Luka 24 - Testamente Leyimpsha Xichangana

Ta kupfuka ka Yesu kufeni

¹ Hi siku ra Sonto na jambu ringasihuma, vavasati vaya sirheni, na vatamelile mafurha yonun'hwela lawa vamalungiseke.

² Vakuma ribze na rivumbuluxiwile kule ni sirha.

³ Kambe loko vanghena, avakumanga ntsumbu wa Hosi Yesu.

⁴ Vaku na vaha hlamala ha svona, vavanuna vambirhi vatshuka vahumelela ka vona, na vali ni sviyambalu sva kuvangama.

⁵ Loko vavasati vahali kuchaveni lokukulu ni kulanguta hansi hikolaho ka gome, vavanuna vaku ka vona: “Milavela yini lweyi ahanyaka xikarhi ka vafi xana?

⁶ Angakona laha, yena apfukile kufeni. Tsundzukani hilaha angavulavula na n'wina hakona, loko ahali Galileya,

⁷ loko aku: ‘N'wana-wa-Munhu afanela kunyiketiwa mavokweni ya vajohi, avambiwa, kutani atapfuka hi siku ra vunharhu.’”

⁸ Vatsundzuka marito ya yena,

⁹ kutani vasuka sirheni, vayarungula timhaka leti hinkwatu ka lava va khume na mun'we ni ka van'wana hinkwavu.

¹⁰ Vavasati lava, aali Mariya wa Magadala, na Jowana, na Mariya mamana wa Yakobe; ni van'wana lava avali na vona, vatiyisa ka vapostola timhaka leti.

¹¹ Kambe marito lawa avamateka tani hi norho, vangamapfumeli. [

¹² Loko ali yena Petrosi asuka, atsutsumela sirheni; kuteloko akorhamile ahlomela, avona malansoro ntsena, kutani atlhelela kaya, na ali karhi ahlamala hi lesvihumeleleke.]

Ta vayendzi va Emawusi

¹³ Hi siku lero, vambirhi va vona, avaya xidoropanini lexivuliwaka Emawusi; vukule bza xona na Yerusalema, abziringana mpfhuka wa khume ra makilometru.

¹⁴ Avavulavula svin'we hi timhaka hinkwatu letihumeleleke.

¹⁵ Vaku vaha vulavula ha tona vavutisana, Yesu hi xiviri avatshinelela, alongoloka na vona.

¹⁶ Kambe mahlo ya vona amasiveliwile lesvaku vangamutivi.

¹⁷ Kutani aku ka vona: “Hitihi timhaka leti mivulavulaka ha tona ndleleni ke?” Hi loko vona vayima na vali ni gome.

¹⁸ Mun'we lweyi avaku i Kleyopasi, ahlamula, aku: “Xikarhi ka lavayendzeleke Yerusalema, xana hi wena uliwexe lweyi angativiki timhaka letihumeleleke kona hi masiku lawa ke?”

¹⁹ Aku ka vona: “Hi tihi xana?” Vaku ka yena: “Ta Yesu wa Nazareta, lweyi aali muprofeta wa matimba mintirhweni ni le kuvulavuleni, mahlweni ka Xikwembu ni le mahlweni ka vanhu hinkwavu.

²⁰ Vaprista lavakulu ni vakulukumba va hina vamunyiketile lesvaku ayavanyiseliwa rifu, kutani vamuvambile.

²¹ Loko ali hina, ahitshembile lesvaku hi yena lweyi angataponisa Israyele; hambi svilitano, namuntlha i siku ra vunharhu na timhaka leti tihumelelile.

²² Kunene vavasati van'wana va ka hina vahihlamalisile ngopfu; vayile sirheni ni mpundzu svinene,

²³ kutani avawukumanga ntsumbu wa yena; vavuyile, vavula lesvaku vavonile mahlori ya tintsumi letingate: ‘Wahanya.’

²⁴ Van'wana va ka hina vayile sirheni, vakumile svilitano, hilaha vavasati vavuleke hakona; kambe yena, avamuvonanga.”

²⁵ Kutani aku ka vona: “Yo! Vanhu lavangatwisisiki, va timbilu letihlwelaka kukholwa hinkwasvu lesvivuliweke hi vaprofeta!

²⁶ Xana asvingafaneli lesvaku Kriste atwisiwa kuvaviseka koloko, atlhela anghena kukwetsimeni ka yena ke?”

