Luka 7 - Testamente Leyimpsha Xichangana

Ta Yesu loko ahanyisa mutirhi wa ndhuna

¹ Loko Yesu ahetile kujondzisa vanhu svilo lesvi hinkwasvu, anghena Kapernawume.

² Akuli ni ndhuna ya dzana ra masochwa kona; ayili ni mutirhi lweyi yimurhandzaka ngopfu, kambe mutirhi lweyi aavabza, ali kusuhi ni kufa.

³ Loko ndhuna yitwa ndhuma ya Yesu, yirhuma madoda yokarhi ya Vayuda maya ka yena, mayamukombela lesvaku ata, atahanyisa mutirhi wa yona.

⁴ Loko mafika ka Yesu, mamukombela svinene, maku: “Svamufanela lesvaku umuyendlela svona,

⁵ hikuva arhandza va ka hina, nasvona ahiyakele sinagoga.”

⁶ Kutani Yesu afamba na vona. Loko afikile kusuhi ni kaya ka ndhuna, yona yirhuma vanghanu va yona, vayamubzela, vaku: “Hosi, ungatikarhati utafika la, hikuva asvinifanelanga lesvaku unghena ndlwini ya mina.

⁷ Na mina ke, anititwanga na nili lweyi nifanelaka kutakuyamukela; kambe vula rito ntsena lesvaku mutirhi wa mina ahanya.

⁸ Mina ninga munhu lweyi afumiwaka hi van'wana, ni ni masochwa hansi ka mina; loko niku ka rin'we ra wona: ‘Famba!’ Rafamba; ka rin'wana: ‘Tana!’ Rata; ni le ka mutirhi wa mina: ‘Yendla lesvo karhi!’ Wasviyendla.”

⁹ Loko Yesu atwa marito lawa, ahlamala, kutani ahundzukula alanguta xitshungu lexi aximuheleketa aku: “Namibzela nili: Anisikuma kupfumela lokofana ni loku, hambi kuli xikarhi ka Vaisrayele.”

¹⁰ Loko lavarhumiweke vatlhelela kaya, vakuma mutirhi na ahanyile.

Ta Yesu loko apfuxa n'wana wa mufelakazi aNayini

¹¹ Ndzhaku ka svosvo, Yesu aya doropeni leri vange i Nayini. Vajondzisiwa va yena ni vanhu lavotala vafamba na yena.

¹² Loko afika kusuhi ni nyangwa ya doropa, avona vanhu lavahumaka na varhwalile mufi, lweyi aali n'wana mun'we ka mamana wa yena wa mufelakazi, kutani xitshungu lexotala xa vanhu va doropa axiheleketa mamana lwiya.

¹³ Loko Hosi Yesu amuvona, amutwela vusiwana, aku ka yena: “Ungarili.”

¹⁴ Hi loko atshinela, akhumba nkaxa lowu awuli ni ntsumbu kutani lava va wurhwaleke vayima; kutani aku: “Jaha, nili ka wena: Pfuka!”

¹⁵ Kutani mufi apfuka atshama, asungula kuvulavula. Kutani Yesu amuvuyisa ka mamana wa yena.

¹⁶ Hinkwavu vakhomiwa hi kuchava, vadzunisa Xikwembu vaku: “Kuhumelele muprofeta lwenkulu xikarhi ka hina.” Nasvona avaku: “Xikwembu xiyendzele tiko ra xona.”

¹⁷ Kutani ndhuma ya yena yihangalaka tikweni hinkwaru ra Vayuda ni le matikweni lawa manga kusuhi na rona.

Ta lavarhumiweke hi Yohani Mukhuvuli

¹⁸ Timhaka leti hinkwatu tiyarunguleliwa Yohani hi vajondzisiwa va yena.

¹⁹ Kutani Yohani ahlawula vambirhi xikarhi ka vona, avarhuma ka Hosi kuyavutisa vaku: “Xana hi wena lweyi vange wata, kumbe hahalangutela mun'wana ke?”

²⁰ Loko vavanuna lava vafikile ka Yesu, vaku: “Yohani Mukhuvuli ahirhumile ka wena. Ate: ‘Xana hi wena lweyi vange wata, kumbe hahalangutela mun'wana ke?’”

²¹ Hi nkarhi wolowo Yesu ahanyisa lavotala lava vaxanisiwaka hi mavabzi, ni lavakarhatekaka, ni lavanga ni mimoya leyobiha, ahanyisa ni lavotala lavafeke mahlo.

²² Kutani ahlamula varhumiwa, aku: “Fambani miyarungulela Yohani lesvi misvivoneke ni lesvi misvitweke; svifamahlo sva vona, svilima svafamba, va nhlokonho vabasisiwa, lava vafeke tindleve vatwa, vafi vapfuka, svisiwana svirunguleliwa Evhangeli.

²³ Kutani kukatekile lweyi angatakala angakhunguvanyeki hikolaho ka mina.”

²⁴ Kuteloko varhumiwa va Yohani vasukile, Yesu asala avulavula hi Yohani, aku ka xitshungu: “Amiyile kuyahlalela yini mananga xana? Arili rihlanga leritsekatsekisiwaka hi moya ke?”

²⁵ Ahihim! Loko svilitano, amiyela kuyavona yini ke? Xana aali munhu lweyi ayambaleke svosaseka ngopfu ke? Vonani, lavayambalaka khwatsi, ni lavahanyaka vutomi bza maxovo, va le tindlwini ta vuhosi.

