Luka 4 - Testamente Leyimpsha Xichangana

Ta kuringiwa ka Yesu

¹ Yesu asuka Yordani, atale Moya Lowokwetsima, kutani Moya wumuyisa mananga.

² Kutani aringiwa hi Diyavulosi hi masiku ya mune wa makume, angaji nchumu hi masiku wolawo; kuteloko mahelile, atwa ndlala.

³ Hi loko Diyavulosi aku ka yena: “Loko uli N'wana wa Xikwembu, bzela ribze leri lesvaku rihundzuka svakuja.”

⁴ Yesu amuhlamula aku: Kutsaliwile lesvi: “‘Munhu angakala angahanyi hi svakuja ntsena.’”

⁵ Kutani Diyavulosi aya na yena henhla ka ntshava leyoleha, amukomba hi nkamayana wutsongo mimfumu hinkwayu ya misava; kutani aku ka yena:

⁶ “Nitakunyika vuhosi lebzi hinkwabzu ni kudzuneka ka bzona, hikuva ninyikiwile svona, kutani ninyika munhu hi kurhandza ka mina.

⁷ Kutani loko wena unikhinsamela, hinkwasvu lesvi svitava sva wena.”

⁸ Yesu amuhlamula, aku: Kutsaliwile lesvi: “‘Utakhinsamela Hosi, Xikwembu xa wena, ugandzela xona ntsena.’”

⁹ Kutani Diyavulosi amuyisa Yerusalema amuveka xihlungweni xa Tempele, kutani aku ka yena: Loko uli N'wana wa Xikwembu, tihoxe hansi,

¹⁰ hikuva kutsaliwile lesvi: “‘Xikwembu xitarhuma tintsumi ta xona kukuhlayisa.’”

¹¹ Nasvona vate: “‘Titakuqhamukela mavokweni ya tona, lesvaku nenge wa wena ungatshuki uvavisiwa hi ribze.’”

¹² Yesu amuhlamula, aku: Kuvuliwile lesvi: “‘Ungatshuki uringa Hosi, Xikwembu xa wena.’”

¹³ Loko Diyavulosi ahetile kuringa Yesu hi matlhelo hinkwawu, amutshika, anyimela kukuma nkarhi wun'wana lowunene.

Ta Yesu loko asungula ntirho wa yena Galileya

¹⁴ Yesu atlhelela Galileya hi matimba ya Moya; kutani ndhuma ya yena yihangalaka matlhelweni hinkwawu ya tiko.

¹⁵ Kutani ajondzisa masinagogeni ya vona, ali karhi adzunisiwa hi vanhu hinkwavu.

Ta Yesu loko angayamukeliwi Nazareta

¹⁶ Aya ni le Nazareta, laha angakulela kona; kutani hi siku ra Savata tani hi ntolovelo wa yena anghena sinagogeni, kutani asuka ayima kuva ajondza buku.

¹⁷ Kutani anyikiwa buku ya muprofeta Ezaya; loko ayipfulile, akuma laha kungatsaliwa marito lawa mange:

¹⁸ “Moya wa Hosi wu le henhla ka mina, hikuva yinitotile hi mafurha, yiva yinirhuma kuyabzela svisiwana Evhangeli; kuyativisa lavabohiweke lesvaku vatatshunxiwa, ni svifamahlo lesvaku svitavona; yinirhumile kutshunxa lava vaxanisiwaka,

¹⁹ ni kutwalisa lembe lerinene ra Hosi.”

²⁰ Kuteloko apfalile buku, ayinyika mupfuni, atshamisa hansi; kutani hinkwavu lava avali sinagogeni vamulangutisisa.

²¹ Hi loko asungula kuvajondzisa, aku: “Namuntlha rito leri miritweke, rihetisekile.”

²² Kutani hinkwavu vavula vumboni ha yena, na vali karhi vahlamala marito lawa yosaseka lamahumaka non'weni wa yena, vaku: “Xana munhu lweyi ahi yena n'wana Yosefa ke?”

²³ Kutani aku ka vona: “Natshemba lesvaku mitanibzela xihlayahlaya lexingo: ‘N'anga, tihanyise hi wexe!’ Nasvona mitaku: ‘Lesvi hisvitweke sviyendliwa hi wena Kapernawume, sviyendle nikola tikweni ra wena!’”

