Luka 23 - Testamente Leyimpsha Xichangana

Ta Yesu mahlweni ka Pilato

¹ Kutani vasuka vayima hinkwavu, vayisa Yesu ka Pilato,

² vasungula kumulumbeta, vaku: “Hikumile munhu lweyi na ali karhi ahlohlotela tiko ra hina, ayalisa vanhu kuhumesela Khezari rhesa; nasvona ativula Kriste, Hosi.”

³ Hi loko Pilato amuvutisa, aku: “Hi wena hosi ya Vayuda ke?” Yesu amuhlamula, aku: “Lweyi avulaka svosvo hi wena!”

⁴ Hi loko Pilato aku ka Vaprista lavakulu ni ka xitshungu: “Anikumi nandzu ka munhu lweyi.”

⁵ Kambe vasindzisa, vaku: “Apfilunganyisa tiko hi kujondzisa hinkwaku Yudeya; asungule Galileya, svosvi se atile halenu.”

Ta Yesu mahlweni ka Heroda

⁶ Loko Pilato asvitwa, avavutisa aku: “Xana munhu lweyi i Mugalileya ke?”

⁷ Loko atwile lesvaku i munhu wa tiko lerifumiwaka hi Heroda, amurhumela ka Heroda, lweyi na yena aali Yerusalema hi masiku wolawo.

⁸ Kuteloko Heroda avona Yesu, atsaka ngopfu, hikuva akuli khale na anavelile kumuvona, hikolaho ka lesvi aasvitwile mayelanu na yena, kutani aatshemba lesvaku atamuvona na ayendla mahlori.

⁹ Amuvutisa timhaka totala, kambe Yesu angahlamulanga nchumu.

¹⁰ Vaprista lavakulu ni Vatsali avayimile kolaho, vamulumbeta hi matimba svinene.

¹¹ Hi loko Heroda ni masochwa ya yena vamusandza, ni kumutseketsela; kutani vamuyambexa nguvu, kumbe jansi rokala mavoko leri riyambaliwaka henhla ka yovangama, vamutlhelisela ka Pilato.

¹² Hi siku rolero Heroda na Pilato vahundzukile vanghanu, kasi khale avavengana.

Ta Yesu loko ayavanyiseliwa rifu

¹³ Kuteloko Pilato ahlengeletile Vaprista lavakulu, ni vakulukumba, ni vanhu va tiko,

¹⁴ aku ka vona: “Mitisile munhu lweyi ka mina, miku: ‘Ahambukisa tiko.’ Svosvi-ke nikambile mhaka mahlweni ka n'wina kambe anikumanga nandzu ka yena, hambi wuli wun'we ntsena wa lesvi mimulumbetaka ha svona.

¹⁵ Svivile tano ni ka Heroda, hikuva amutlhelisele ka hina; svatikomba lesvaku angayendlanga xilo ni xin'we lexi angadlawelaka xona.

¹⁶ Hikolaho, nitalerisa lesvaku abiwa, kutani nitamutshunxa.” [

¹⁷ Pilato aafanela kuvatshunxela mubohiwa hi siku ra nkhuvu wa Paska.]

¹⁸ Kambe hinkwavu vakanyuluka hi rito rin'we, vaku: “Mususi lweyi, uhitshunxela Barabasi!”

¹⁹ (Barabasi aanghenisiwile jele, hikuva aapfuxile dzolonga doropeni, ava adlaya ni munhu.)

²⁰ Pilato atlhela avulavula na vona, hi kulava kutshunxa Yesu.

²¹ Kambe vatlhela vakanyuluka, vaku: “Muvambe! Muvambe!”

²² Avavutisa khambi ra vunharhu aku: “I xijoho muni lexi axiyendleke xana? Anivoni nandzu lowu afanelaka kufa ha wona; hi kolaho nitalerisa lesvaku abiwa, kutani nitamutshunxa.”

²³ Kambe vahuwelela hi marito lawa yotlakuka, vakombela lesvaku avambiwa; kutani kuhuwelela ka vona kuyingisiwa.

²⁴ Pilato atsema mhaka, aku: “Akuyendliwe hilaha mikombelaka hakona!”

²⁵ Kutani avatshunxela lweyi vamukombeleke, lweyi aapfaleliwile hikolaho ka dzolonga ni kudlaya munhu; loko ali Yesu, Pilato amunyiketa ka vona, lesvaku vamuyendla lesvi vasvirhandzaka.

Ta kuvambiwa ka Yesu

²⁶ Loko vali karhi vafamba na yena, vakhoma mun'we lweyi avaku i Simoni, wa Kirene, lweyi aavuya hi le masin'wini; vamurhwexa xihambanu xa Yesu, kutani Simoni alandza Yesu hi le ndzhaku.

²⁷ Naxona xitshungu lexikulu ni vavasati lava votala avalandza Yesu, na vali karhi vaba nkosi, vamurila.

