Luka 5 - Testamente Leyimpsha Xichangana

Ta ntshevo wohlamalisa

¹ Siku rin'wana Yesu aanyimile ridongeni ra tiva ra Genezareta, xitshungu xili karhi ximukamanyeta, na xinavela kuyingisa Rito ra Xikwembu.

² Kutani avona mabzatso mambirhi lawa makokeliweke ribuweni ra tiva; vaphasi avahumile ka wona, vali karhi vahlampsa tinkoka ta vona.

³ Anghena ka rin'wana ra mabzatso, leri arili ra Simoni, kutani akombela Simoni kuli tshineta kulenyana ni ribuwa, kutani ajondzisa xitshungu, na atshamile bzatswini.

⁴ Loko ahetile kuvulavula, aku ka Simoni: “Tlutelani xiziveni, mipeta tinkoka ta n'wina kona, akuva mitaphasa.”

⁵ Kambe Simoni ahlamula aku: “Mujondzisi, hitirhile vusiku hinkwabzu, hingaphasi nchumu; kambe hi kuvula ka wena, nitapeta tinkoka.”

⁶ Vayendlisa svosvo, kutani vaphasa tihlampfi letotala ngopfu, tinkoka ta vona tilava kuhandzuka.

⁷ Kutani vakoweta vatirhikulobze lava avali bzatswini rin'wana lesvaku vata, vatavapfuna. Vona vata, kutani vatata mabzatso mambirhi wolawo, makondza malava kumbombomela.

⁸ Loko Simoni Petrosi asvivona, akhinsama milengeni ya Yesu, aku ka yena: “Suka ka mina Hosi, hikuva ni mujohi.”

⁹ Yena ni hinkwavu lava avali na yena, vahlamala ngopfu hi kutala ka tihlampfi leti vatiphaseke;

¹⁰ Svivile tano ni ka Yakobe na Yohani, vana va Zebedewu, vatirhikulobze va Simoni. Kutani Yesu aku ka Simoni: “Ungachavi, kusukela svosvi utava lweyi aphasaka vanhu.”

¹¹ Kuteloko vavuyiselile mabzatso ribuweni, vasiya hinkwasvu vamulandza.

Ta kuhanyisiwa ka munhu wa nhlokonho

¹² Na ahali muntini wun'wana, kuta wanuna lweyi ataleke hi nhlokonho; kutani loko avona Yesu, atiwisa hansi hi mombo, amukhongela, aku: “Hosi, loko usvirhandza, unganibasisa.”

¹³ Kutani Yesu atshambuluta voko, amukhumba aku: “Nasvirhandza, nakubasisa!” Hi nomo-lo nhlokonho yisuka ka yena

¹⁴ Kutani Yesu amubzela aku: “Ungatshuki ubzela munhu svilo lesvi, kambe famba, uyatikomba ka Muprista, uhumesa sva kubasisiwa ka wena, hilaha Moxe aleriseke hakona; svitava vumboni ka vona.”

¹⁵ Kutani lesvi asvivuliwa mayelanu na yena, asvihangalaka, ni ndhuma ya Yesu yitwakala ngopfu; xitshungu lexikulu xitatamuyingisa, ni kuhanyisiwa hi yena.

¹⁶ Kambe aapfa asuka, ayakhongela ali yexe.

Ta Yesu loko ahanyisa munhu wa kukhwanyala svirho

¹⁷ Siku rin'wana, Yesu aali kujondziseni. Vafarisi ni vajondzisi va Nawu lavahumeke svidoropanini hinkwasvu sva Galileya, ni sva Yudeya, ni le Yerusalema, avatshamile kolaho, kutani matimba ya Hosi amali na yena ya kuhanyisa timbabzi.

¹⁸ Hi loko kuta vavanuna lavarhwaleke munhu wa kukhwanyala svirho, ayetlele arihlakeni; varingeta kumunghenisa ndlwini ni kumuveka mahlweni ka Yesu.

¹⁹ Loko vangakumi lomu vangamunghenisaka hi kona, hikolaho ka xitshungu, vakhwela henhla ka yindlo, vahahlula xihlungwe, vamuyehlisa xikarhi ka vanhu ali rihlakeni, avekiwa mahlweni ka Yesu.

