Luka 2 - Testamente Leyimpsha Xichangana

Ta kuvelekiwa ka Yesu

¹ Masikwini wolawo kuhuma nawu wa hosi Khezari Awuguxtu wa lesvaku vanhu va matiko hinkwawu yofumiwa hi yena vayatitsalisa.

² Kutsalisa loku korhanga kuyendliwile nkarhini lowu Kirinu aafuma Siriya.

³ Kutani hinkwavu avayatitsalisa, mun'wana ni mun'wana doropeni ra yena.

⁴ Yosefa na yena asuka Galileya doropeni ra Nazareta, aya Yudeya doropeni ra Davhida lerivuliwaka Betlelehema, hikuva aali munhu wa rixaka ra Davhida, ni wa yindlo ya yena.

⁵ Ayatsalisa vito ra yena kona, ni ra Mariya lweyi aamutshembisile, lweyi aayimela kukuma n'wana.

⁶ Kuteloko vali koseyo, masiku ya kutshunxeka ka yena mafika.

⁷ Kutani aveleka n'wana wa yena wa mativula, wa mufana; amuphutsela hi tinguvu, amulata xigovolweni xa svifuyu, hikuva avapfumalile ndhawu ndlwini ya vayendzi.

Ta varisi ni tintsumi

⁸ Akuli ni varisi mugangeni wolowo, avatshama nhoveni, vali karhi vahlayisa mintlhambi ya vona nivusiku.

⁹ Kutani ntsumi ya Hosi yihumelela ka vona, kukwetsima ka Hosi kuvarhendzela, kutani vachava hi kuchava lokukulu.

¹⁰ Ntsumi yiku ka vona: “Mingachaveni! Vonani, nimitivisa mahungu lamanene lawa mangatatsakisa svinene tiko hinkwaru;

¹¹ hi lesvaku namuntlha mivelekeliwile Muponisi doropeni ra Davhida; lweyi anga Kriste, Hosi.

¹² Xikombiso ka n'wina xitava lexi: Mitakuma xihlangi lexiphutseliweke hi tinguvu, na xilatiwile xigovolweni xa svifuyu.”

¹³ Hi nomo-lo vunyingi bza mab'uthu ya le tilweni bzihumelela na bzili ni tintsumi, bzidzunisa Xikwembu, bziku:

¹⁴ “Kudzuneka akuve ka Xikwembu matilweni ya le henhlahenhla, kurhula akuve misaveni ka vanhu lava xivatsakelaka.”

¹⁵ Kuteloko tintsumi tivasiyile, titlhelele tilweni, varisi vabzelana, vaku: “Ahiyeni Betlelehema, hiyavona lesvihumeleleke kona, lesvi Hosi yingahitivisa svona.”

¹⁶ Kutani vahantlisa vaya kona, vayakuma Mariya na Yosefa ni xihlangi lexilatiweke xigovolweni.

¹⁷ Loko vaxivonile, vavula lesvi vangabzeliwa svona mayelanu ni n'wana.

¹⁸ Kutani hinkwavu lavatweke lesvi varisi vangavula svona, vahlamala.

¹⁹ Kambe Mariya ahlayisa timhaka leti hinkwatu, atiyanakanya mbilwini ya yena.

²⁰ Kutani varisi vatlhela na vali karhi vadzunisa Xikwembu, vaxitlangela hikolaho ka hinkwasvu lesvi vasvivoneke, ni lesvi vasvitweke; asvivile hilaha avabzeliwile hakona.

Ta kuyimbisiwa ka Yesu

²¹ Loko n'wana atlhanganisile masiku ya ntlhanu ni manharhu, ayimbisiwa, kutani vamuchula vito ra Yesu, hilaha ntsumi yingamuchula hakona, mamana wa yena angasixurha nyimba.

Ta Yesu loko anyiketiwa Tempeleni

²² Loko kuhundzile masiku ya kutibasisa ka vona hi kulerisa ka Nawu wa Moxe, Yosefa na Mariya vayisa n'wana Yerusalema kuyamunyiketa ka Hosi;

²³ hikuva kutsaliwile lesvi Nawini wa Hosi: “N'wana mun'wana ni mun'wana wa xinuna, wa mativula, atahlawuleliwa Hosi.”

²⁴ Nasvona vahumesa timhamba leti tilerisiweke Nawini wa Hosi, svinga svituvana svimbirhi, kumbe mavondlo mambirhi ya svituvana.

²⁵ Le Yerusalema akuli ni munhu lweyi avuliwaka Simiyoni; munhu lweyi aalulamile, achava Xikwembu; aalangutela kuchaveleliwa ka Israyele. Moya Lowokwetsima awuli ka yena.

