Luka 9 - Testamente Leyimpsha Xichangana

Ta kurhumiwa ka lava va khume ni vambirhi

¹ Yesu ahlengeleta lava va khume ni vambirhi, avanyika matimba ni vuhosi henhla ka madimoni, ni kuhanyisa lavavabzaka.

² Kutani avarhuma kuyapaluxa Mfumu wa Xikwembu ni kuhanyisa timbabzi.

³ Aku ka vona: “Loko svili sva ndlela, mingatekeni nchumu, hambi yili nhonga, kumbe nkwama, hambi tili timbuva, kumbe male, hambi ali xiyambalu xocinca.

⁴ Kutani loko vanhu vamiyamukela njangwini wa vona, tshamani na vona, miko misuka muntini wolowo.

⁵ Kambe loko vangamiyamukeli, humani doropeni rakona, kutani migungundza ntshuri milengeni ya n'wina; svitava vumboni ka vona.”

⁶ Hi loko vahuma, vafamba hi svidoropana, na vali karhi vapaluxa Evhangeli hinkwaku, vahanyisa timbabzi.

Ta kukanakana ka Heroda

⁷ Hosi Heroda atwa hinkwasvu lesvihumelelaka, kutani akanakana ngopfu, hikuva van'wana avaku: “Yohani apfukile kufeni.”

⁸ Van'wana avaku: “Eliya ahumelelile.” Van'wana avaku: “I mun'we wa vaprofeta va khale angapfuka kufeni.”

⁹ Kambe Heroda aku: “Loko ali Yohani, ni mutsemile nhloko; kutani lweyi nitwaka timhaka ta yena letotano i mani ke?” Kutani aanavela kumuvona.

Ta kuphameliwa ka vanhu va ntlhanu wa makhulu (5 000)

¹⁰ Kuteloko vapostola vavuyile, varungulela Yesu hinkwasvu lesvi vasviyendleke, kutani avateka, aya na vona matlhelweni ya doropa ra Betisayida na vali voxe.

¹¹ Loko xitshungu xisvitivile, ximulandza, kutani axiyamukela, avulavula na xona hi ta Mfumu wa Xikwembu, ahanyisa hinkwavu lava avavilela kuhanyisiwa.

¹² Loko jambu rilava kupela, lava va khume ni vambirhi vata ka yena vaku: “Tlhelisa xitshungu lesvaku xiya svidoropanini sva lomu kusuhi nilesvimintaneni, xitayakuma koyetlela ni svakuja kona, hikuva halenu hi le mananga.”

¹³ Kambe aku ka vona: “Vaphameleni n'wina!” Vona vaku: “Lesvi hinga na svona, asvitluli ntlhanu wa svinkwa ni tihlampfi timbirhi, handle ka loko hingaya xavela vanhu lava hinkwavu svakuja.”

¹⁴ (Hikuva vanhu vakona avalava kuringana ntlhanu wa makhulu (5 000).) Kambe Yesu aku ka vajondzisiwa va yena: “Vatshamisiseni hi mintlawa ya vanhu vatlhanu wa makume.”

¹⁵ Kutani vayendlisa svosvo, vavatshamisisa hinkwavu.

¹⁶ Hi loko Yesu ateka svinkwa sva ntlhanu, ni tihlampfi timbirhi, alanguta henhla tilweni, akhensa, akhemelela, anyika vajondzisiwa lesvaku vayanyika xitshungu.

¹⁷ Vaja vaxurha hinkwavu, kutani kurholeliwa matlhantlha lawa vamasiyeke, matata svirhundzu sva khume ni svimbirhi.

Ta Petrosi loko avula lesvaku Yesu i mani

¹⁸ Siku rin'wana, loko Yesu akhongela tlhelweni, na ali ni vajondzisiwa va yena, avavutisa aku: “Vanhu vali ni mani xana?”

¹⁹ Vahlamula vaku: “Van'we vali, u Yohani Mukhuvuli. Van'wana vali, hi wena Eliya. Kambe van'wana vavula lesvaku u mun'we wa vaprofeta va khale angapfuka kufeni.”

²⁰ Aku ka vona: “N'wina ke, mili ni mani xana?” Simoni Petrosi ahlamula aku: “U Mesiya wa Xikwembu.”

Ta Yesu loko ativisa rifu ra yena

²¹ Kutani avalaya ni kuvalerisa lesvaku vangatshuki vabzela munhu mhaka leyi.