²⁰ Loko Yesu avona kupfumela ka vona, aku: “Nakulorhi, urivaleliwile svijoho sva wena!”

²¹ Kutani Vatsali ni Vafarisi vasungula kuvilela timbilwini ta vona, vaku: “Munhu lweyi asandza Xikwembu! Angava mani ke? Xana i mani lweyi angarivalelaka munhu svijoho, loko xingali Xikwembu ntsena ke?”

²² Kambe loko Yesu ativile kuvilela ka vona, avahlamula aku: “Xana mivilela hikolaho ka yini timbilwini ta n'wina.

²³ Xana Kuvevuka yini? Kuvula lesvaku: ‘Urivaleliwile svijoho sva wena’, kumbe kuvula lesvaku: ‘Pfuka ufamba’ xana?

²⁴ Svosvi mitativa lesvaku N'wana-wa-Munhu a ni matimba misaveni ya kurivalela vanhu svijoho.” Hi loko aku ka lweyi wa kukhwanyala svirho: “Nili ka wena: Pfuka uteka rihlaka ra wena umuka.”

²⁵ Hi nomo-lo okakatsuku, mahlweni ka vona, ateka rihlaka leri aayetlele ka rona, atimukela na ali karhi adzunisa Xikwembu.

²⁶ Kutani hinkwavu vahlamala, vadzunisa Xikwembu, vatala hi kuchava vaku: “Namuntlha hi vonile svihlamaliso.”

Ta Yesu loko avitana Levhi

²⁷ Ndzhaku ka timhaka leto, Yesu ahuma, kutani avona muhakelisi wa rhesa lweyi avaku i Levhi, na atshamile ndlwini ya vurheselo. Aku ka yena: “Nilandze.”

²⁸ Hi loko yena asuka ayima, atshika hinkwasvu amulandza.

²⁹ Ndzaku ka svona Levhi ayendlela Yesu nkhuvu lowukulu kaya ka yena. Akuli ni xitshungu lexotala xa varhesisi ni xa vanhu van'wana lavatshameke kujeni na vona.

³⁰ Vafarisi ni Vatsali va ntlawa wa vona, vasola vaku ka vajondzisiwa va yena: “Xana mijela yini ni vahakelisi va rhesa ni vajohi, minwela yini na vona ke?”

³¹ Yesu avahlamula aku: “Lavatsakeke mirini avalavi n'anga, kambe yilaviwa hi lavavabzaka.

³² Anitanga kutavitana lavalulameke, kambe kutavita vajohi, lesvaku vatisola. ”

Xivutiso hi tlhelo ra kutitsona svakuja

³³ Kutani vaku ka yena: “Vajondzisiwa va Yohani vatolovela kutitsona svakuja, vayendla ni svikhongelo; vajondzisiwa va Vafarisi na vona vayendlisa svosvo; kasi lava va wena, vaja vatlhela vanwa!”

³⁴ Yesu aku ka vona: “Xana mingasindzisa varhambiwa vamuteki kutitsona svakuja, loko muteki ahalinavona ke?

³⁵ Masiku mata lawa muteki angatasusiwa ka vona; hi kona vangatatitsona svakuja, masikwini wolawo!”

³⁶ Atlhela avabzela xifaniso aku: “Aku na munhu lweyi ahandzulaka xipandzwa ka banci lerimpsha, kuxiyendla xiziva, axirhungelela ka lera khale, hikuva loko ayendlisa svosvo, atava ahandzulile abanci lerimpsha, kutani xiziva leximpsha axingayelani ni banci ra khale.

³⁷ Aku na munhu lweyi achelaka vhinyu lerimpsha atindongeni ta khale; hikuva loko ayendlisa svosvo, vhinyu lerimpsha ritahandzula tindonga rihalaka, tindonga na tona titava tiwonhakile.

³⁸ Kambe vhinyu lerimpsha richeliwa tindongeni letimpsha.

³⁹ Nasvona aku na munhu lweyi anavelaka vhinyu lerimpsha loko anwile lera khale, hikuva ataku: ‘Kunandziha lera khale.’”