Marka 10 - Testamente Leyimpsha Xichangana

Ta kutsika nsati

¹ Loko Yesu asukile kolaho, aya tikweni ra Yudeya ka tlhelo rin'wana ra Yordani. Xitshungu xitlhela xitahlengeletana ka yena; kutani ayamahlweni axijondzisa, hilaha aatolovela kuyendla hakona.

² Kutani Vafarisi vata ka yena, kutamuvutisa hi kumuringa, vaku: “Xana wanuna wapfumeleliwa kutshika nsati wa yena ke?”

³ Na yena avavutisa aku: “Moxe amibzelile yini xana?”

⁴ Vaku: “Moxe asvipfumelelile lesvaku kutsaliwa papela ra kumutshika, ni kumuhlongola.”

⁵ Yesu avahlamula aku: “Moxe amitsalele nawu lowu hikolaho ka kunonon'hwa ka timbilu ta n'wina.

⁶ Kambe kusunguleni ka ntumbuluku, ‘Xikwembu xiyendlile munhu waxinuna ni waxisati.

⁷ Hikolaho wanuna atasuka ka tatana wa yena ni ka mamana wa yena, anamarhela nsati wa yena;

⁸ kutani lavambirhi vatava nyama yin'we ntsena.’ Svivula lesvaku avahali vambirhi kambe i nyama yin'we ntsena.

⁹ Hikolaho, lesvi Xikwembu xisvihlanganiseke, svingatshuki svihambanyisiwa hi munhu!”

¹⁰ Loko vatlhelele ndlwini, vajondzisiwa vatlhela vavutisisa Yesu hi mhaka leyi.

¹¹ Yena aku ka vona: “Lweyi atshikaka nsati wa yena ayateka mun'wana, wawosva, nasvona ajohela nsati wa yena.”

¹² Na yena wansati, loko atshika nuna wa yena ayatekiwa hi mun'wana, wawosva.

Ta Yesu loko akatekisa vatsongwana

¹³ Vanhu van'wana vatisa vatsongwana ka Yesu lesvaku avatlhanteka mavoko; kambe vajondzisiwa vavayalisa.

¹⁴ Loko Yesu asvivona, avilela ngopfu, aku ka vona: “Tshikani vatsongwana vata ka mina, mingatshukeni mivasivela, hikuva Mfumu wa Xikwembu i wa lavafanaka na vona.

¹⁵ Nitiyisile nili ka n'wina: Lweyi angayamukeliki Mfumu wa Xikwembu tani hi ntsongwana, angakala angangheni ka wona.”

¹⁶ Kuteloko avukarhile vatsongwana, avatlhanteka mavoko, avakatekisa.

Ta jaha leripfundzeke

¹⁷ Kuteloko Yesu ahumile ni kukhoma ndlela, munhu mun'wana ata ka yena hi kutsutsuma, afika awa, akhinsama mahlweni ka yena, amuvutisa aku: “Mujondzisi lwenene, ningayendla yini lesvaku nitaja rifuwo ra vutomi lebzingaheliki?”

¹⁸ Yesu aku ka yena: “Univitanela yini lwenene xana? Aku na lwenene, loko kungali Xikwembu ntsena.

¹⁹ Wena wayitiva Milawu leyinge: ‘Ungatshuki udlaya, ungatshuki uwosva, ungatshuki uyiva, ungatshuki uveka vumboni bzohemba, ungakanganyisi van'wana, uva ni xichavu ka tatana wa wena ni ka mamana wa wena.’”

²⁰ Yena ahlamula, aku ka yena: “Mujondzisi, hinkwasvu lesvi nisvihlayisile kusukela avutsongwanini bza mina.”

²¹ Kuteloko Yesu amulangutile, amurhandza, kutani aku ka yena: “Wahapfumala xilo xin'we ntsena; famba, uyaxavisa hinkwasvu lesvi unga na svona, unyika svisiwana, kutani utava ni rifuwo tilweni; ndzhaku ka lesvo, tana unilandza.”

²² Kambe jaha leriya riboha mombo hi kutwa marito lawa, rifamba na rikwatile, hikuva ari ni rifuwo lerotala.

²³ Kutani Yesu alanguta hinkwaku, aku ka vajondzisiwa va yena: “Svitanonon'hwa ngopfu aka lavanga ni rifuwo kunghena Mfun'wini wa Xikwembu.”

²⁴ Vajondzisiwa vahlamala svinene hi marito ya yena. Kambe Yesu atlhela aku ka vona: “Vanakulorhi, svinonon'hwa ngopfu kunghena Mfun'wini wa Xikwembu.

²⁵ Svavevuka ka kamela kunghena hi mbhovo wa nayithi, kutlula xipfundzi kunghena Mfun'wini wa Xikwembu.”

²⁶ Kutani kuhlamala ka vona kuyengeteleka; vavutisana, vaku: “Loko svilitano, kungapona mani xana?”

²⁷ Yesu avalanguta aku: “Loko vali vanhu svavatsandza, kambe asvitsandzi Xikwembu, hikuva Xikwembu xikota hinkwasvu.”

²⁸ Kutani Petrosi aku ka Yesu: “Wasvivo, hina hitshikile hinkwasvu, hi kulandza.”

