Luka 8 - Testamente Leyimpsha Xichangana

Ta vavasati lavaseketelaka Yesu

¹ Ndzhaku ka svosvo, Yesu afamba hi doropa rin'wana ni rin'wana ni xidoropana xin'wana ni xin'wana ali karhi avula Rito, apaluxa Evhangeli ya Mfumu wa Xikwembu; lava va khume ni vambirhi na vona avali na yena,

² ni vavasati van'wana lavatshunxiweke ka mimoya ya chaka ni leka mavabzi, avali kona. Aali Mariya lweyi avaku i wa Magadala, lweyi kuhlongoliweke ntlhanu wa madimoni ni mambirhi ka yena,

³ na Jowana, nkata Khuza ndhuna ya Heroda, na Suzana, ni vavasati van'wana lavotala lava avatirhisa sva vona kupfuna Yesu ni vajondzisiwa va yena.

Ta xifaniso xa muhaxi

⁴ Vanhu avata ka Yesu vahuma madoropeni layotala, vahlengeletana vakondza vava xitshungu lexikulu, kutani avulavula na vona hi xifaniso aku:

⁵ “Murimi wokarhi ahumile ayahaxa mbewu; loko ali karhi ahaxa, timbewu tin'we tiwela ndleleni, vanhu vatikandziyela, kutani tinyanyana tita, titatija hinkwatu.

⁶ Tin'wana tiwela maribzeni, kutani loko timila, svimilwa svivuna hi kupfumala ndzhongo.

⁷ Timbewu tin'wana kambe tiwela xikarhi ka mintwa, kutani mintwa yimila svin'we na tona, yitikamanyeta tifa.

⁸ Kambe tin'wana tiwela misaveni leyinene; loko timilile, tichela ka dzana.” Loko avulile svosvo, atlakusa rito aku: “Lweyi anga ni tindleve toyingisa, aayingise.”

Nkongometo wa xifaniso

⁹ Kutani vajondzisiwa va Yesu vamuvutisa xifaniso lexi, akuva vativa lesvaku xivula yini.

¹⁰ Kutani aku: “N'wina, minyikiwile kutiva svihundla sva Mfumu wa Xikwembu, kambe van'wana vanyikiwa svona hi svifaniso, lesvaku:” “‘Ni loko vavona, vangavonisisi, ni loko vatwa, vangatwisisi.’”

Ta Yesu loko ahlamusela xifaniso xa muhaxi

¹¹ “Loko xili xifaniso lexi xivula lesvi: Timbewu i Rito ra Xikwembu.

¹² Leti tingawela ndleleni, i vanhu lavatwaka Rito; kutani Diyavulosi ata, arisusa timbilwini ta vona, lesvaku vatakala vangapfumeli, vangaponisiwi.

¹³ Timbewu letingawela maribzeni, i vanhu lavayamukelaka Rito hi kutsaka siku leri varitwaka, kambe vapfumala timintsu, vatiyisela nkarhinyana ntsena; kutani hi siku ra ndzingo vatlhelela ndzhaku.

¹⁴ Timbewu letingawela mintweni, i vanhu lavatweke Rito, kambe loko vali karhi vaya mahlweni, vakamanyetiwa hi kuvilela, ni rifuwo, ni kutitsakisa hi sva vutomi lebzi, kutani vangaveki mihandzu leyiwupfaka.

¹⁵ Kambe mbewu leyingawela misaveni leyinene, i vanhu lavayingisaka Rito hi timbilu letolulama, letinene, varihlayisa, vaveka mihandzu hi kutiyisela.

Ta xifaniso xa rivoni

¹⁶ “Aku na munhu lweyi alumekaka rivoni, kutani arimbhonya hi mbita, kumbe kuriveka hansi ka mubedo; kambe ariveka henhla, lesvaku lavanghenaka ndlwini vavona kukhanya.

¹⁷ Hikuva aku na xilo lexifihliweke lexi xingatakala xingapaluxiwi, aku na xilo lexinga xihundleni lexi xingatakala xingativiwi ni kuhumela rivaleni.