²⁸ Yesu ahundzukula aku ka vona: “Vavasati va Yerusalema, minganirileleni; kambe tirileleni, n'wina ni vana va n'wina.

²⁹ Hikuva vonani masiku mata, lawa vangataku ‘Kukatekile lava vangavelekiki, ni makhwiri lawa mangavelekangiki ni lava vanganyan'wisangiki.’

³⁰ “Nkarhini wolowo vataku ka tintshava: ‘Wanani henhla ka hina!’ Ni ka svitsunga: ‘Hifunengeteni!’

³¹ Hikuva loko vayendlise lesvi ka rihunyi lerotsakama, kutayendliwa yini ka leri riwomeke xana?”

³² Nasvona avayisa ni vavanuna van'wana vambirhi, kuyadlawa na yena; vona avali svigevenga.

³³ Loko vafikile ndhawini leyi vange i “ya Pala”, vamuvamba kona, vavamba ni xigevenga xin'we tlhelweni ra yena ra xinene, xin'wana ka leri ra ximantsi.

³⁴ [Kutani Yesu aku: “Tatana, varivalele, hikuva avasvitivi lesvi vasviyendlaka.”] Kutani vayavelana sviyambalu sva yena hi kuhlahluva.

³⁵ Vanhu avayimile kolaho, na vali karhi valanguta; na vona vakulukumba avamuvungunya, vaku: “Munhu lweyi aponisile van'wana; aatiponise, loko ali Mesiya, Muhlawuliwa wa Xikwembu!”

³⁶ Na wona masochwa amamutseketsela, matshinela kusuhi, mamunyika ntsuvi,

³⁷ maku ka yena: “Loko uli Hosi ya Vayuda, tiponise!”

³⁸ Akuli ni papela henhla ka yena, leringe: “Lweyi i Hosi ya Vayuda.”

³⁹ Xin'we xa svigevenga lexihayekiweke kolaho aximurhuketela, xiku: “Xana ahi wena Kriste ke? Tiponise, na hina uhiponisa!”

⁴⁰ Kambe lexin'wana ximukawuka, xiku: “Xana awuchavi Xikwembu, lesvi ungayavanyisiwa kufana na yena ke?

⁴¹ Loko ali hina, svihifanelile, hikuva hiyamukela lesvifambelanaka ni mintirho ya hina; kambe lweyi, angayendlanga nchumu xobiha.”

⁴² Xigevenga xitlhela xiku: “Yesu, nitsundzuke, loko ufika Mfun'wini wa wena.”

⁴³ Yesu aku ka xona: “Nitiyisile nili ka wena: Namuntlha utava na mina Paradiseni.”

Takufa ka Yesu

⁴⁴ Hi nkarhi lowulavaka kuva wa vuntlhanu na wun'we, munyama wufunengeta tiko hinkwaru, kufika nkarhini wa vuntlhanu ni mune.

⁴⁵ Jambu riyendla ra ntima, ninguvu ya xisirhelo xa Tempele yipandzeka hi le xikarhi.

⁴⁶ Kutani Yesu ahuwelela hi rito leritlakukeke, aku: “Tatana, ninyiketa moya wa mina mavokweni ya wena.” Loko avulile svosvo, anhlala afa.

⁴⁷ Loko ndhuna ya dzana ra masochwa yivonile lesvihumeleleke, yidzunisa Xikwembu, yiku: “Hakunene munhu lweyi aalulamile.”

⁴⁸ Vanhu lavotala avahlengeletanile vatahlalela. Loko vavonile lesvihumeleleke, vahangalaka vatlhelela makaya na vali karhi vatiba svifuva hi kuvaviseka lokukulu.

⁴⁹ Hinkwavu lavativaneke na Yesu, ni vavasati lavamulandzeke loko ahuma Galileya, avayimile kule, na vali karhi vavona svilo svosvo.

Ta kulahliwa ka Yesu

⁵⁰ Akuli ni wanuna wokarhi lweyi avuliwaka Yosefa, xirho xa huvu ya Vayuda, aali munhu lwenene wolulama,

⁵¹ lweyi aangapfumelanga akungu ra vona ni mintirho ya vona. Aali xipsaliwa xa Arimateya, doropa ra Vayuda, aalangutela Mfumu wa Xikwembu.

⁵² Kutani aya ka Pilato, ayakombela ntsumbu wa Yesu.

⁵³ Kuteloko awuhawulile, awuphutsela hi lansoro, awuveka sirheni lerikovotliweke ribzeni, laha akungasilahliwa munhu kona.

⁵⁴ Siku lero, arili ra kutilungisela, akusungula siku ra Savata.

⁵⁵ Na vona vavasati lavahumeke Galileya na Yesu, vata kusuhi, vavona sirha, ni hi ndlela leyi ntsumbu wa Yesu wuvekiwaka ha yona.

⁵⁶ Kutani vatlhelela kaya, vayalungisa mafurha ya kunun'hwela; kambe hi siku ra Savata, vahumula hi kulandza nawu wa xiyuda.