Luka 6 - Testamente Leyimpsha Xichangana

Yesu i Hosi ya Savata

¹ Hi siku ra Savata, Yesu ahundza hi le xikarhi ka masimu. Kutani vajondzisiwa va yena vatshova minchocho ya trigu, vasvosva hi mavoko, vaja.

² Kambe Vafarisi van'wana vaku: “Hikolaho ka yini miyendla lesvingapfumeleliwiki hi siku ra Savata ke?”

³ Yesu avahlamula aku: “Xana amijondzanga lesvingayendliwa hi Davhida, siku leri angatwa ndlala, yena ni lava avali na yena ke?

⁴ Anghenile ndlwini ya Xikwembu, ateka svinkwa sva mhamba lesvingafanelangiki kujiwa hi vanhu van'wana, loko kungali hi vaprista ntsena, kutani aja, atlhela anyika ni lava avali na yena.”

⁵ Kutani aku ka vona: “N'wana-wa-Munhu i Hosi ya Savata.”

Ta kuhanyisiwa ka munhu wa kukhwanyala voko

⁶ Siku rin'wana ra Savata anghena sinagogeni ajondzisa; kutani akuli ni munhu kona lweyi voko ra yena ra xinene arikhwanyalile.

⁷ Vatsali ni Vafarisi vaxiya Yesu, kuvona kumbe atahanyisa munhu hi siku ra Savata, lesvaku vatakuma lexi vangatamuhehlaka ha xona.

⁸ Kambe yena aativa miyehleketo ya vona, kutani aku ka munhu wa kukhwanyala voko: “Suka uyima la xikarhi!” Yena asuka ayima.

⁹ Yesu aku ka vona: “Namivutisa: Xana lesvilulameke kuyendliwa hi siku ra Savata hi svihi ke: Kuyendla lesvinene kumbe kuyendla lesvobiha, kuponisa munhu kumbe kumulovisa ke?”

¹⁰ Avahonolela svinene hinkwavu kutani aku ka munhu lwiya: “Tshambuluta voko ra wena!” Yena aritshambuluta, kutani voko ra yena ritlhela riwololoka.

¹¹ Vatsali ni Vafarisi vahlundzuka, kutani vayatwanana lesvi vangatasviyendla ha Yesu.

Ta Yesu loko ahlawula vapostola va khume ni vambirhi

¹² Masikwini wolawo Yesu asuka aya ntshaveni ayakhongela; kutani atshama vusiku hinkwabzu na ali karhi akhongela Xikwembu.

¹³ Loko bzixile, avitana vajondzisiwa va yena, kutani xikarhi ka vona ahlawula khume ni vambirhi, avachula vapostola va yena.

¹⁴ Lava vahlawuliweke i Simoni lweyi Yesu amuchuleke vito ra Petrosi, kulandza Andreya makwavu, na Yakobe, na Yohani, na Filipi, na Bartolomewu,

¹⁵ na Matewu, na Tomasi, na Yakobe n'wana Alfewu, na Simoni lweyi angavuliwa Muhiseki,

¹⁶ na Yuda n'wana Yakobe, na Yudasi Iskariyota, lweyi angahundzuka muxengi.

Ta Yesu loko apfuna xitshungu lexikulu

¹⁷ Loko Yesu angirimelile na vona hi le ntshaveni, ayayima rivaleni; kutani kuta vunyingi lebzikulu bzavajondzisiwa va yena, ni xitshungu xikulu xa vanhu lavahumaka hinkwaku Yudeya, ni le Yerusalema, ni le ribuweni ra Tiro na Sidoni,

¹⁸ vatela kutamuyingisa ni kuhanyisiwa hi yena; lavakarhatiwaka hi mimoya ya chaka, na vona aavahanyisa.

¹⁹ Xitshungu hinkwaxu axiringeta kumukhumba, hikuva matimba amahuma ka yena, mavahanyisa hinkwavu.

Ta minkateko ni makhombo

²⁰ Kutani Yesu alanguta vajondzisiwa va yena, aku: Mikatekile n'wina svisiwana, hikuva Mfumu wa Xikwembu wu le ka n'wina.

²¹ Mikatekile n'wina mitwaka ndlala svosvi, hikuva mitaja mixurha. Mikatekile n'wina mirilaka svosvi, hikuva mitahlekelela.

²² “Mikatekile loko vanhu vamivenga, loko vamihlongola ni kumirhuketela, ni loko vasola vito ra n'wina onge hi loko ribihile, hikolaho ka N'wana-wa-Munhu.”

²³ Sikwini rolero tsakani mitsakisisa, hikuva hakelo ya n'wina yitava leyikulu tilweni; nasvona vatatana va vona vayendlisile svosvo ka vaprofeta.

²⁴ “Kambe mi ni khombo n'wina lavafuweke, hikuva se mikumile kuchaveleliwa ka n'wina.

²⁵ Mi ni khombo n'wina mijaka mixurha svosvi, hikuva mitatwa ndlala. mi ni khombo n'wina mihlekaka svosvi, hikuva mitarila mikolola.

²⁶ “Mi ni khombo n'wina loko vanhu hinkwavu vamidzunisa, hikuva vatatana va vona vayendlisile svosvo ka vaprofeta va mavunhwa.”