¹⁸ Hikolaho, tivoneleni, mihlayisa lesvi misvitwaka. Lweyi anga ni xanchumu, atanyikiwa svin'wana, kasi lweyi angaliki na nchumu, atatekeliwa ni lexi ayehleketaka lesvaku a na xona.”

Ta mamana wa Yesu ni vamakwavu

¹⁹ Mamana wa Yesu ni vamakwavu vata ka yena, kambe vatsandzeka kufika kusuhi na yena hikolaho ka xitshungu.

²⁰ Kutani van'wana vamubzela vaku: “Mamana wa wena ni vamakwenu va laha handle, valava kukuvona.”

²¹ Kambe yena aku: “Mamana ni vamakwerhu, hi lavatwaka Rito ra Xikwembu, vavuya vahanya ha rona.”

Ta Yesu loko amiyeta xidzedze

²² Siku rin'wana Yesu anghena bzatswini ni vajondzisiwa va yena, kutani aku ka vona: “Ahipeleleni hiya ka tlhelo rin'wana ra tiva.” Hi loko vatluta vafamba.

²³ Vate vahapela, Yesu akhomiwa hi vurhongo ayetlela; kutani xidzedze xivafikela tiveni, bzatsu rilava kutala hi mati, kutani vava khombzeni.

²⁴ Vaya mupfuxa vaku: “Hosi, Hosi, halova!” Hi loko apfuka ayima, atshinya moya ni magandlati, sviva svimiyela, kurhula kuva kona.

²⁵ Kutani aku ka vona: “Xana kupfumela ka n'wina ku kwihi ke?” Vona vachava, vahlamala, vavutisana vaku: “Xana i munhu muni lweyi, lesvi alerisaka mheho ni tiva, sviva svimuyingisa ke?”

Ta kuhanyisiwa ka Mugerasi lweyi aali ni madimoni

²⁶ Kutani vapelela tikweni ra Vagerasi lerilangutaneke na Galileya.

²⁷ Loko afikile ribuweni, axika, kutani ahlangana ni mun'we wanuna lweyi aahuma hi le doropeni, ali ni madimoni; akuli khale angahayambali nchumu, ni lendlwini aangahatshami, kambe aatshama masirheni.

²⁸ Loko avona Yesu, ahuwelela, atiwisela hansi mahlweni ka yena, atlakusa rito aku: “Mhaka ya mina na wena hi yihi ke, wena Yesu N'wana wa Xikwembu xa le henhlahenhla? Nakukhongela, unganixanisi.”

²⁹ Aavula svosvo hikuva Yesu aalerisile moya lo wa chaka kuhuma ka munhu yelweyo; moya wakona awutolovela kumukhoma, kutani avamuboha mavoko ni milenge hi machini vamulavelela, kambe yena atsema tinsimbi toleto, ayisiwa mananga hi moya lowa chaka.

³⁰ Yesu amuvutisa aku: “Vito ra wena u mani?” Aku: “Hi vandla.” Hikuva akunghenile ka yena madimoni layotala.

³¹ Kutani makombela Yesu lesvaku angamabzeli kuhuma maya kheleni ra vafi.

³² Akuli ni ntlhambi lowukulu wa makhumba kolaho, lawa amali kujeni le gangeni. Madimoni makombela svinene ka Yesu lesvaku amapfumelela kuyanghena ka wona. Kutani amapfumelela.

³³ Hi loko madimoni mahuma ka munhu yelweyo, mayanghena makhumbeni, kutani hinkwawu matsutsumela nkoveni, maya tihoxa xiziveni xa tiva, mambombomela kona.

³⁴ Loko varisi va wona vavona lesvihumeleleke, vabaleka, vayarungulela vayaki va doropa ni va le masin'wini.

³⁵ Kutani vona vahuma, vayavona lesvihumeleleke. Loko vafika ka Yesu, vakuma munhu lweyi madimoni mangasuka ka yena na atshamile milengeni ya Yesu, ayambalile, ali munhu; kutani vachava ngopfu.

