Luka 21 - Testamente Leyimpsha Xichangana

Ta nhlengo wa mufelakazi wa xisiwana

¹ Loko Yesu atlakusa mahlo, avona vafuwi lesvi vahoxaka svona xibzeni xanhlengo wa Tempele.

² Avona ni mufelakazi lweyi aali xisiwana, ahoxa svimalana sva tilepta timbirhi ntsena.

³ Kutani aku: “Hakunene nili ka n'wina: Mufelakazi lweyi wa xisiwana ahumesile kutlula hinkwavu;

⁴ hikuva vanhu lava hinkwavu vahumesile tinyiko leti vatipambuleke xumeni xa vona lexotala, kasi wansati lweyi ahumesile sva vusiwana bza yena, svinga hinkwasvu lesvi aatahanya hi svona.”

Ta Yesu loko ativisa kuwonheka ka Tempele

⁵ Van'wana avavulavula hi lesvi Tempele, ayisasekisiwe xisvona hi maribze lawa yosaseka ni tinyiko ta vagandzeli; kutani Yesu aku:

⁶ “Loko svili lesvi misvivonaka, kutata masiku lawa kungatakala kungahasali ribze henhla ka ribze rin'wana; hinkwawu matahirimuxiwa.”

Ta svikombiso ni kuxaniseka

⁷ Kutani vavutisa Yesu, vaku: “Mujondzisi, timhaka leti titahumelela nkarhi muni xana? Xana xikombiso xitava xihi xa lesvaku tilava kuhumelela ke?”

⁸ Kutani Yesu aku: “Tivoneleni lesvaku mingakangayisiwi, hikuva lavotala vatata hi vito ra mina, mun'wana ni mun'wana aku: ‘Mina ni yena’ ni lesvaku ‘nkarhi wufikile’! Mingavalandzeni!

⁹ Loko mitwa huwa ya tinyimpi ni ya minkitsinkitsi, mingatshukeni michava, hikuva svosvo svifanele kurhanga svihumelela, kambe makumu wona matahlwela kufika.”

¹⁰ Yesu atlhela aku ka vona: “Tiko rin'we ritapfukela rin'wana, mfumu wun'we wutalwa ni wun'wana;

¹¹ kutava ni kutsekatseka ka misava; mintungu ni tindlala svitava kona matlhelweni lawa yotala; kutahumelela ni svilo lesvichavisaka ngopfu, ni masingita lamakulu lamahumaka tilweni.

¹² “Kambe loko svilo lesvi hinkwasvu svingasivakona, vatamikhoma, vamixanisa, vaminyiketa masinagogeni ni le majele, vamiyisa mahlweni ka tihosi ni ka tindhuna hikolaho ka vito ra mina;

¹³ wutava wona nkarhi wa n'wina wohumesa vumboni.

¹⁴ Hikolaho svivekeni miyehleketweni ya n'wina lesvaku mingatikarhati hi kutilulamisa lesvi mingatahlamulisa xisvona,

¹⁵ hikuva mina nitaminyika marito ya vutlhari lawa valala va n'wina hinkwavu vangatatsandzeka kulwa na wona ni kumakaneta.

¹⁶ Mitanyiketiwa hi vapsali va n'wina, ni vamakwenu, ni maxaka, ni vanakuloni; vatadlaya van'wana va n'wina;

¹⁷ mitavengiwa hi vanhu hinkwavu hikolaho ka vito ra mina.

¹⁸ Kambe akungalovi hambi wuli nsisi ni wun'we wa tinhloko ta n'wina;

¹⁹ hi kutiyisela ka n'wina mitatikumela vutomi.

Ta Yesu loko ativisa kuhahluliwa ka Yerusalema

²⁰ “Kutaku loko mivona doropa ra Yerusalema rirhendzeliwile hi mab'uthu ya valala, tivani lesvaku kuhahluliwa ka rona kule kusuhi.

²¹ Hi nkarhi wolowo, lava vanga Yudeya, avatsutsumele tintshaveni; lava vanga doropeni, avahume ka rona; kutani lava vanga handle ka doropa, vangatshuki vanghena ka rona.

²² Masiku wolawo matava masiku ya kukhatisa, lesvaku hinkwasvu lesvinga matsalweni svihetiseka.

²³ Yowee ka vavasati lava vangatava vatikile ni lava vangatava na vanyan'wisa minkarhini yoleyo, hikuva kuxaniseka lokukulu kutava kona misaveni, ni mahlundzu ya Xikwembu matawela vanhu volavo.

²⁴ Vatadlawa hi tlhari, vatayisiwa na vali svikarawa matikweni hinkwawu; kutani doropa ra Yerusalema ritakandziyeliwa hi vamatiko kukondza minkarhi ya vona yihetiseka.

Ta kuhumelela ka N'wana-wa-Munhu

²⁵ “Masingita matava kona ka jambu ni n'weti, ni le tinyeletini. Laha misaveni, vahanyi vamatiko vataxaniseka, vakanganyiseka, vatshukisiwa hi kuduma ka lwandle ni ka magandlati ya rona.

²⁶ Vanhu vatatitivala hi kuchava ni kuyehleketa lesvingatahumelela la misaveni, hikuva lesvi sva matimba sva le matilweni svitatsekatsekisiwa.

²⁷ Hikona vangatavona N'wana-wa-Munhu ata hi refu, na ali ni matimba ni kukwetsima lokukulu.

²⁸ Loko svilo svosvo svisungula kuhumelela, wololokani mitlakusa tinhloko ta n'wina, milanguta henhla, hikuva kukutsuliwa ka n'wina kule kusuhi.”

Ta Jondzo ya nkuwa

²⁹ Kutani avarungulela xifaniso aku: “Langutani nkuwa ni minsinya hinkwayu;

³⁰ loko miyivona yihluka, masvitiva na n'wina lesvaku malanga male kusuhi.

³¹ Hi mukhuva wolowo, loko mivona svilo svosvo svihumelela, mitativa lesvaku Mfumu wa Xikwembu wu le kusuhi.

³² Nitiyisile nili ka n'wina: Nguva leyi ya vanhu yingakala yingahundzi, na kungasihumelela svilo lesvi hinkwasvu.

³³ Tilo ni misava svitahundza, kambe marito ya mina mangakala mangahundzi.

Hitekani!

³⁴ “Tivoneleni lesvaku timbilu ta n'wina tingatikeliwi hi makolo ni vudakwa, ni kuvilela hi sva vutomi lebzi, nasvona tivoneleni lesvaku siku lero ringafiki hi xitshuketa;

³⁵ hikuva, kukotisa ntlhamu, ritawela hinkwavu lavayakeke misaveni hinkwayu.

³⁶ Hitekani ke, mikhongela minkarhi hinkwayu, lesvaku mikuma matimba ya kupona ka svilo hinkwasvu lesvi svingatahumelela, ni kuyima na mitiyile mahlweni ka N'wana-wa-Munhu.”

³⁷ Ni nhlekanhi Yesu aatshama ajondzisa Tempeleni, kambe nimajambu aahuma, ayayetlela ntshaveni leyivuliwaka ya Maolivhera.

³⁸ Loko rixa, vanhu hinkwavu avapfukisa vata ka yena Tempeleni kutamu yingisa.