Ta mfanelo ya kurhandza valala

²⁷ “Kambe ka n'wina lava miniyingisaka nili: Rhandzani valala va n'wina, miyendla lesvinene ka lava vamivengaka.

²⁸ Katekisani lava vamirhuketelaka, mikhongelela lava vamixanisaka.

²⁹ Loko munhu akuyamasa rhama, mukangatelele ni lerin'wana; lweyi akuwutlelaka jansi, ungamuyaleli ni hembe.

³⁰ Nyika mani na mani lweyi akombelaka ka wena; ni loko munhu akutekela sva wena, ungamulondzi.

³¹ Lesvi milavaka lesvaku vanhu vamiyendla svona, vayendleleni svona na n'wina,

³² hikuva loko mirhandza lava vamirhandzaka ntsena, mingalangutela kukhensiwa xana? Vajohi na vona varhandza lava vavarhandzaka.

³³ Kutani loko miyendla lesvinene ntsena ka lava vamiyendlaka lesvinene, mingalangutela kukhensiwa xana? Vajohi na vona vayendlisa svosvo.

³⁴ Ni loko milomba ntsena lavamitshembaka lesvaku mitatlhela misvikuma ka vona, mingalangutela kukhensiwa xana? Vajohi na vona valomba vajohikulobze lesvaku vatatlhela vakuma svofana ka vona.

³⁵ Kambe n'wina, rhandzani valala va n'wina, miyendlela vanhu lesvinene; lombani mingalanguteli kutlheliseliwa, kutani hakelo ya n'wina yitava leyikulu; mitava vana va Lweyi anga henhlahenhla, hikuva yena anitimpsalu ka lavangativiki kukhensa ni ka lavobiha.

³⁶ Miva ni timpsalu kukota lesvi Tatana wa n'wina na yena anga ni musa.

Ta kuyavanyisa van'wana

³⁷ “Mingayavanyisi, kutani amingayavanyisiwi; mingaveki van'wana minandzu, kutani amingavekiwi milandzu; rivalelani, kutani mitarivaleliwa.

³⁸ Nyikani van'wana, na n'wina mitanyikiwa; vataminyika, mpin'wini lowutaleke wutlhela wujinjiwa, wuhlunguhliwa, wuva wuhalakela; hikuva mpimo lowu mipimelaka van'wana ha wona na n'wina, mitapimeliwa ha wona.”

³⁹ Atlhela avabzela xifaniso aku: “Xana axifamahlo xingakota kufambisa xifamahlokulombze ke? Asvingatawela kheleni hi vumbirhi bza svona ke?

⁴⁰ Mujondzisiwa angatluli mujondzisi wa yena; kambe mujondzisiwa mun'wana ni mun'wana lweyi ajondzeke svinene, atava tani hi mujondzisi wa yena.

⁴¹ “Ulangutela yini xilavi lexi xinga tihlweni ra makwenu, na kuve wena unintsandza tihlweni ra wena, lowu ungawu voniki ke?

⁴² Umubzelisa kuyini makwenu uku: ‘Makwerhu, nitshike nisusa xilavi tihlweni ra wena’, kambe awuvoni ntsandza lowu wunga tihlweni ra wena ke? Mukanganyisi! Rhanga ususa ntsandza lowunga tihlweni ra wena; hi kona ungatakota kuvona svinene kususa xilavi lexinga tihlweni ra makwenu.

Ansinya wutiviwa hi mihandzu ya wona

⁴³ “Aku na nsinya lowo nandziha lowuvekaka mihandzu leyobiha, nasvona aku na nsinya lowo biha lowuvekaka mihandzu leyonandziha.

⁴⁴ Kunene nsinya wun'wana ni wun'wana wutiviwa hi mihandzu ya wona. Makuwa mangakala manga khayiwi mintweni, ni xichacha xa mawuvha xingakala xingakhayiwi xihlahleni xa mintwa.

⁴⁵ Munhu lwenene ahumesa lesvinene xumeni lexinene xa mbilu ya yena, ni munhu lweyi wobiha ahumesa lesvobiha xumeni lexobiha xa mbilu ya yena, hikuva nomo wa munhu wuvula lesvi mbilu ya yena yiteleke hi svona.

Tindlela timbirhi ta masungulela ya tiyindlo

⁴⁶ “Xana minivitela yini: ‘Hosi, Hosi’ ke, na mingayendli lesvi nimibzelaka svona?

⁴⁷ Mani na mani lweyi ataka ka mina, ayingisa marito ya mina ni kuhanya ha wona, nitamukomba lweyi afanaka na yena.

⁴⁸ Afana ni munhu lweyi ayakaka yindlo; acelile aya hansi svinene kutani aveka masungulu ribzeni; loko ndhambhi yita, boboma riba yindlo leyi, kambe ritsandzeka kuyitsekatsekisa, hikuva yiyakiwile khwatsi svinene.

⁴⁹ Kambe lweyi atwaka, kutani angayendli, afana ni munhu lweyi ayakeke yindlo henhla ka sava, yingali na masungulu lawa yotiya: Loko boboma riba yindlo leyi, yihantla yiwa, kutani kuwonheka ka yindlo yakona kuva lokukulu.”