Luka 3 - Testamente Leyimpsha Xichangana

Ta kujondzisa ka Yohani Mukhuvuli

¹ Hi lembe ra khume na ntlhanu ra kufuma ka Tiberiyo Khezari, Pontiyo Pilato aafuma Yudeya; Heroda yena aali mun'we ka tihosi leta mune ta Galileya; Filipi makwavu aali mun'wana ka tihosi leto, aafuma Ituriya ni tiko ra Trakonita; Lisaniya yena afuma Abilene;

² Anasi na Kayafasi avali Vaprista lavakulu; nkarhini wolowo, rito ra Xikwembu rifika ka Yohani n'wana Zakariya, mananga.

³ Kutani asuka, ayarhendzeleka tiko hinkwaru leringa kusuhi na Yordani, ali karhi ajondzisa vanhu ta kuhundzuka vakhuvuliwa, lesvaku Xikwembu xivarivalela svijoho sva vona.

⁴ Hi svona lesvingatsaliwa bukwini ya muprofeta Ezaya, loko ate: “Rito ra munhu lweyi ahuwelelaka mananga, rili: ‘Lungiselani ndlela ya Hosi, milulamisa asvindlelana sva yona.

⁵ Minkova hinkwayu yitaseleteliwa, tintshava ni svitsunga hinkwasvu svitahirimuxiwa; lesvigombonyokeke svitalulamisiwa, ni tindlela letinga ni minkova ni maganga titakhuleliwa,

⁶ kutani vanhu hinkwavu va nyama vatavona kuponisa ka Xikwembu.’”

⁷ Kutani Yohani abzela xitshungu lexitaka kutakhuvuliwa hi yena, aku: “Rixaka ra tinyoka, i mani lweyi angamitsundzuxa kubaleka vukarhi lebzitaka xana?

⁸ Vekani mihandzu leyifambelanaka ni kuhundzuka ka n'wina! Mingayanakanyeni miku, hi na Abrahamu, yena tatana wa n'wina, hikuva nili ka n'wina: Xikwembu xingayendlela Abrahamu vana hi maribze lawa.

⁹ Ni svosvi xihloka xivekiwile timintsweni ta nsinya; nsinya wun'wana ni wun'wana lowungavekiki mihandzu leyinene, wutatsemiwa wuhoxiwa ndzilweni.”

¹⁰ Kutani xitshungu ximuvutisa xiku: “Loko svilitano, hitayendla yini ke?”

¹¹ Ahlamula aku ka xona: “Lweyi anga ni mabanci mambirhi, aapambulele lweyi apfumalaka; ni lweyi anga ni svakuja, aayendlise svosvo na yena.”

¹² Vahakelisi va rhesa na vona vata kukhuvuliweni, vaku ka yena: “Mujondzisi, hitayendla yini xana?”

¹³ Aku ka vona: “Mingahakeliseni vanhu kutlula lesvi milerisiweke svona.”

¹⁴ Masochwa na wona mamuvutisa maku: “Hina ke, hitayendla yini?” Aku ka vona: “Mingaphangeni svilo sva vanhu, mingavatekeleni svona hi kukanganyisa, kambe mitsaka hi hakelo ya n'wina.”

¹⁵ Vanhu avatshama na valangutela, kutani hinkwavu avayehleketa timbilwini ta vona lesvaku kumbexana Yohani angava yena Mesiya.

¹⁶ Yohani avahlamula hinkwavu, aku: “Loko nili mina, nimikhuvula hi mati, kambe wata lweyi anitlulaka hi matimba, lweyi svinganifaneliki kutlhantlha tingoti ta masandhazi ya yena; yena atamikhuvula hi Moya Lowokwetsima ni ndzilo.

¹⁷ Foxola ri le vokweni ra yena, lesvaku atabasisa svinene lesvinga xibulelweni xa yena: Kutani trigu atarichela tshaleni; kambe muhungu wona, atawuhisa ndzilweni lowungatimekiki.”

¹⁸ Kutani atshama avakhongotela hi timhaka tin'wana letotala, ali karhi atwalisa Evhangeli ka vanhu.

¹⁹ Kambe hosi Heroda, mun'we ka tihosi leti ta mune, aatekile Herodiya, nsati wa makwavu Filipi, ayendla ni svin'wana lesvotala svobiha. Kutani Yohani aamutshinya timhakeni leti hinkwatu.

²⁰ Kutani Heroda ayengetela vubihi bzakwe hi kupfalela Yohani jele.

Ta kukhuvuliwa ka Yesu

²¹ Loko vanhu hinkwavu vakhuvuliwa, ni loko Yesu na yena akhuvuliwile, matilo mapfuleka ali karhi akhongela;

²² Moya Lowokwetsima wuxikela henhla ka yena, wuli ni xivumbeko lexifanaka ni xituvana; kutani rito rihuma tilweni riku: “U N'wananga lweyi arhandzekaka, lweyi ni mutsakelaka svinene.”

Ta rixaka ra Yesu

²³ Yesu aalikusuhi ni malembe ya makume manharhu loko asungula ntirho wa yena; kutani hi kuyehleketa ka vanhu, aali n'wana Yosefa, n'wana Heli,

²⁴ wa Matati, wa Levhi, wa Meleki, wa Yanayi, wa Yosefa,

²⁵ wa Matatiya, wa Amosi, wa Nahume, wa Esli, wa Nagayi,

²⁶ wa Mate, wa Matatiya, wa Semeyini, wa Yoseke, wa Yoda,

²⁷ wa Yohani, wa Resa, wa Zerubabele, wa Salatiyele, wa Neri,

²⁸ wa Melki, wa Adi, wa Kosama, wa Elmadema, wa Ere,

²⁹ wa Yoxuwa, wa Eliyazari, wa Yorimi, wa Matati, wa Levhi,

³⁰ wa Simiyoni, wa Yuda, wa Yosefa, wa Yonama, wa Eliyakimi,

³¹ wa Meleya, wa Mena, wa Matati, wa Natani, wa Davhida,

³² wa Yese, wa Obede, wa Bowazi, wa Sala, wa Nasoni,

³³ wa Aminadaba, wa Admini, wa Arni, wa Esromo, wa Farezi, wa Yuda,

³⁴ wa Yakobe, wa Izaki, wa Abrahamu, wa Tera, wa Nakori,

³⁵ wa Serugi, wa Ragawu, wa Faleke, wa Ebere, wa Sala,

³⁶ wa Kayinama, wa Arifakisada, wa Seme, wa Nowa, wa Lameke,

³⁷ wa Metuxela, wa Enoke, wa Yarete, wa Maleleyeli, wa Kayinama,

³⁸ wa Enosi, wa Seti, wa Adamu, wa Xikwembu.