Luka 20 - Testamente Leyimpsha Xichangana

Ta loko vakaneta matimba ya Yesu

¹ Siku rin'wana, loko Yesu ajondzisa vanhu Tempeleni ni kupaluxa Evhangeli, Vaprista lavakulu ni Vatsali vafika, svin'we ni vakulukumba va tiko, vaku ka yena:

² “Hibzele lesvaku xana uyendla svilo lesvi hi matimba wahi ke? Lweyi akunyikeke matimba lawa, i mani xana?”

³ Avahlamula aku: “Na mina nitamivutisa lesvi:

⁴ Xana akukhuvula ka Yohani akuhuma tilweni, kumbe ka vanhu ke?”

⁵ Vona vakanetana vaku: “Loko hiku: ‘Akuhuma tilweni’, ataku: ‘Hikolaho ka yini mingapfumelanga ka yena ke?’

⁶ Kambe loko hiku: ‘Akuhuma ka vanhu’, vanhu hinkwavu vatahikhandla hi maribze, hikuva hinkwavu vakholwa lesvaku Yohani aali muprofeta.”

⁷ Kutani vahlamula vaku: “Ahitivi laha akuhuma kona.”

⁸ Hi loko Yesu aku ka vona: “Na mina, aningamibzeli lomu matimba lawa nitirhaka ha wona, mahumaka kona.”

Ta xifaniso xa nsimu ya mvhinya ni vatirhi

⁹ Kutani arungulela vanhu xifaniso lexi, aku: “Munhu wokarhi aabzalile mvhinya nsin'wini ya yena, kutani awuveka mavokweni ya varimi, yena ateka riyendzo ra nkarhi woleha.

¹⁰ Hi nguva yakona, arhuma mutirhi ka varimi, lesvaku vayamunyika mihandzu ya mvhinya. Kambe varimi vamuba, vamutlhelisa na angali na nchumu.

¹¹ Atlhela arhuma mutirhi mun'wana; na yena vamuba, vamukhomisa ni tingana, kutani vamutlhelisa na angali na nchumu.

¹² Atlhela arhuma wa vunharhu; yelweyo vamuboxa timbanga, vamuhlongola.

¹³ Ndzhaku ka svona, n'winyi wa mvhinya aku: ‘Nitayendla yini? Nitarhuma n'wana wa mina, lweyi nimurhandzaka; kumbexana loko vamuvona, vatamuchava.’

¹⁴ Kambe varimi, loko vamuvona, vabzelana vaku: ‘Majandzhaka hi lweyi! Ahimudlayeni, lesvaku ndzhaka yitava ya hina.’

¹⁵ Kutani vamuhlongola nsin'wini ya mvhinya, vamudlaya. Xana n'winyi wa mvhinya atayendla yini hi vona ke?

¹⁶ Atata, atalovisa vatirhi volavo, anyika nsimu ya mvhinya ka van'wana!” Loko vatwa svosvo, vaku: “Svingatshuki sviva tano.”

¹⁷ Kambe Yesu avalanguta aku: “Xana rivula yini tsalwa leringe:” “‘Ribze leri vayaki vangarinyenya, hi rona leringayendliwa ribze lerikulu ra masungulu’ xana?

¹⁸ “Mani na mani lweyi angatawela henhla ka ribze leri, atapshandlaka; nasvona ritapshandlasa lweyi ringatamuwela henhla.”

¹⁹ Kutani Vaprista lavakulu ni Vatsali avanavela kumukhoma nkarhi wolowo, hikuva avasvitwisisile lesvaku aavula vona hi xifaniso lexi, kambe avachava xitshungu.

Ta kuhumesela Khezari rhesa

²⁰ Hi loko vayimela nkarhi lowunene lowu vangamukhomaka ha wona, kutani varhuma tinhloli leti titiyendleke vanhu lavolulama, lesvaku titamuphasa hi marito ya yena, kutani titamunyiketa mavokweni ya murhangeli wa vuhosi.

²¹ Vanhu lava vavutisa Yesu vaku: “Mujondzisi, hasvitiva lesvaku uvulavula ni kujondzisa hi kululama; awuyi hi nghohe, nasvona ujondzisa ndlela ya Xikwembu hi ntiyiso.

²² Xana svahifanela kuhumesela Khezari rhesa, kumbe asvihifaneli ke?”