²⁴ Yesu atlhela aku: “Namibzela lesvaku aku na muprofeta lweyi ayamukeliwaka tikweni ra yena.

²⁵ Nimibzela ntiyiso nili: Vavasati lavotala va vafelakazi avali kona tikweni ra Israyele minkarhini ya Eliya, loko tilo ripfaliwa hi malembe manharhu ni tihweti ta ntlhanu ni yin'we, kutani ndlala leyikulu yiva kona tikweni hinkwaru;

²⁶ kambe Eliya angarhumiwanga ni le ka mun'we wa vona; arhumiwile ntsena ka wansati wa mufelakazi wa le Sarepta wa le Sidoni.

²⁷ Nasvona, akuli ni va nhlokonho lavotala tikweni ra Israyele minkarhini ya muprofeta Elixa, kambe akuvanga ni mun'we wa vona lweyi angabasisiwa, loko angali Namani wa le Siriya.”

²⁸ Kutani hinkwavu lava avali sinagogeni vakwata svinene loko vatwa timhaka leto.

²⁹ Vapfuka vayima, vamuhlongola ahuma handle ka doropa, vamuyisa henhla ka ntshava leyi doropa ra vona ariyakiwe ka yona, kuyamususumetela hansi.

³⁰ Kambe yena ahundza hi le xikarhi ka vona, atifambela.

Ta munhu lweyi angheniweke hi moya wa chaka

³¹ Kutani Yesu angirimela aya Kapernawume, ringa doropa ra Galileya, kutani hi siku ra Savata asungula kujondzisa vanhu.

³² Hi loko vona vahlamala hi kujondzisa ka yena, hikuva marito ya yena amali ya lweyi anga ni vuhosi.

³³ Asinagogeni, akuli ni munhu lweyi aali ni moya wa chaka, wa dimoni; wona wuhuwelela hi rito lerikulu,

³⁴ wuku: “Ha! Mhaka ya hina na wena hi yihi ke, wena Yesu wa Nazareta? Xana utele kutahilovisa ke? Nasvitiva lesvaku u mani! U Lweyi Wohlawuleka wa Xikwembu.”

³⁵ Kambe Yesu awutshinya, aku: “Miyela! Huma ka munhu yelweyi!” Hi loko dimoni riwisa munhu lwiya xikarhi ka xitshungu, rihuma ka yena, kambe ringamuvavisanga.

³⁶ Kutani hinkwavu vahlamala, vavutisana vaku: “Rito ra munhu lweyi hi leri ra kuyini, lesvi alerisaka mimoya ya chaka hi vuhosi ni matimba, kutani yihuma ke?”

³⁷ Kutani ndhuma ya yena yihangalaka matlhelo hinkwawu ya tiko lero.

Ta Yesu loko ahanyisa mamana wa nkata Simoni Petrosi

³⁸ Kutani Yesu ahuma sinagogeni, anghena kaya ka Simoni; kambe mamana wa nkata Simoni aakhomiwile hi kuhiseta ka miri, kutani vamukombelela ka Yesu.

³⁹ Hi loko Yesu ayima kusuhi na yena, atshinya kuhiseta ka miri, kutani kusuka; hi loko wansati ahantla apfuka, avatirhela.

Ta Yesu loko ahanyisa lavotala nimajambu

⁴⁰ Loko jambu ripelile, hinkwavu lava avali ni vanhu lavakarhatiwaka hi mavabzi ya tinxakaxaka, vavatisa ka Yesu, kutani atlhanteka mavoko henhla ka mun'wana ni mun'wana wa vona, avahanyisa.

⁴¹ Na wona madimoni mahuma ka lava votala, mahuwelela maku: “Wena u N'wana wa Xikwembu.” Kambe Yesu amatshinya, angama pfumeleli kuvulavula, hikuva amativa lesvaku hi yena Kriste.

Ta Yesu loko ahuma ayajondzisa

⁴² Loko bzixile, ahuma aya mananga, kutani vanhu lavotala vamulava, vakondza vayamukuma, kutani varingeta kumusiveletela lesvaku angahambani na vona.

⁴³ Kambe yena aku ka vona: “Nifanela kuya madoropeni man'wana, lesvaku nakona niyapaluxa Evhangeli ya Mfumu wa Xikwembu, hikuva hi lesvi nirhumeliweke svona.”

⁴⁴ Kutani ayajondzisa masinagogeni ya Galileya.