Marka 1 - Testamente Leyimpsha Xichangana

Ta kujondzisa ka Yohani Mukhuvuli

¹ Lawa hi wona masungulu ya Evhangeli ya Yesu Kriste, N'wana wa Xikwembu.

² Tani hilaha kutsaliweke hakona bukwini ya muprofeta Ezaya, loko aku: “Vona, murhumiwa wa mina wata mahlweni ka wena, lweyi angatalungisa ndlela ya wena.

³ Rito ra munhu lweyi ahuwelelaka mananga rili: ‘Lulamisani ndlela ya Hosi, milulamisa ni svindlelana sva yona.’”

⁴ Yohani Mukhuvuli ahumelelise xisvosvo mananga na ali karhi ahuwelela, abzela vanhu kuhundzuka akuva vatakhuvuliwa, ni lesvaku vatarivaleliwa svijoho sva vona.

⁵ Kutani vanhu hinkwavu va tiko ra Yudeya ni vayaki hinkwavu va Yerusalema, avaya vayakhuvuliwa hi yena nambzeni wa Yordani, na vali karhi vativula svijoho sva vona.

⁶ Yohani aayambala sviyambalu svolukiwa hi voya bza kamela, atikhama hi bandi ra xikhumba, aja tintete ni vulombe bza nhova.

⁷ Aapaluxa mahungu lawa mange: “Wata mun'wana ndzhaku ka mina, lweyi anitlulaka hi matimba, lweyi svinganifaneliki kukorhama ni tlhantlha tingoti ta masandhazi ya yena.

⁸ Mina ha noxe ni mikhuvulile hi mati, kambe yena atamikhuvula hi Moya Lowokwetsima.”

Ta kukhuvuliwa ka Yesu

⁹ Hi masiku wolawo, Yesu ahuma Nazareta, anga doropa ra Galileya, ayakhuvuliwa hi Yohani nambzeni wa Yordani.

¹⁰ Kutani loko ali karhi ahuma matini, avona matilo mapfuleka, ni Moya na wulikarhi wuxika henhla ka yena wufana ni xituvana;

¹¹ kutani rito lerihumaka matilweni riku: “Wena u N'wananga lweyi arhandzekaka, lweyi nimutsakelaka.”

Ta kuringiwa ka Yesu

¹² Hi nomo-lo Moya wumuyisa mananga;

¹³ kutani atshama kona masiku ya mune wa makume, na ali karhi aringiwa hi Sathana. Aahanya ni sviharhi sva nhova, kambe tintsumi na tona atimutirhela.

Ta Yesu loko asungula ntirho wa yena Galileya

¹⁴ Ndzhaku ka loko Yohani anghenisiwile jele, Yesu aya Galileya, apaluxa Evhangeli ya Xikwembu, aku:

¹⁵ “Minkarhi yihetisekile, Mfumu wa Xikwembu watshinela kusuhi; hundzukani, mipfumela ka Evhangeli.”

Ta Yesu loko avitana vajondzisiwa va mune

¹⁶ Loko ali karhi alulama ni tiva ra Galileya, avona Simoni ni makwavu Andreya, na vali karhi vahoxa tinkoka ta vona ativeni, hikuva avali vaphasi vatihlampfi.

¹⁷ Yesu aku ka vona: “Nilandzeni, nitamiyendla vaphasi va vanhu.”

¹⁸ Hi loko vatshika tinkoka ta vona, vamulandza.

¹⁹ Loko ahundzanyana aya mahlweni, avona vamakwavu ha vambirhi, Yakobe na Yohani vana va Zebedewu na vali bzatsweni, varhunga tinkoka.

²⁰ Kuteloko avavitanile, vasiya tatana wa vona Zebedewu bzatsweni svin'we ni vatirhi, kutani vamulandza.

Ta munhu lweyi angheniweke hi moya wa chaka

²¹ Hikolaho Yesu ni vajondzisiwa va yena vafika Kapernawume; kutani hi siku ra Savata Yesu anghena sinagogeni, ajondzisa.

²² Avahlamala jondzo ya yena, hikuva aavajondzisa kufana ni lweyi anga ni matimba, kungali kufana ni Vatsali.