²⁹ Yesu aku: “Nitiyisile nili ka n'wina: Mun'wana ni mun'wana lweyi atshikeke munti wa yena, kumbe makwavu waxinuna kumbe waxisati, kumbe mamana wa yena, kumbe tatana wa yena, kumbe vana, kumbe masimu, hikolaho ka mina ni hikolaho ka Evhangeli,

³⁰ atanyikiwa svilo lesvi, ka dzana (100) minkarhini ya svosvi: Hi lesvaku tiyindlo, ni vamakwavu, ni vamamana ni vana ni masimu, svin'we ni kuxaniseka; kutani minkarhini leyitaka, atanyikiwa vutomi lebzingaheliki.

³¹ Kambe vanyingi lava vanga le mahlweni vatava vakugumesa, ni vakugumesa vatava valemahlweni.”

Yesu ativisa hi khambi ra vunharhu ta rifu ra yena

³² Loko vahali ndleleni, na vali karhi vatlhantukela Yerusalema Yesu aavarhangele mahlweni; vajondzisiwa avahlamala; ni vanhu lava avavalandzelela, na vachava; kutani atlhela avitana lava va khume ni vambirhi hi tlhelo, avativisa lesvingatamuhumelela,

³³ aku: “Vonani, hitlhantukela Yerusalema kutani N'wana-wa-Munhu atanyiketiwa ka Vaprista lavakulu ni ka Vatsali; vatamuyavanyisela rifu ni kumunyiketa ka vamatiko;

³⁴ vatatlanga hi yena, vamupshitela, vamuba hi tinhonga, vamudlaya; kutani ndzhaku ka masiku manharhu atapfuka kufeni.”

Ta Xikombelo xa Yakobe na Yohani

³⁵ Yakobe na Yohani, vana va Zebedewu, vata ka yena, vaku: “Mujondzisi, hirhandza lesvaku uhiyendlela lesvi hingatakukombela svona.”

³⁶ Aku ka vona: “Milava lesvaku nimiyendlela yini xana?”

³⁷ Vaku ka yena: “Hikombela lesvaku, uhinyika kutshama Mfun'wini wa wena lowokwetsima, mun'we vokweni ra wena ra xinene, mun'wana ka leri ra ximantsi.”

³⁸ Yesu aku ka vona: “Amixitivi lexi mixikombelaka. Xana mingasvikota kunwa andzhekweni lowu ninwelaka ka wona, ni kukhuvuliwa hi nkhuvulo lowu ni khuvuliwaka ha wona ke?”

³⁹ Vaku ka yena: “Hingasvikota.” Yesu aku ka vona: “Kunene mitanwa ka ndzheko lowu ninwelaka ka wona, mitakhuvuliwa hi kukhuvula loku nikhuvuliwaka hakona;

⁴⁰ kambe loko kuli kutshama vokweni ra mina ra xinene, hambi ka leri ra ximantsi, ahi mina ningaminyikaka svona, kambe svitava sva lava svilungiseliweke vona.”

⁴¹ Kutani lava va khume, loko vatwa mhaka leyi, vahlundzukela Yakobe na Yohani.

⁴² Hi loko Yesu avavitana aku ka vona: “Masvitiva lesvaku lavativulaka tihosi ta matiko vamafuma hi matimba; na vona vakulukumba vamatiko lawa vamafuma hi matimba.

⁴³ Kambe svingatshuki sviva tano xikarhi ka n'wina; mun'wana ni mun'wana lweyi alavaka kuva lwenkulu xikarhi ka n'wina aave xitirhi xa n'wina;

⁴⁴ na svona, mun'wana ni mun'wana lweyi alavaka kuva wa le mahlweni xikarhi ka n'wina aave xikarawa xa hinkwavu;

⁴⁵ hikuva na yena N'wana-wa-Munhu, angatelanga kutatirheliwa, kambe kutirhela van'wana ni kunyiketa vutomi bza yena kuponisa lavotala.”

Ta Bartimeya lweyi wa xifamahlo, wa mukombeli, loko ahanyisiwa

⁴⁶ Vafika Yeriko. Kaku loko ahuma Yeriko, svin'we ni vajondzisiwa va yena, ni xitshungu lexikulu, Bartimeya wa xifamahlo, mukombeli, n'wana Timewu, aatshamile kusuhi ni ndlela, na ali karhi akombela.

⁴⁷ Loko atwa lesvaku i Yesu wa Nazareta lweyi ataka, asungula kuhuwelela, aku: “Yesu N'wana Davhida, nitwele vusiwana!”

⁴⁸ Lavotala vamutshinya lesvaku amiyela; kambe yena atlhela ahuwelela, aku: “N'wana Davhida, nitwele vusiwana!”

⁴⁹ Kutani Yesu ayima, aku: “Muvitaneni!” Vavitana lweyi wa xifamahlo, vaku ka yena: “Tiyisa mbilu, pfuka uyima, Yesu wakuvitana.”

⁵⁰ Hi loko acukumeta jansi ra yena atlula, ata ka Yesu.

⁵¹ Kutani Yesu amuvutisa aku: “Ulava yini? Ningakupfuna hi yini?” Lweyi wa xifamahlo aku ka yena: “Mufundhisi, ninavela kutlhela nivona!”

⁵² Yesu aku ka yena: “Famba, kupfumela ka wena kukuhanyisile.” Hi nomo-lo atlhela avona, kutani alandza Yesu.