²⁶ Aakombisiwile hi Moya Lowokwetsima lesvaku angakala angafi angasivona Kriste wa Hosi;

²⁷ kutani aya Tempeleni hi kulerisiwa hi Moya. Loko Yesu n'wana atisiwa hi vapsali va yena kutayendla tani hi kulerisa ka Nawu,

²⁸ Simiyoni amuyamukela mavokweni ya yena, adzunisa Xikwembu, aku:

²⁹ “Svosvi Hosi, ungatshunxa nandza wa wena atifambela hi kurhula hilaha ungavula hakona,

³⁰ hikuva mahlo ya mina mavonile kuponisa ka wena,

³¹ loku ukulungiseleke mahlweni ka matiko hinkwawu,

³² kunga kuvonakala lokungatavoninga vamatiko, ni kundzuneka ka Israyele tiko ra wena.”

³³ Kutani tatana wa yena ni mamana wa yena vahlamala timhaka leti tivuliwaka hikolaho ka yena.

³⁴ Kutani Simiyoni avakatekisa, aku ka Mariya, mamana wa n'wana: “Vona, n'wana lweyi a ni xikongomelo xa lesvaku lavotala vakhunguvanyeka, van'wana vapfuxiwa tikweni ra Israyele. Atava xikombiso lexi lavotala vangatalwa na xona,

³⁵ lesvaku miyanakanyu ya vona yihumela rivaleni. Na wena, nhlomulu wutakutlhava mbilu kukota tlhari.”

³⁶ Akuli na Ana, muprofeta waxisati, n'wana Fanuwele, wa va ka Aseri; aajuhalile ngopfu. Loko atekiwa ahali lwe mumpsha, ahanyile ni nuna wa yena malembe ya ntlhanu ni mambirhi,

³⁷ kutani afeliwa hi nuna. Aali ni malembe ya ntlhanu wa makume ni makume manharhu ni mune (84), aangasuki Tempeleni, kambe aatirhela Hosi hi kutitsona svakuja ni kukhongela vusiku ni nhlekanhi.

³⁸ Otshuka afikile nkarhini wolowo, akhensa Xikwembu, avula hi ta n'wana Yesu ka hinkwavu lavalanguteleke kukutsuliwa ka Yerusalema.

Ta loko vatlhelela Nazareta

³⁹ Kuteloko vahetile hinkwasvu lesvilerisiweke hi Nawu wa Hosi, vatlhelela Galileya, vaya Nazareta kaya ka vona.

⁴⁰ Loko ali n'wana, aakula, atiya, atala hi vutlhari, kutani timpsalu ta Xikwembu atili na yena.

Ta Yesu n'wana loko asala Tempeleni

⁴¹ Vapsali va Yesu avaya Yerusalema lembe rin'wana ni rin'wana nkhubzeni wa Paska.

⁴² Kutani loko ali ni malembe ya khume ni mambirhi, vatlhantuka na yena nkhubzeni tani hi ntolovelo wa vona.

⁴³ Loko masiku ya nkhuvu mahelile, vatlhelela ka le kwavu, kambe Yesu n'wana asala Yerusalema na vapsali va yena vangasvitivi.

⁴⁴ Hi kuyehleketa lesvaku a svin'we ni lava valongolokaka na vona, vafamba siku hinkwaru, kutani vasungula kumulava ka maxaka ya vona ni ka lava vativanaka na vona.

⁴⁵ Loko vangamukumi, vatlhelela Yerusalema na vali karhi vamulava.

⁴⁶ Ndzhaku ka masiku manharhu vamukuma Tempeleni, atshamile xikarhi ka vajondzisi, avayingisela, ni kuvavekela svivutiso;

⁴⁷ kutani hinkwavu lava avamutwa vahlamala vutivi bza yena ni tinhlamulu ta yena.

⁴⁸ Loko vapsali va yena vamuvona kona, vahlamala ngopfu. Kutani mamana wa yena aku ka yena: “N'wananga, hikolaho ka yini uhitirhisile hi ndlela leyi xana? Wasvivo, tatana wa wena na mina ahikulava hili kukarhatekeni svinene.”

⁴⁹ Yesu avahlamula aku: “Aminilavela yini? Xana amingasvitivi lesvaku nifanela kuva kola ndlwini ya Tatana wa mina ke?”

⁵⁰ Kambe vona avatwisisanga marito lawa angavahlamula ha wona.

⁵¹ Kutani angirimela na vona, aya Nazareta, aatshama avayingisa. Kutani mamana wa yena ahlayisa timhaka leti hinkwatu mbilwini ya yena.

⁵² Loko ali Yesu, aakula vutlharini, mirini ni le timpsalwini mahlweni ka Xikwembu ni le ka vanhu.