²⁷ Kutani avahlamusela hilaha timhaka ta yena tingavuliwa Matsalweni hinkwawu hakona, kusungula hi Moxe kufika ka vaprofeta hinkwavu.

²⁸ Loko vafika kusuhi ni xidoropana lexi vayaka ka xona, yena ayendla ingi ahundzela mahlweni.

²⁹ Kutani vamusindzisa vaku: “Tshama na hina, hikuva riyakupeleni, ni vusiku bzatshinela.” Kutani anghena, ayatshama na vona.

³⁰ Kuteloko vali kujeni, ateka xinkwa, akhensa, kutani akhema, avanyika.

³¹ Hi loko matihlo ya vona mapfuleka, kutani vamutiva; kambe yena avasiya anyamalala.

³² Kutani vabzelana, vaku: “Xana atingapfurhi timbilu ndzeni ka hina, loko ali karhi avulavula na hina ndleleni, na ahipfuletela Matsalwa?”

³³ Kutani hi nkarhi wolowo vasuka, vatlhelela Yerusalema vayakuma lava va khume na mun'we, na vahlengeletanile svin'we nivan'wana,

³⁴ na vali karhi varungulelana vaku: “Hakunene Hosi yipfukile kufeni, nasvona yitikombile ka Simoni.”

³⁵ Kutani na vona va Emawusi varungula lesvi svingavahumelela ndleleni, ni hilaha vamutiveke hakona, kukhemeni ka xinkwa.

Ta Yesu loko atikomba ka vapostola

³⁶ Vaku na vaha vulavula, Yesu ayima xikarhi ka vona, yena hi xiviri, kutani aku ka vona: “Kurhula akuve na n'wina!”

³⁷ Vakhomiwa hi kuchava lokukulu, vapimisa lesvaku va vona xipoko.

³⁸ Aku ka vona: “Xana michavisiwa ha yini, hikolaho ka yini mili ni kukanakana timbilwini ta n'wina ke?

³⁹ Vonani sviyandla sva mina ni minkondzo ya mina! Hi mina hi xiviri. Nikhomeni, nitseveteleni. Xipoko axi na nyama ni marhambu, kasi mina ni na svona, hilaha misvivonaka hakona.” [

⁴⁰ Loko avulile svosvo, atlhela avakomba sviyandla sva yena ni minkondzo ya yena.]

⁴¹ Kutani lesvi kutsakeni ni kuhlamaleni ka vona avahakanakana, aku ka vona: “Xana mi ni svakuja kola ke?”

⁴² Vona vamunyika hamfu ya hlampfi ya kuwoxiwa;

⁴³ ayiyamukela, aja mahlweni ka vona.

⁴⁴ Kutani aku ka vona: “Hi tona timhaka leti ningamitivisa tona, loko nahali na n'wina, loko nite: ‘Hinkwasvu lesvitsaliweke mayelanu na mina Nawini wa Moxe ni ka Vaprofeta, ni ka Tipisalma, svifanela kuhetiseka.’”

⁴⁵ Hi loko avapfula miyehleketo lesvaku vatwisisa Matsalwa.

⁴⁶ Kutani aku ka vona: “Matsalwa mali: ‘Mesiya atatwisiwa kuvaviseka, atlhela apfuka kufeni hi siku ra vunharhu.

⁴⁷ Kutani, hi vito ra yena, timhaka ta kuhundzuka ni ta kurivaleliwa svijoho titapaluxiwa matikweni hinkwawu, kusungula hilaha Yerusalema.’

⁴⁸ N'wina mitimboni ta timhaka leti.

⁴⁹ Loko ali mina, nitamirhumela lesvi Tatana wa mina amitshembiseke svona. Kambe n'wina tshamani kola doropeni, mikondza mifunengetiwa hi matimba ya le henhla.”

Ta kutlhantuka ka Yesu

⁵⁰ Kutani avateka vaya handle ka doropa, ayafika na vona kusuhi na Betaniya, kutani atlakusa mavoko, avakatekisa.

⁵¹ Loko ali karhi avakatekisa, ahambana na vona [atlakuliwa, aya tilweni].

⁵² Kutani vona [loko vamukhinsamelile], vatlhelela Yerusalema na vali ni kutsaka lokukulu.

⁵³ Kutani avali Tempeleni masiku hinkwawu, na vali karhi vadzunisa Xikwembu.