²² Atlhela aku: “N'wana-wa-Munhu atafanela kutwisiwa kuvaviseka lokukulu, asoliwa hi vakulukumba ni Vaprista lavakulu, ni Vatsali; atadlawa, kambe apfuka kufeni hi siku ra vunharhu.”

²³ Kutani abzela vanhu hinkwavu aku: “Loko munhu alava kunilandza, aatitshike, atirhwexa xihambanu xa yena siku rin'wana ni rin'wana, kutani anilandza.

²⁴ Hikuva lweyi arhandzaka kutihlayisela vutomi bza yena, atalahlekeliwa hi bzona, kambe lweyi alahlekeliwaka hi vutomi bza yena hikolaho ka mina, atabziponisa.

²⁵ Hikolaho, loko munhu akota kufuwa misava hinkwayu kambe alahlekeliwa, kumbe kulovisa vutomi bza yena, svitamu pfuna yini ke?

²⁶ Lweyi akhomiwaka hi tingana hikolaho ka mina ni marito ya mina, N'wana-wa-Munhu na yena atakhomiwa hi tingana hikolaho ka munhu yelweyo, siku leri angatavuya kukwetsimeni ka yena, na ali ni Tatana wa yena ni tintsumi letokwetsima.

²⁷ Namibzela hakunene nili ka n'wina: Xikarhi ka lavanga kola, ku ni van'wana vangatakala vangakhumbiwi hi rifu na vangasivona Mfumu wa Xikwembu.”

Ta kuvangama ka Yesu

²⁸ Asvilava kufika masiku ya ntlhanu ni manharhu ndzhaku ka loko Yesu avulile marito lawa. Kutani ateka Petrosi, na Yohani, na Yakobe, atlhantukela ntshaveni ayakhongela.

²⁹ Loko ali karhi akhongela, nghohe ya yena yivoneka yihundzukile, xiyambalu xa yena yibasa, yiphatima.

³⁰ Hi nomo-lo, kuhumelela vavanuna vambirhi vavulavula na yena, anga Moxe na Eliya.

³¹ Vahumelela vali lavakwetsimaka, kutani vavulavula hi ta kuhundza ka yena misaveni, lokungatafanela kuyendleka Yerusalema.

³² Petrosi ni lava avali na yena avakhomiwile hi vurhongo; kambe loko vasisimuka, vavona Yesu na avangama, vavona ni vavanuna vambirhi na vayimile na yena.

³³ Loko vavanuna lava vasuka vamusiya, Petrosi aku ka yena: “N'winyi wanga, svisasekile loko hingatshama kola; ahiyakeni mixaxa yinharhu, wun'we wa wena, wun'we wa Moxe, wun'wana wa Eliya.” Aangativi lexi axivulaka.

³⁴ Aku ahavula svosvo, refu rita, ritavafunengeta; loko vali ndzeni ka rona, vajondzisiwa lava vakhomiwa hi kuchava.

³⁵ Kutani rito rihuma refini riku: “Lweyi i N'wananga, lweyi ni muhlawuleke, muyingiseni!”

³⁶ Loko rito rimiyelile, vavona Yesu ali yexe. Vajondzisiwa vatshama hi timhaka toleto nkarhi wolowo, vangarunguleli munhu ni xin'we xa lesvi vasvivoneke.

Ta Yesu loko ahanyisa jaha leri arili ni moya wa chaka

³⁷ Siku leritlhantamaka, loko vangirimelile hi le ntshaveni, xitshungu lexikulu xihlangana na Yesu.

³⁸ Kutani kutshuka kuhumelela mun'we wanuna hi le xintshungwini aku: “Mujondzisi, na kukhongela, languta n'wana wa mina, hikuva hi yena n'wananga ali yexe.

³⁹ Loko moya wumukhoma, xikan'wekan'we wuhuwelela, wumurhurhumelisa, wumutlhutlhisa khuvi, wumu tlatlalata, kutani loko wumu tshika, wuhuma hi kunonon'hwa.

⁴⁰ Nikombelile vajondzisiwa va wena lesvaku vawuhlongola, kambe vatsandzekile.”

⁴¹ Yesu ahlamula aku: “Ha! Rixaka leringapfumeliki, lerohomboloka, nitava na n'wina ni kumilehisela mbilu kufika rini ke? Tisa n'wana wa wena halenu!”