²⁶ Nibzeleni, amiyela kuyavona yini ke? Aali muprofeta xana? Ina, aali yena, ni kutlula ni muprofeta.

²⁷ Hi yena lweyi kungatsaliwa ta yena loko vaku: “‘Vona, nirhuma ntsumi ya mina mahlweni ka wena, yitakurhangela mahlweni, yilungisa ndlela ya wena.’

²⁸ “Nitiyisile nili ka n'wina: Xikarhi ka vanhu lavapsaliweke hi vavasati, aku na lweyi atlulaka Yohani; kambe lwentsongo ka hinkwavu Mfun'wini wa Xikwembu, i nkulu ka Yohani.”

²⁹ Vanhu hinkwavu, kun'we ni vakangayisi, avayingisa Yesu; avayendlile kurhandza lokunene ka Xikwembu hi kukhuvuliwa hi Yohani.

³⁰ Vafarisi ni vajondzisi va Nawu vona avangakhuvuliwanga hi Yohani, hikuva avayala makungu ya Xikwembu henhla ka vona.

³¹ Yesu atlhela aku: “Vanhu va masiku lawa, ningavafanisa na yini ke? Vafana ni vanhu vahi ke?”

³² Vafana ni svihlangi lesvi svitshameke ntsendzeleni, svilengetana sviku: “‘Himichayele nanga, kambe amicinanga; hiyimbelelile tinsimu ta mahlomulu, kambe amirilanga.’

³³ “Hi ndlela leyi, Yohani Mukhuvuli atile angaji svakuja, anganwi vhinyu, kutani miku: ‘A ni dimoni.’”

³⁴ “N'wana-wa-Munhu atile aja, anwa, kutani miku: ‘Langutani, munhu wa makolo, wa xidakwa, lweyi atwananaka ni vahakelisi va rhesa ni vajohi!’”

³⁵ “Hambi svilitano, hinkwavu lavayamukelaka vutlhari bza Xikwembu, vabzikuma bzilulamile.”

Ta Yesu loko ali kaya ka Simoni lweyi wa Mufarisi

³⁶ Mun'wana wa Vafarisi arhamba Yesu kuta taja na yena. Hi loko anghena ndlwini ya Mufarisi lweyi, atshama kujeni.

³⁷ Akuli ni wansati wa mujohi doropeni rolero; loko atwa lesvaku Yesu atshamile kujeni ndlwini ya Mufarisi, atisa ximbitana xa ribze robasa lexitaleke hi mafurha yonun'hwela.

³⁸ Kutani ata hi le ndzhaku ka Yesu, akhinsama ali karhi arila, atsakamisa ni milenge ya Yesu hi minhloti, ayisula hi misisi ya yena, amun'qunta; ndzhaku ka svosvo ayitota hi mafurha yotola lawa yonun'hwela.

³⁹ Loko Mufarisi lweyi angarhamba Yesu asvivona, avilela mbilwini ya yena aku: “Loko munhu lweyi aali muprofeta, aatava ativile lesvaku wansati lweyi amukhumbaka i mani, ni lesvaku i munhu muni, hikuva i mujohi.”

⁴⁰ Yesu avulavula na yena aku: “Simoni, ni ni rito ka wena.” Yena aku: “Vulavula, Mujondzisi.”

⁴¹ Yesu aku: “Akuli ni vanhu vambirhi lava avali ni nandzu ka munhu wa mabindzu. Mun'we aali ni nandzu wa timale ta ntlhanu wa madzana (500), mun'wana ta ntlhanu wa makume (50).

⁴² Lesvi avapfumala xo muhakela hi xona, munhu lweyi avarivalela ha vumbirhi bza vona. Xana hi wihi ka vona lweyi angatamurhandza ngopfu ke?”

⁴³ Simoni ahlamula aku: “Natshemba, hi lweyi arivaleliweke nandzu lowukulu.” Yesu aku ka yena: “Kunene, utiyisile.”

⁴⁴ Kutani ahundzukula alanguta wansati, aku ka Simoni: “Wansati lweyi, wa muvona xana? Ninghene ndlwini ya wena, awuninyikanga mati nihlamba milenge; kambe yena atsakamisile milenge ya mina hi minhloti, atlhela ayisula hi misisi ya yena.

⁴⁵ Awunin'quntanga; kambe lweyi, kusukela ni nghena laha, angatshikanga kunin'qunta milenge.

⁴⁶ Awunitotanga mafurha nhlokweni; kambe lweyi atotile milenge ya mina hi mafurha lawa yotola yonun'hwela.

⁴⁷ Hikolaho nili, lweyi arivaleliweke svijoho lesvotala, rirhandzu ra yena i rikulu, kasi lweyi arivaleliweke lesvitsongo, ni rirhandzu ra yena i ritsongo.”

⁴⁸ Kutani aku ka wansati: “Svijoho sva wena svirivaleliwile.”

⁴⁹ Lava vatshameke kujeni svin'we na yena, vasungula kuvilela timbilwini ta vona, vaku: “Lweyi i mani xana, lesvi akotaka ni kurivalela vanhu svijoho sva vona?”

⁵⁰ Hi loko aku ka wansati: “Kupfumela ka wena kukuponisile, famba hi kurhula.”