaprista lavakulu ni Vatsali vasvitwa, kutani valava tindlela leti vangamudlayaka ha tona; hikuva avamuchava, hi lesvi xitshungu hinkwaxu axihlamala kujondzisa ka yena.

¹⁹ Kutani loko ripelile, Yesu ni vajondzisiwa va yena vahuma doropeni.

Ta Jondzo ya nkuwa lowu womeke

²⁰ Nimixo loko vahundza hi kolaho, vavona nkuwa wolowo wuwomile kusukela timintsweni.

²¹ Petrosi atsundzuka lesvihumeleleke, aku ka Yesu: “Mufundhisi, vona, nkuwa lowu ungawu rhuketela wuwomile.”

²² Yesu avahlamula, aku: “Vanani ni kupfumela ka Xikwembu!

²³ Nitiyisile nili ka n'wina: Loko munhu aku ka ntshava leyi: ‘Suka, uyatihoxa lwandle’ na angakanakani mbilwini ya yena, kambe apfumela lesvaku lesvi asvivulaka svitayendleka, atayendleliwa svona.

²⁴ Hikolaho nili ka n'wina: Hinkwasvu lesvi misvikombelaka hi kukhongela, pfumelani lesvaku minyikiwile svona, kutani mitayendleliwa svona.

²⁵ Loko mili karhi mikhongela, rivalelani lweyi mingavaka ni mhaka na yena, lesvaku na yena Tatana wa n'wina lweyi anga matilweni, amirivalela svijoho sva n'wina.” [

²⁶ “Hikuva loko mingarivaleli van'wana, Tatana wa n'wina lweyi anga matilweni na yena angakala angami rivaleli svijoho sva n'wina!”]

Ta Yesu loko avutisiwa hi ta matimba ya yena

²⁷ Kutani vatlhela vavuyela Yerusalema; kakuloko Yesu ali karhi afambafamba ndzeni ka Tempele, Vaprista lavakulu ni Vatsali ni vakulukumba vata ka yena

²⁸ vaku: “Xana uyendla svilo lesvi hi matimba wahi ke? Xana i mani lweyi angakunyika matimba ya kuyendla svilo lesvi ke?”

²⁹ Yesu avahlamula aku: “Nitamivutisa xivutiso xin'we; loko minihlamula xona, hi kona na mina ningatamibzela lomu mahumaka kona matimba lawa nitirhaka ha wona.

³⁰ Xana ankhuvulo wa Yohani awuhuma tilweni, kumbe ka vanhu ke? Nihlamuleni.”

³¹ Vona vaphikizana vaku: “Loko hiku: ‘Awuhuma tilweni’, Ataku: ‘Loko svilitano, hikolaho ka yini mingapfumelanga ka yena ke?’

³² Kambe loko hiku: ‘Awuhuma ka vanhu’ ... (Hichava xitshungu; hikuva hinkwavu vakholwa lesvaku Yohani aali muprofeta wa xiviri.)”

³³ Kutani vahlamula Yesu, vaku: “Ahisvitivi.” Hi loko Yesu aku ka vona: “Na mina aningamibzeli lomu mahumaka kona matimba lawa nitirhaka ha wona.”