⁴² Loko n'wana ahatshinela, dimoni rimutlatlalata, rimurhurhumelisa, kambe Yesu atshinya moya lowu wa chaka, ahanyisa n'wana, amuyisa ka tatana wa yena.

⁴³ Kutani hinkwavu vahlamala vuhosi lebzikulu bza Xikwembu. Loko hinkwavu vaha hlamala hinkwasvu lesvi Yesu asviyendleke, yena abzela vajondzisiwa va yena aku:

Ta Yesu loko atlhela ativisa rifu ra yena

⁴⁴ “Rhiyani tindleve miyingisa svinene. Nili: N'wana-wa-Munhu atanyiketiwa mavokweni ya vanhu.”

⁴⁵ Kambe vajondzisiwa avatwisisanga marito lawa, amavatumbelelile, lesvaku vangamatwisisi; avachava ni kumuvutisa lesvi mavulaka svona.

Lwenkulu Mfun'wini wa Xikwembu i mani?

⁴⁶ Kutani kuhumelela kukanetana xikarhi ka vona; avalava kutiva lesvaku lweyi anga lwenkulu ka vona i mani.

⁴⁷ Kambe Yesu, hi kutiva miyehleketo ya vona, ateka xin'wanana, axinyimisa kusuhi na yena, kutani aku ka vona:

⁴⁸ “Mani na mani lweyi ayamukelaka xin'wanana lexi hi vito ra mina, waniyamukela, kutani mani na mani lweyi aniyamukelaka, ayamukela ni lweyi anirhumeke. Hikuva lweyi anga lwentsongo xikarhi ka n'wina hinkwenu, hi yena lweyi anga nkulu.”

⁴⁹ Kutani Yohani atlhela aku: “Mujondzisi, hivonile munhu mun'wana lweyi ahlongolaka madimoni hi Vito ra wena, kutani himutsimbisile, hikuva angakulandzeli na hina.”

⁵⁰ Yesu aku ka yena: “Mingamutsimbiseni, hikuva lweyi angalwiki na n'wina, ayima na n'wina.”

Ta Vasamariya lavayalaka kuyamukela Yesu

⁵¹ Loko nkarhi wa kususiwa ka yena misaveni wulava kufika, Yesu akanya mbilu, akhoma ndlela yoya Yerusalema

⁵² Kutani arhuma varhumiwa va yena lesvaku vamurhangela mahlweni; kutani vafamba, vayanghena xidoropanini xa Vasamariya lesvaku vamulungisela koyetlela kona.

⁵³ Vanhu vakona avamuyamukelanga, hikuva aakombisa lesvaku akongoma Yerusalema.

⁵⁴ Vajondzisiwa va yena Yakobe na Yohani, loko vasvivona vaku: “Hosi, xana wasvilava lesvaku hivitana ndzilo wuxika hi le tilweni wuvahisa ke?”

⁵⁵ Kambe Yesu ahundzukula, avatshinya, [aku: “Moya lowu minga na wona, amiwutivi.

⁵⁶ Hikuva N'wana-wa-Munhu angatangakutalovisa vanhu, kambe kutava ponisa.”] Kutani vaya xidoropanini xin'wana.

Ta vanhu lavanavelaka kulandza Yesu

⁵⁷ Loko vahali ndleleni, munhu mun'wana aku ka yena: “Nitakulandza hinkwaku lomu uyaka kona.”

⁵⁸ Yesu amuhlamula aku: “Makhanga mani mincele, ni tinyanyana ti ni svisaka, kambe N'wana-wa-Munhu anga na laha angakhigetelaka nhloko ya yena kona.”

⁵⁹ Ka mun'wana aku: “Nilandze!” Yelweyo ahlamula aku: “Hosi, wanganipfumelela nirhanga hi kuyalahla tatana.”

⁶⁰ Yesu aku ka yena: “Tshika vafi, valahla vafi va vona; kambe wena famba uyapaluxa, ta Mfumu wa Xikwembu.”

⁶¹ Mun'wana kambe aku: “Hosi, mina ni takulandza, kambe ni pfumelele nirhanga niyasalisa valekaya.”

⁶² Hi loko Yesu aku ka yena: “Munhu lweyi akhomaka gejo, kutani ahundzukula alanguta ndzhaku, angafaneliwi hi Mfumu wa Xikwembu.”