²³ Kambe yena, hi kuvona vutlhari bza vona, aku ka vona:

²⁴ “Nikombeni denari. Yi ni xifaniso xa mani ni vito ra mani ke?” Vona vaku: “I sva Khezari.”

²⁵ Hi loko aku ka vona: “Hikolaho, nyikani Khezari lesvinga sva Khezari, ni Xikwembu lesvinga sva Xikwembu.”

²⁶ Kutani vatsandzeka kumuphasa hi marito ya yena mahlweni ka vanhu; vahlamala hi kuhlamula ka yena, vamiyela.

Ta xivutiso henhla ka kupfuka kufeni

²⁷ Vasaduki avavula lesvaku vafi vangepfuki. Kutani siku rin'wana van'we ka vona vata ka Yesu, vafika vamuvutisa vaku:

²⁸ “Mujondzisi, Moxe ahisiyele matsalwa lawa mange: ‘Loko munhu atekile nsati, kutani afa na angali na vana, makwavu atasala ahlayisa nsati wa mufi, lesvaku apfuxa njangu wa makwavu.’

²⁹ Kutani mhaka hi leyi: Akuli ni vamakwavu vaxinuna va ntlhanu ni vambirhi; lweyi wa mativula ateka nsati, kutani afa na angali na vana.

³⁰ Wa vumbirhi ahlayisa nsati wa mufi,

³¹ ni lweyi wa vunharhu ayendlisa svosvo; sviva tano ni ka hinkwavu lava va ntlhanu ni vambirhi; vafa, na vangasiyanga vana.

³² Aku heteleleni, na yena lweyi wansati afa.

³³ Lesvi lava va ntlhanu ni vambirhi hinkwavu vaveke vanuna va wansati lweyi, hi siku ra kupfuka kufeni, atava nsati wa mani xikarhi ka vona xana ke?”

³⁴ Yesu avahlamula aku: “Vanhu va misava leyi vachada kumbe kuchadisiwa;

³⁵ kambe lava vangatapfumeleliwa kuvona sva minkarhi leyitaka ni kupfuka ka vafi, avahachadi kumbe kuchadisiwa;

³⁶ avahafi, hikuva vafana ni tintsumi, vahundzuka vana va Xikwembu, hi mhaka ya lesvi vangapfuxiwa kufeni.

³⁷ Loko kuli kupfuka ka vafi, Moxe na yena atiyisile mhaka loko ali kusuhi ni xihlahla, kutani avula lesvaku Hosi i Xikwembu xa Abrahamu, ni Xikwembu xa Izaki, ni Xikwembu xa Yakobe.

³⁸ Hikolaho ahi Xikwembu xa lavafeke, kambe i xa lavahanyaka; hikuva, ka xona, hinkwavu vahanya.”

³⁹ Hi loko Vatsali van'wana vamubzela vaku: “Mujondzisi, uvulavule khwatsi.”

⁴⁰ Kutani avahatiyanga kumuvutisa mhaka yin'wana.

Ta xivutiso henhla ka n'wana Davhida

⁴¹ Kutani aku ka vona: “Xana vanhu vavula yini loko vaku: ‘Mesiya i N'wana Davhida’ ke?”

⁴² Kasi yena Davhida avulile bukwini ya Tipisalma aku: “‘Yehovha Xikwembu xite ka N'winyi wanga: Tana utatshama vokweni ra mina ra xinene,

⁴³ nikondza niveka valala va wena hansi ka minkondzo ya wena.’

⁴⁴ “Kutani loko Davhida avula Mesiya aku i N'winyi wa yena, xana anga van'wana wa yena hi ndlela yihi ke?”

Ta Yesu loko asandza Vatsali

⁴⁵ Loko vanhu hinkwavu vali karhi vamuyingisa, aku ka vajondzisiwa va yena:

⁴⁶ “Tivoneleni ka Vatsali lavarhandzaka kufambafamba na vayambele xiyambalu lexoleha, varhandza ni kuxewetiwa mintsendzeleni; vahlawula svitshamu lesvinene masinagogeni, vatsakela ni kutshama lomu kochaviseka minkhubzeni.

⁴⁷ Hi vona vaphangelaka ni kukangayisa vafelakazi ni minjangu ya vona, vayendla ni svikhongelo lesvoleha lesvaku vatavoniwa. Vatayavanyisiwa hi kuyavanyisa loku kutlulisaka!”