³⁶ Lava vavoneke timhaka leti, vavarungulela hilaha munhu lweyi wa madimoni ahanyisiweke hakona.

³⁷ Kutani vayaki hinkwavu va tiko ra Vagerasi, vakombela Yesu lesvaku asuka tikweni ra vona, hikuva avakhomiwile hi kuchava lokukulu. Hi loko Yesu anghena bzatswini, atlhela.

³⁸ Kutani munhu lweyi madimoni mahumeke ka yena, akombela kufamba na Yesu; kambe Yesu amutlhelisa, aku:

³⁹ “Tlhelela kaya, uyavula lesvikulu lesvi Xikwembu xiku yendleleke svona.” Kutani afamba ayarungula ka doropa hinkwaru svilo lesvikulu lesvi Yesu amuyendleleke svona.

Ta n'wana Jayiro

⁴⁰ Kuteloko Yesu atlhelile, xitshungu ximuyamukela hi kutsaka, hikuva hinkwavu avamurindzile.

⁴¹ Kutani kuta wanuna lweyi avaku i Jayiro, lweyi aali murhangeli wa sinagoga; awa milengeni ya Yesu, amukhongela lesvaku anghena muntini wa yena,

⁴² hikuva aali ni n'wana mun'we ntsena wanhwanyana, wa malembe yolava kuringana khume na mambirhi, lweyi aalikusuhi ni kufa. Loko Yesu asuka ayakona, akamanyetiwa hi xitshungu.

Ta wansati lweyi akhumbeke sviyambalu sva Yesu

⁴³ Akuli ni wansati kolaho lweyi aali ni mavabzi ya xitlatla lawa amamukarhata hi malembe ya khume ni mambirhi; [aahetile xuma xa yena hinkwaxu tin'angeni,] kungali na munhu lweyi akotaka kumuhanyisa.

⁴⁴ Ata hi kunyanimela hi le ndzhaku ka Yesu, akhumba makumu ya sviyambalu sva yena, kutani hi nomo-lo, vuvabzi bza yena bza ngati bzihola.

⁴⁵ Yesu aku: “I mani lweyi anikhumbeke?” Hinkwavu vakaneta, Petrosi aku: “N'winyi wanga, urhendzeliwe hi xitshungu, kutani xakukamanyeta!”

⁴⁶ Kambe Yesu aku: “Munhu wokarhi anikhumbile hikuva ni svitwile loko kuhuma matimba laha ka mina.”

⁴⁷ Loko wansati avonile lesvaku akumiwile, ata hi kurhurhumela, awela milengeni ya Yesu, ahlamusela mahlweni ka vanhu hinkwavu lesvi amukhumbeleke svona, ni hilaha ahanyisiweke hakona hi kuhantlisa.

⁴⁸ Kutani Yesu aku ka yena: “N'wananga, kupfumela ka wena kukuhanyisile, famba hi kurhula.”

⁴⁹ Aku ahavulavula, kuta mun'we lweyi ahumaka ka murhangeli wa sinagoga, afika ativisa Jayiro aku: “N'wana wa wena afile, ungahakarhati Mujondzisi.”

⁵⁰ Kambe loko Yesu asvitwa, aku ka Jayiro: “Ungachavi, pfumela ntsena, atahanya.”

⁵¹ Loko afikile muntini, angapfumelelanga munhu ni mun'we kunghena na yena ndlwini, loko kungali Petrosi, na Yohani, na Yakobe, ni vapsali va lweyi wanhwanyana.

⁵² Vanhu hinkwavu avamurila hi xiviti; kutani Yesu aku: “Mingarileni; angafanga, ayoyetlela.”

⁵³ Kutani vamuhleka, hi kutiva lesvaku n'wana afile.

⁵⁴ Kambe Yesu amukhoma hi voko, amuvitana aku: “Nhwanyana, pfuka!”

⁵⁵ Moya wutlhelela ka yena, asisimuka, kutani Yesu avalerisa kumunyika svakuja.

⁵⁶ Vapsali va yena vahlamala ngopfu; kambe avalerisa lesvaku vangabzeli munhu lesvihumeleleke.