²³ Asinagogeni ra vona akuli ni munhu lweyi angheniweke hi moya wa chaka; wona wuhuwelela,

²⁴ wuku: “Mhaka ya hina na wena hi yihi, wena Yesu wa Nazareta? Xana utele kutahilovisa ke? Nakutiva lesvaku u mani: U Lweyi Wohlawuleka wa Xikwembu.”

²⁵ Yesu awukahla, aku: “Miyela! Huma ka munhu yelweyi!”

²⁶ Kutani moya wa chaka wumurhurhumelisa hi matimba, wuhuwelela hi rito lerikulu, wuhuma ka yena.

²⁷ Kutani hinkwavu vahlamala ngopfu, lakakuva vavutisana vaku: “Hi lesvoyini lesvi? I jondzo leyimpsha! Hikuva alerisa hi matimba mimoya ya chaka, kutani na yona yimuyingisa!”

²⁸ Hi loko ndhuma ya yena yihantla yihangalaka matlhelweni hinkwawu ya Galileya.

Ta Yesu loko ahanyisa mamana wa nsati wa Simoni

²⁹ Loko vahuma sinagogeni, vaye kaya ka Simoni na Andreya na vali na Yakobe na Yohani.

³⁰ Mamana wa nsati wa Simoni, aayetlele ali karhi avabza, miri wa yena awuhiseta; kutani vabzela Yesu.

³¹ Hi loko atshinela, amukhoma hi voko, amupfuxa; hi nomo-lo, kuhiseta ka miri kuhangalaka, kutani avatirhela.

Ta Yesu loko ahanyisa lavotala nimajambu

³² Nimajambu, loko ripela, vamutisela hinkwavu lava avali ni mavabzi ni lava avali ni madimoni.

³³ Vayaki hinkwavu va doropa avahlengeletanile nyangweni.

³⁴ Kutani ahanyisa vanhu lavotala, lava avavabza hi mavabzi ya tinxakaxaka, ahlongola ni madimoni layotala. Ntsena yena aangapfumeleli madimoni lawa lesvaku mavulavula, hikuva amamutiva.

Ta Yesu loko ahuma ayajondzisa

³⁵ Yesu apfukisa svinene ahuma doropeni, ayamananga ayakhongela kona.

³⁶ Kambe Simoni ni lava avali na yena vafamba vamulava.

³⁷ Kuteloko vamukumile, vaku ka yena: “Hinkwavu vakulava.”

³⁸ Yena aku ka vona: “Ahiyeni asvidoropanini svin'wana, lesvi svingakusuhi, lesvaku nakona niyapaluxa Evhangeli, hikuva hi lesvi ningatela svona.”

³⁹ Kutani afamba, apaluxa Evhangeli masinagogeni ya vona, tikweni hinkwaru ra Galileya, na ali karhi ahlongola madimoni.

Ta Yesu loko abasisa munhu wa nhlokonho

⁴⁰ Kutani munhu mun'we wa nhlokonho ata ka yena, akhinsama mahlweni ka yena, amukhongela aku: “Loko usvirhandza, unganibasisa.”

⁴¹ Yesu amutwela vusiwana, atshabuluta voko, amukhumba, aku ka yena: “Nasvirhandza, nakubasisa!”

⁴² Kutani hi loko nhlokonho yinyamalala, abasa.

⁴³ Yesu amutlhelisa hi kuhantlisa, amulaya hi matimba akuva ativonela:

⁴⁴ “Vona, ungatshuki ubzela munhu svilo lesvi, kambe famba, uyatikombisa ka Muprista, uhumesa sva kubasisiwa ka wena lesvilerisiweke hi Moxe, svitava vumboni ka vona.”

⁴⁵ Kambe loko munhu lwiya asukile kolaho, afambe apaluxa ni kuhangalasa mahungu wolawo, kukondza Yesu ativiwa madoropeni hinkwawu lawa aanghena ka wona; lesvi svingayendla lesvaku angahangheni na atshunxekile ka wona; hi loko ayatitshamela mananga; kutani vanhu vata ka yena, na vahuma matlhelweni hinkwawu.